1 YOHANES 3 - Rengah Jian

Tong irah éh anak Allah

¹ Jian keh nesen Allah matek pika lu' mu'un, avéé' lu' nateng anak Allah, adang uleu' anak Allah, bang kelunan éh tong tana' iteu' bé' réh jam lu' anak Allah. Uban kelunan tong tana' bé' réh jam Allah.

² O kekat padéé' éh kemurung ké', hun iteu' uleu' lepah paléu anak Allah, bang pengepaléu lu' kepéh vam, bé' lu' omok jam éh. Bang éh kejam lu' mu'un, inah éh, hun Kristus pu'un tuai kepéh uleu' omok paléu pekua' Iah, hun inah boh lu' na'at Iah ngan lenaa' mu'un.

³ Siget-siget usah éh ngelan tong Kristus tekep iah mavaa' kenin néh ke' néh ni'ai, pekua' Kristus pu'un ni'ai.

⁴ Kelunan éh maneu' penyala' ngelapah ha' tebaraa' Tuhan, uban penyala' nah inah éh ngelapah tong ha' tebaraa' Tuhan.

⁵ La'ah ka'ah jam Kristus lepah tuai dokoo' Néh mega' penyala' kelunan, ngan usah Néh tengéé' bé' pu'un penyala' lem Iah.

⁶ Bang kelunan éh petem lem Kristus, bé' iah petem maneu' penyala', bang kelunan éh petem maneu' penyala', Iah bé' jak jam Kristus ngan urip Kristus bé' pu'un lem néh.

⁷ O kekat anak ké', mai keh lavo', kelunan éh kivu pengeloo' Tuhan iah éh anak Allah barei' Kristus.

⁸ Kelunan éh petem maneu' penyala', iah anah Sitan, uban jin bu'un sahau Sitan nah maneu' penyala'. Inah maneu' Anak Allah tuai ke' Néh kebéé kekat penganeu' Sitan.

⁹ Séé'-séé' éh paléu anak Allah, bé' éh petem maneu' penyala', uban urip Allah pu'un éh dalem néh, Allah éh Tamen néh kepéh, bé' éh omok petem maneu' penyala'.

¹⁰ Kenat péh jalan uleu' jam irah éh anak Allah ngan irah éh anak Sitan péh. Kelunan éh bé' maneu' pengeloo' Allah ngan éh bé' pika padéé' néh bé' iah anak Allah.

Kua' pepika

¹¹ Uban tebaraa' éh nenéng keh jin sahau, inah éh, jian uleu' kua' pepika.

¹² Mai lu' barei' Kain éh kivu Sitan ngan éh mematai padéé' nah Ke'. Uban ineu' Kain mematai padéé néh? Uban kekat penganeu' néh pu'un Sala' bang kekat penganeu' padéé néh pu'un teneng.

¹³ O kekat padéé' ké', mai keh béé kenin hun irah tong tana' iteu' ngeleko keh.

¹⁴ Uleu' jam uleu' murip ngan lepah piso jin jalan éh mihin lu' matai. Uban lu' pika kekat padéé' lu'. Séé-séé éh bé' pika padéé néh, to de' ke' éh tong jalan éh mihin éh matai.

¹⁵ La'ah kelunan éh leko padéé' néh, iah péh pekua' kelunan éh mematai kelunan, ka'ah jam kelunan éh mematai kelunan, bé' réh pu'un urip pelinguh.

¹⁶ Inah jalan lu' jam kenin lu' omok pika kelunan éh jah Kristus lepah mena' urip Néh ngeliwah uleu'. Uban néh kenat uleu' tekep mena' urip lu' dokoo' pika kekat padéé' lu'.

¹⁷ Hun pu'un kelunan éh pu'un livah na'at padéé' néh éh kari éh tekep tenolong néh bang bé' iah keloo' nolong padéé néh inah, kineu' jalan iah omok bara' iah pu'un pika Allah.

¹⁸ O kekat anak ké', mai lu' bara' lu' pika palaa' ha' ujun lu' awah, bang jian lu' kua' pepika palaa' penika éh mu'un éh pepoléng lu' jin penganeu' lu'.

Kemakang kenin tong jumen Allah

¹⁹ Inah jalan uleu' jam uleu' anak-anak Allah éh teneng ngan kenin lu' pu'un pawah tong jumen Allah.

²⁰ Hun pu'un éh lem kenin lu' juk pesala' lu', Allah pelapah ja'au jin kenin lu', ngan Iah jam kekat néh béé.

²¹ O kekat padéé' éh kemurung ké', hun kenin lu' bé' pesala' lu', adang lu' pu'un makang kenin tong jumen Allah,

²² ngan ineu'-ineu' éh pengenyat lu', adang lu' omok alaa' éh uban uleu' kivu kekat sohoo' Néh ngan maneu' kekat éh pengeloo' Néh kepéh.

²³ La'ah iteu' éh sohoo' Néh, jian uleu' ngelan tong Anak Néh Yésus Kristus ngan kua' pepika, pekua' sohoo' Kristus ngan lu'.

²⁴ La'ah séé'-séé' éh mihau kekat sohoo' Allah, pu'un éh petem dalem Allah, ngan Allah péh petem dalem néh. La'ah inah jalan uleu' jam Allah pu'un petem dalem uleu', uleu' jam éh neu' Sahéé' Néh éh nena' Néh ngan lu'.