1 KORINTUS 16 - Rengah Jian

Pengena' réh dokoo' nolong Sidang Yudea

¹ La'ah tong jalan tipun rigit dokoo' nolong kelunan éh anah Tuhan tong Yudea, jian keh kivu pekua' barei' sohoo' ké' ngan kekat sidang tong tana' Galatia rai.

² Siget-siget Dau Migu, jian siget usah modoo' jelua' rigit kivu pekua' éh nalaa' néh dokoo' néh pu'un tenéh, uban bé' akeu' keloo' nyohoo' keh tipun éh hun ké' tuai kepéh.

³ Hun ké' tuai kepéh boh akeu' mena' surat ngan irah éh kevéléé' keh nyohoo' réh patet rigit éh pengena' keh inah tai Yérusalem.

⁴ Hun néh tekep usah ké' péh tai, boh irah omok kivu akeu'.

Éh juk neu' Paulus

⁵ Bang akeu' juk tuai tavin keh la'o ké' tai Makedonia, uban akeu' keloo' tai Makedonia tenah.

⁶ Akeu' juk lebéé' mokoo' ngan ka'ah, barang kelebéé' sioo' genin péh, boh ka'ah omok nolong patet akeu' semah-semah éh juk kelakau ké' la'o inah.

⁷ Bé' akeu' keloo' tai jam keh metok awah tovoo' ké' lapah sinah tai Makedonia. Akeu' ngelan akeu' omok mokoo' lebéé' ngan ka'ah temurei' kepéh, hun néh lem pengeloo' Tuhan kenat.

⁸ Bang akeu' juk mokoo' siteu' tong Épesus jak, avéé' Dau Pentakosta

⁹ uban na' péh pinaa' kelunan ngelawan siteu', pinaa' jalan ké' kepéh omok maneu' kereja' Tuhan siteu'.

¹⁰ Hun mah Timotius avéé' tong ka'ah, jian keh alaa' éh ngan jian kenin, uban iah péh maneu' kereja' Tuhan pekua' akeu'.

¹¹ Mai jah usah leko iah. Bang jian ka'ah nolong patet iah lakau ngan jian kenin, dokoo' iah omok tuai kepéh ngan ké', uban akeu' mena iah moléé' ngan kekat irah padéé' éh jah.

¹² La'ah tong padéé' uleu' Apolos, pinaa' koléé' ké' nyohoo' éh tai ngan keh kivu irah padéé' éh jah, bang bé' jak iah jam hun néh tekep éh tai hun iteu' ngan bé' péh. Bang hun mah éh pu'un bien adang iah juk angai.

Tong ga' ha' Paulus

¹³ Jian keh mavaa' mu'un, nekedéng petem dalem pengelan keh tong Tuhan, makang kenin mai medai, jian keh gahang.

¹⁴ Jian keh maneu' kekat kereja' keh neu' penika Tuhan lem kenin keh.

¹⁵ La'ah ka'ah jam tong Stepanus ngan irah panak néh, uban irah éh bu'un ngelan tong Tuhan tong tana' Akhaya ngan kekat kenin ngan usah réh irah nolong kelunan éh anah Allah. O kekat padéé' ké', akeu' nyohoo' ka'ah

¹⁶ jian keh kivu sohoo' kelunan éh kenat, kenat péh ngan séé'-séé' éh pemung kereja' ngan réh.

¹⁷ Murung kenin ké' uban Stepanus ngan Portunatus ngan Akaikus lepah avéé' siteu', réh teleu' inah papung kenin ké' uban ka'ah bé' pu'un.

¹⁸ Pu'un réh ngejian kenin ké' pekua' barei' réh teleu' ngejian kenin ka'ah rai. Kelunan éh kenat tekep lu' sepah réh.

¹⁹ Kekat sidang tong tana' Asia bara' tabi' ngan keh. La'ah Akwila ngan Priska ngan kekat kelunan éh petipun sebayang tong lamin roh bara' tabi' dalem Tuhan ngan keh.

²⁰ Kekat padéé' éh pu'un ngan ké' siteu', bara' tabi' ngan ka'ah. Jian ka'ah petabi' jah usah ngan jah usah.

²¹ Akeu' tengéé' éh nyurat ha' iteu'. Akeu' Paulus bara' tabi' ngan ka'ah.

²² La'ah kelunan éh bé' pika Tuhan, inah éh kenukum Tuhan. Maranatha, sin néh, Tuhan juk tuai.

²³ Jian penika ké' pu'un ngan ka'ah éh murip pemung ngan Kristus Yésus.

²⁴ Penika ké' dalem Kristus Yésus pu'un pemung ngan ka'ah béé.