1 KORINTUS 7 - Rengah Jian

Tong peneteng kelunan Korintus tong kawin

¹ La'ah tong kekat peneteng keh dalem surat keh rai, inah akeu' juk mipa éh. Jian éh hun pu'un lakei' éh bé' kawin.

² Bang uban pinaa' kelunan éh petuyang, tekep siget-siget lakei' kawin ngan siget-siget redo pu'un lakei' néh.

³ Jian lakei' maneu' éh tekep ngan redo néh, kenat péh redo ngan lakei' néh, mai rawah pekeleko.

⁴ La'ah redo éh lepah kawin, bé' usah néh anah nah tengéé', bang anah lakei' néh. Kenat péh lakei', bé' usah néh anah nah tengéé', bang anah redo néh.

⁵ Mai rawah pekeleko. Bang hun rawah juk posot metok omok kenat hun rawah pané tenah ngan pekua' kenin keloo' kenat metok awah, dokoo' rawah omok sebayang. La'o inah jian rawah pemung kepéh barei' malai, dai rawah teneng tenupat Sitan uban roh bé' omok ngeretep.

⁶ La'ah akeu' bara' éh seneruh ké' awah, bé' makat nyohoo' keh kenat.

⁷ La'ah kenin ké' mu'un keloo' ku' hun kekat kelunan omok pekua' akeu', bang siget-siget kelunan alaa' pengena' éh jin Allah, jah barei' iteu' ngan jah barei' inah.

⁸ La'ah ha' ké' kepéh ngan irah lemanai ngan irah redo baleu', pelapah jian hun keh murip tengéé' pekua' akeu' iteu'.

⁹ Bang hun keh bé' omok ngeretep, jian keh kawin, pelapah jian keh kawin jin keh kelih ngan magat juk tavin réh.

¹⁰ La'ah ngan kelunan éh lepah kawin, inah sohoo' ké', bé' éh sohoo' ké' awah bang sohoo' Tuhan éh. Redo éh pu'un lakei' bé' éh omok petat jin lakei' néh.

¹¹ Bang hun néh pu'un petat, jian iah murip tengéé' jah usah awah, barang moléé' kepéh ngan lakei' néh. La'ah lakei' éh pu'un redo bé' éh omok petat jin redo néh.

¹² La'ah ha' ké' ngan kelunan éh jah kepéh, bé' éh ha' Tuhan, ha' ké' awah inah. Hun pu'un jah kelunan éh ngelan tong Tuhan éh pu'un redo éh bé' ngelan, ngan hun redo inah keloo' mokoo' pemung ngan néh, mai lakei' inah bet éh.

¹³ Kenat péh hun pu'un redo éh pu'un lakei' éh bé' ngelan, ngan lakei' néh keloo' mokoo' ngan néh, mai redo inah bet éh.

¹⁴ Na' péh lakei' néh bé' ngelan, hun néh mokoo' ngan redo néh éh ngelan, kenat éh lem pengeloo' Tuhan. Kenat péh barang éh redo bé' ngelan hun lakei' néh éh ngelan hun redo néh keloo' mokoo' ngan lakei' néh, kenat éh lem pengeloo' Tuhan. Hun rawah petat anak roh barei' anak irah éh bé' ngelan tong Tuhan.

¹⁵ Hun néh éh lakei' péh barang éh redo péh éh bé' ngelan ngan juk piso jin keruwah néh éh ngelan, turut ke' iah piso awah. Bé' lu' omok nyohoo' roh pemung awah de' ke' uban Allah tebai keh murip ngan pawah.

¹⁶ O redo éh ngelan tong Kristus, bé' ke' jam, barang ka'au' omok mihin lakei' ko' ngelan tong Tuhan hun ko' mokoo' petem ngan néh. Kenat péh lakei' éh ngelan, bé' ke' jam, barang ka'au' omok mihin redo ko' ngelan tong Tuhan.

Murip pekua' tenebai Tuhan ngan keh

¹⁷ Jian siget-siget usah murip pekua' pengena' Tuhan ngan néh, barei' bu'un hun Tuhan tebai éh rai. Kenat éh sohoo' ké' dalem kekat sidang.

¹⁸ Hun irah Yahudi tenebai Allah hun néh to kivu adet Yahudi ngan pesunat, mai iah juk barei' kelunan éh bé' pesunat. Kenat péh hun néh pu'un kelunan éh tengéé' pohoo' éh bé' kivu adet Yahudi ngan bé' pesunat, hun Allah tebai éh mai iah juk kivu adet irah ngan nyohoo' réh pesunat éh.

¹⁹ Uban kelunan éh pesunat ngan éh bé' pesunat péh, bé' éh ineu', bang éh tekep mu'un, inah éh hun lu' kivu kekat sohoo' Allah.

²⁰ Jian siget usah ngepohoo' tong jalan néh pu'un hun Allah tebai éh rai.

