1 KORINTUS 2 - Rengah Jian

Rengah Tong Kristus éh senalib réh

¹ La'ah hun ké' tai tavin keh lepah rai dokoo' ké' bara' ha' tebaraa' Allah éh bé' kejam kelunan sahau, bang hun iteu' pu'un éh pepoléng Néh, bé' akeu' pané dalem kuraa'-kuraa' ha' éh ma'an éh bé' omok kejam keh, ngan bé' akeu' pané barei' kelunan éh pinaa' arong pengejam.

² Kelebéé' ké' pu'un ngan keh, jah awah kenin ké', inah éh juk bara' Yésus Kristus matai ngan keh, ngan bara' tong pematai Néh tong kayeu' salib.

³ Kenat péh hun ké' tai tavin keh, lemoo' usah ké' ngan medai ku', pah avéé' ké' riyet mu'un péh.

⁴ La'ah ha' tosok ké' ngan ha' tebaraa' ké' inah rai, bé' éh barei' ha' tebaraa' kelunan éh jam seruh, éh pinaa' arong pengejam, bang pu'un éh neu' penyukat Sahéé' Allah. Ke' ka'ah omok ngelan.

⁵ La'ah tong pengejam Tuhan Allah, bé' éh jin pengejam kenin kelunan éh ngepaléu kenin keh, bang neu' penyukat Allah.

Tong pengeloo' kenin Allah

⁶ Bang hun ké' nebaraa' kelunan éh lepah sukup pengejam réh tong ha' tebaraa' Tuhan, pu'un ku' nebaraa' réh palaa' kuraa'-kuraa' ha' tebaraa' éh ma'an éh pu'un ngan pengejam, bang pengejam ké' iteu', bé' éh pengejam jin tana' iteu' awah, bé' éh barei' pengejam irah éh pengeja'au kelunan éh jin tana' iteu' awah, uban kekat penyukat pengeja'au kelunan inah juk béé.

⁷ Kekat ha' tebaraa' éh benara' ké' pu'un éh bara' tong pengeloo' kenin Allah éh pelim jin kelunan lepah rai. Uban hun tana' iteu' to bé' jak pesuai neu' Néh sahau, pengeloo' kenin Néh tengéé' juk mihin lu' tong pengaren Néh.

⁸ Hun réh jam tong pengeloo' kenin Tuhan kenat sahau rai, adang réh bé' mematai Tuhan éh matek maren tong kayeu' salib.

⁹ Inah éh sin tong ha' lem surat Allah éh bara' ka', Éh bé' ta'an ngan éh bé' nenéng kelunan, ngan éh seneruh réh bé' omok pu'un, inah éh petenup Allah ngan kelunan éh pika Iah, ha' néh.

¹⁰ Bang uleu' jam éh, uban neu' penyukat Sahéé' Néh Allah pepoléng éh ngan lu', uban Sahéé' Néh éh pekelenaa' kekat ineu'-ineu' péh, pah avéé' tong éh dilem mu'un éh dalem pengeloo' Allah.

¹¹ Uban bé' pu'un séé'-séé' péh éh omok jam tong ineu' éh penyeruh kelunan éh jah, usah nah tengéé' awah éh jam éh, kenat péh Sahéé' Allah, Iah awah éh jam tong kenin Allah.

¹² Bé' Tuhan mena' pengejam éh jin tana' iteu' ngan lu', bang Iah mena' Sahéé' Allah nah ngan lu', dokoo' lu' omok nesen tong kekat pengena' Allah ngan lu'.

¹³ Bé' améé' nebaraa' kelunan neu' pengejam mé' tengéé', bang améé' nebaraa' réh neu' pengejam Sahéé' Allah. Kekat éh benara' Sahéé' Allah lem kenin mé', inah ke' éh benara' mé' ngan kelunan éh pu'un Sahéé' Allah.

¹⁴ Bang kelunan éh bé' pu'un Sahéé' Allah bé' éh omok alaa' ha' tebaraa' jin Sahéé' Allah, adang néh bé' omok nesen éh, uban kekat ha' tebaraa' inah palui awah tong iah, matek bé' éh omok jam tong néh, uban kekat inah Sahéé' Allah awah éh omok pekelenaa' éh.

¹⁵ La'ah kelunan éh bé' pu'un Sahéé' Allah, bé' iah omok petuneng kelunan éh pu'un Sahéé' Allah uban Sahéé' Allah awah éh jam pengeloo' kenin Tuhan.

¹⁶ Barei' ha' lem surat Allah bara', séé' omok jam tong kenin Tuhan? Séé' omok nebaraa' Iah, ha' Néh. Bang uleu' éh ngelan tong Tuhan omok lu' jam tong pengeloo' Néh ngan tong kenin Néh.