1 KORINTUS 9 - Rengah Jian

Tong éh tekep ngan irah éh lawah Tuhan

¹ Bé' akeu' ripen tong adet sebayang ineu'-ineu'. Adang keh jam akeu' éh kelunan éh pelepu. Akeu' jah lawah Tuhan. Pu'un ku' na'at Yésus éh Tuhan lu'. Ka'ah péh pu'un ngelan tong Tuhan neu' kereja' ké' iteu'.

² Na' péh kelunan éh jah bé' alaa' akeu' barei' lawah Tuhan, adang ka'ah pu'un alaa' akeu'. Uban ka'ah pu'un ngelan tong Tuhan, inah éh pepoléng kereja' ké' lawah Tuhan.

³ La'ah inah éh ha' ké' ngan kelunan éh maneu' akeu'.

⁴ Kineu', bé' tekep kelunan mena' ka'an kinan ngan baa' nesep ngan ké' hun ké' kereja' belah réh kei?

⁵ Kineu', pu'un keh seruh irah lawah éh jah awah éh tekep kawin ngan mihin redo néh lakau, hun réh tai lakau perengah Tuhan barei' éh neu' Yakub, éh padéé' usah Tuhan Yésus, rawah Péterus nah.

⁶ Kineu', amo Barnabas tengéé' éh tekep kereja' dokoo' tagong usah mo?

⁷ Mah seradu éh tagong usah néh tengéé' hun néh tai pekayau? Mah kelunan pu'un maneu' pulah agun éh bé' kuman buaa' néh? Mah kelunan mihau sapé' éh bé' alaa' baa' étéé' néh?

⁸ Bé' makat akeu' bara' tong éh kemalai keh awah.

⁹ Bang ha' lem Surat Musa pu'un éh bara', kelunan éh maneu' kereja' Tuhan tekep réh tagong éh. Uban ka' ha' néh, Mai keh ngejeret ujun sapé' tovoo' néh meték nah. Kineu', Allah seruh tong sapé' inah awah.

¹⁰ Kineu', bé' Iah seruh tong uleu' kepéh hun néh pané kenat? Adang ha' inah senurat néh ngan uleu' kepéh. La'ah kelunan éh nyakun tana' ngan kelunan éh alaa' buaa' jin pulah inah, tekep rawah maneu' kereja' roh ngan ngelan hun buaa' néh pu'un omok roh pekua' petulat éh.

¹¹ Pu'un mé' mulah tulin jin Sahéé' lem kenin keh, kineu' améé' sala' hun mé' alaa' éh jin ka'ah éh tekep tong urip mé' kepéh?

¹² Hun kelunan éh jah omok alaa' éh jin ka'ah, makin péh améé' kepéh. Bang na' péh tekep keh tagong améé', bé' mé' nyohoo' keh. Bang améé' ngeretep awah dalem kekat inah, dai améé' mapat Rengah Jian Kristus.

¹³ Kineu', bé' keh jam kelunan éh kereja' tong umaa' Allah sahau, irah alaa' penguman réh jin umaa' Allah inah, kenat péh tong kelunan éh mematai ka'an ngan motong éh tong jalan réh mena' éh ngan Tuhan, pu'un réh alaa' tulat ka'an inah kepéh.

¹⁴ Kenat péh Tuhan bara', kelunan éh bara' Rengah Jian tekep éh alaa' tulat jin kereja' néh perengah Rengah Jian inah.

¹⁵ Bang na' péh éh tekep keh tagong akeu', bé' akeu' nyohoo' keh, ngan bé' akeu' nyurat hun iteu' dokoo' nyohoo' keh maneu' éh kenat. Pelapah jian akeu' matai jin ké' nyohoo' keh maneu' éh kenat. Ha' ké' inah bé' éh ha' ké' kenyo, bé' omok kelunan tuyah-tuyah éh.

¹⁶ Bé' akeu' omok ngajung usah ké' tengéé' uban akeu' perengah Rengah Jian. Allah éh nyohoo' ku' perengah éh, bé' ku' omok bé'. Éh mu'un, tusah mu'un-mu'un tong akeu' hun akeu' bé' perengah Rengah Jian inah.

¹⁷ Hun akeu' maneu' kereja' Tuhan kivu pengeloo' kenin ké' tengéé', boh éh tekep akeu' alaa' oléé' néh jin kelunan kepéh, bang hun néh neu' sohoo' Allah, inah akeu' kivu sohoo' Néh awah.

¹⁸ Hun néh kenat, ineu' éh oléé' néh tong akeu' kepéh? Inah éh, kemurung neu' Tuhan ngevéléé' akeu' bara' Rengah Jian Néh ngan bé' menyat ineu'-ineu' jin kelunan, ngan bé' nyohoo' kelunan maneu' ineu'-ineu' tagong akeu'.

¹⁹ Na' péh akeu' kelunan éh pelepu ngan bé' keripen kelunan, bang akeu' barei' ripen ngan kekat kelunan, dokoo' ké' omok mihin kuraa'-kuraa' usah réh ngelan tong Kristus.

²⁰ Hun ké' kereja' belah irah Yahudi, pu'un ku' murip barei' urip irah, dokoo' ké' omok mihin réh ngelan tong Tuhan. Malai irah Yahudi kivu kekat adet lem Surat Musa, bé' akeu' pu'un maneu' kenat. Bang hun ké' pu'un ngan irah, akeu' péh kivu éh, dokoo' ké' omok mihin réh ngelan tong Kristus.

²¹ Kenat kepéh hun ké' pu'un tai ngan irah éh tengéé' pohoo' éh bé' kivu adet lem Surat Musa nah, akeu' péh bé' kivu éh. Akeu' murip pekua' kemalai irah, dokoo' ké' omok mihin réh ngelan tong Tuhan. Hun akeu' maneu' kenat, bé' akeu' ngelapah sohoo' Tuhan, uban pu'un ku' kivu kekat sohoo' Kristus.

²² Hun ké' pu'un ngan kelunan éh kurang pengelan, akeu' péh pu'un pekua' barei' kelunan inah, dokoo' ké' omok mihin réh ngelan tong Tuhan. La'ah tong kekat kelunan béé, akeu' péh pekua' barei' irah péh, dokoo' neu' kekat jalan ineu'-ineu' omok akeu' mihin réh ngelan tong Kristus.

²³ Bang akeu' maneu' kenat dokoo' réh omok jam tong Rengah Jian, dokoo' ké' omok alaa' jian kenin neu' réh ngelan tong Tuhan.

²⁴ Adang keh jam, hun keh petakéé' dalem réh petesi, kekat kelunan éh juk nakéé' réh pu'un réh pata nekedeu', bang jah usah awah éh menang. Jian ka'ah kepéh nekedeu' barei' kelunan éh juk menang inah.

²⁵ La'ah siget-siget kelunan éh juk pekelawan, adang iah mihau usah néh dalem kekat éh naneu' néh, iah maneu' kenat uban néh juk menang ngan alaa' jah tapong, tapong éh omok melayeu' awah. Bang uleu' kepéh mihau kenin lu' dokoo' lu' omok alaa' jah tapong éh bé' omok melayeu' kepéh.

²⁶ Uban néh kenat akeu' nekedeu' mu'un-mu'un, bé' ku' tedau. Barei' kelunan éh memukut, bé' éh memukut sawang awah,

²⁷ bang akeu' ngegahang usah ké' ngan ngeripen éh, dokoo' la'o ké' nebaraa' kelunan éh jah, mai usah ké' tengéé' nebet Tuhan.