²¹ Kelunan éh ripen hun Allah tebai éh rai, mai éh tusah kenin hun néh kenat, bang hun pengeja'au keh éh ngamit keh juk ngelepu keh, jian keh pelepu.

²² Uban kelunan ripen éh ngelan tong Kristus ngan jam penebai Tuhan, na' péh éh ripen keto, iah péh pu'un pelepu tong jumen Kristus. Kenat péh hun kelunan éh pelepu hun Tuhan tebai éh rai, iah pu'un ripen ngan Kristus kepéh.

²³ Pu'un Allah melih keh palaa' éh ma'an, hun néh kenat mai keh keripen kelunan.

²⁴ O kekat padéé' ké', jian siget usah petem dalem Allah pekua' éh pu'un hun Allah tebai éh rai.

Ha' peneteng tong irah lemanai ngan redo baleu'

²⁵ La'ah tong redo éh bé' jak kawin, bé' pu'un sohoo' Tuhan ngan néh, bang akeu' bara' éh seneruh ké' tengéé' pekua' kelunan éh omok kenelan keh neu' pengasi Tuhan.

²⁶ La'ah hun lu' seruh tong kekat penusah éh pu'un hun iteu', inah akeu' seruh pelapah jian hun kelunan mokoo' barei' éh pu'un hun iteu'.

²⁷ Hun keh pu'un redo, mai keh juk petat jin iah. Hun keh to bé' jak kawin, mai keh juk kawin.

²⁸ Bang hun keh pu'un kawin, bé' éh sala' kenat. Ngan hun redo éh bé' jak kawin pu'un kawin, bé' éh sala' kenat. Bang akeu' keloo' mai keh pelohoo' lem kekat penusah irah éh kawin.

²⁹ La'ah inah éh benara' ké', O kekat padéé' ké'. Bé' lu' murip lebéé' la'ah tong tana' iteu', uban néh kenat jin hun iteu', tekep kelunan éh pu'un redo mai éh telalau seruh tong redo néh awah.

³⁰ Kelunan éh mangaa' ngan besau kenin, mai éh ngelinguh lem kebesau néh kenat, bang jian éh barei' hun néh bé' besau. Kenat péh kelunan éh mala', mai éh telalau ngan ngida awah. Kenat péh kelunan éh melih livah, mai éh telalau seruh tong livah inah awah.

³¹ La'ah kelunan éh pebelih, mai éh telalau seruh pebelih awah. Uban tana' iteu' bé' pu'un barei' hun iteu' lebéé' la'ah.

³² Bang kenin ké' mu'un keloo' ka'ah bé' pu'un tusah ineu'-ineu'. La'ah kelunan éh bé' pu'un redo, iah seruh mu'un tong kekat kereja' Tuhan, uban iah juk ngepayoo' kenin Tuhan.

³³ Bang kelunan éh pu'un redo iah seruh mu'un tong kekat éh pu'un tong tana' iteu', uban néh juk ngepayoo' kenin redo néh,

³⁴ kenat éh duah kenin. La'ah redo éh bé' kawin, iah seruh mu'un tong kekat kereja' Tuhan, dokoo' usah néh ngan kenin néh omok anah Tuhan. Bang redo éh pu'un lakei', iah seruh tong kekat éh tong tana' iteu', uban néh juk ngepayoo' kenin lakei' néh.

³⁵ Akeu' pané kenat uban ké' juk nolong keh, bé' akeu' juk mena' éh bahat ngan keh, bang akeu' keloo' ka'ah maneu' kekat éh jian ngan teneng ngan mena' kekat kenin ngan usah keh ngan Tuhan maneu' kereja' Néh.

³⁶ Bang tong kelunan éh lepah petunang, bang rawah seruh bé' juk pemung kepéh, hun lakei' inah bé' omok ngeretep tong redo inah, jian rawah kawin, bé' éh sala' kenat.

³⁷ Bang hun pu'un jah lakei' éh bé' keloo' kawin, bé' makat uban sohoo' kelunan bang neu' kenin néh tengéé' bé' iah keloo' kawin, hun iah jam mihau kenin néh ngan omok ngeretep, pelapah jian hun néh bé' kawin.

³⁸ Kenat péh kelunan éh kawin, jian éh, ngan kelunan éh bé' kawin, iah pelapah jian kepéh.

³⁹ La'ah redo éh lepah kawin, bé' éh omok alaa' lakei' maréng kelebéé' lakei' néh murip keto, bang hun lakei' néh lepah matai, omok éh kawin kepéh ngan séé'-séé' éh keneloo' néh, sokoh néh éh kelunan éh ngelan tong Tuhan.

⁴⁰ Bang kioo' ké' barang iah pelapah jian kenin hun néh bé' kawin kepéh. Inah éh kenin ké' awah, bang kioo' ké' akeu' péh pu'un Sahéé' Allah.