1 KORINTUS 14 - Rengah Jian

Ha' tebaraa' kepéh tong pengena' Sahéé' Allah

¹ Uban pika éh pelapah ja'au jian keh mekat pitah penika Tuhan dokoo' keh omok pika kelunan, ngan alaa' pengena' éh jin Sahéé' Allah, pengena' Néh éh jian mu'un, inah éh dokoo' ka'ah omok bara' ha' tebaraa' Allah ngan kelunan.

² Kelunan éh omok pané palaa' kuraa'-kuraa' arong ha' éh bé' omok kejam kelunan, bang inah béé pengena' Sahéé' Allah ngan néh, bé' éh pané ngan kelunan, bang iah pané ngan Allah awah, uban kelunan bé' réh nesen ha' inah, uban neu' pengena' Sahéé' Allah pu'un iah bara' tong kuraa'-kuraa' rungen éh pelim.

³ Bang kelunan éh bara' ha' Tuhan ngan kelunan, jin ha' Tuhan benara' réh inah, pu'un éh omok ngereken pengelan réh, ngan papung kenin réh.

⁴ La'ah kelunan éh pané palaa' ha' éh bé' kejam kelunan uban inah pengena' Tuhan ngan néh, iah ngereken pengelan néh tengéé'. Bang kelunan éh bara' ha' Allah ngan kelunan éh jah, pu'un iah ngereken pengelan kekat kelunan tong sidang inah.

⁵ Akeu' keloo' ka'ah béé pané palaa' kuraa'-kuraa' arong ha' éh bé' kejam kelunan, bang pelapah jian kepéh, hun ka'ah pu'un pengena' Tuhan dokoo' omok bara' ha' Allah ngan kelunan. Uban kelunan éh omok bara' ha' Allah ngan kelunan, pelapah jian éh jin irah éh omok pané palaa' ha' éh bé' kejam kelunan. Bang hun pu'un kelunan sinah éh omok pekelenaa' kekat ha' néh, dokoo' ngereken sidang, boh éh jian.

⁶ O kekat padéé' ké', hun akeu' tuai tavin keh ngan pané ngan keh palaa' kuraa' arong ha' éh bé' kejam keh, ineu' gunah ké' pané kenat hun keh bé' nesen ha' ké'? Bang hun akeu' bara' tong ineu'-ineu' éh pepoléng Tuhan dalem kenin ké' tengéé' ngan bara' tong pengeloo' Néh ngan ha' tebaraa' Néh, boh éh pu'un gunah.

⁷ Keringot ngan sapé' ngan kekat éh jah éh omok miha' barei' inah, bé' kelunan omok jam ha' néh hun kelunan bé' jam metit éh mu'un. Kenat péh tong kelunan éh metit sapé.

⁸ Kenat péh tong kelunan éh metit gung, hun néh bé' metit éh mu'un, bé' kelunan jam petenup tai pekayau.

⁹ Kenat péh tong kelunan, kineu' jalan réh omok nesen ha' tebaraa' keh hun keh nebaraa' réh palaa' kuraa' arong ha' éh bé' kejam kelunan. Hun néh kenat adang keh pané ngan sawang awah.

¹⁰ Pinaa' arong ha' kelunan tong tana', kekat ha' néh béé pu'un sin.

¹¹ Bang hun akeu' bé' jam tong ha' kelunan inah, akeu' péh barei' kelunan éh tejeu' ngan néh, iah péh tejeu' tong akeu'.

¹² La'ah uban ka'ah gahang kenin juk alaa' pengena' Sahéé', jian keh pitah kekat pengena' Néh éh omok ngereken sidang.

¹³ Uban néh kenat jian kelunan éh pané palaa' kuraa' arong ha' éh bé' kejam kelunan, jian iah sebayang dokoo' iah omok alaa' pengena' jin Allah kepéh ke' néh omok jam pekelenaa' ha' inah.

¹⁴ Uban hun akeu' sebayang dalem jah arong ha' éh pengena' Allah ngan ké', mu'un akeu' sebayang palaa' sahéé' ké', bang bé' akeu' nesen tong ha' sebayang ké' inah.

¹⁵ Hun néh kenat kineu' éh kepéh? Adang akeu' juk sebayang palaa' sahéé' ké' ngan akeu' juk sebayang kepéh tong ha' éh kejam ké'. Akeu' juk nyanyi palaa' sahéé' ké' ngan akeu' juk nyanyi tong ha' éh kejam ké' kepéh.

¹⁶ Hun keh sebayang bara' jian kenin ngan Allah palaa' sahéé' keh awah, kineu' kelunan éh jah omok bara' Amin tong ha' ko' nah? Bé' iah nesen ineu'-ineu' tong ha' ko' sebayang nah.

¹⁷ Uban na' péh ha' sebayang ko' bara' jian kenin pu'un jian mu'un, bé' iah nesen éh, ngan bé' éh omok ngereken pengelan néh.

¹⁸ La'ah akeu' bara' jian kenin ngan Allah uban akeu' jam pané lem kuraa'-kuraa' arong ha' éh pengena' Allah ngan ké' pelapah pinaa' jin éh kejam ka'ah.

¹⁹ Bang dalem sidang, akeu' pelapah keloo' pané palaa' lemah ateng ha' awah éh omok kejam keh, dokoo' ké' nebaraa' kelunan, jin jah poloo' ibu ha' éh bé' omok kejam réh.

²⁰ O kekat padéé' ké' mai keh barei' penyeruh irah anak awah. Jian keh barei' anak éh tejeu' tong kesa'at, bang dalem kekat penyeruh keh jian keh barei' kelunan éh jam seruh mu'un.

²¹ La'ah pu'un jah ha' lem surat Allah, Ka' ha' Tuhan, Akeu' juk pané ngan irah éh anah ké', Akeu' juk pané ngan réh dalem kuraa' arong ha' kelunan éh jah ngan neu' kelunan éh tengéé' pohoo', na' péh kenat irah éh anah Ké' bé' réh keloo' menéng éh, ha' Néh.

²² Hun néh kenat hun keh omok pané palaa' kuraa' arong ha' éh bé' kejam kelunan, bé' éh pu'un kenat dokoo' nolong kelunan éh ngelan tong Kristus, bang inah éh dokoo' ngusii' kenin kelunan éh bé' ngelan. Bang pengena' Allah dokoo' keh omok bara' ha' Néh ngan kelunan, inah éh dokoo' nolong kelunan éh ngelan, bé' makat éh ngan kelunan éh bé' ngelan.

²³ Hun néh kenat hun kekat kelunan petipun boh kekat réh béé pané dalem kuraa'-kuraa' arong ha' éh bé' kejam kelunan, kelunan éh bé' pu'un pengena' inah, ngan kelunan éh bé' ngelan, hun réh masek kepéh ngan réh, kineu', bé' réh bara' ka'ah kelunan éh palui awah kei?

²⁴ Bang hun kekat kelunan sidang pu'un bara' ha' Allah, kelunan éh bé' ngelan ngan éh bé' pu'un pengena' inah, hun néh masek kepéh ngan réh, adang kelunan inah omok nesen tong penyala' néh neu' kekat éh nenéng néh nah. Adang kekat éh nenéng néh inah omok éh petuneng kenin néh.

²⁵ Kekat penyeruh néh éh pelim lem kenin néh lepah, pu'un éh poléng kepéh, adang iah ngerera' ngan seva' Allah ngan bara', Adang Tuhan Allah pu'un pemung ngan ka'ah siteu', ha' néh.

Tong jalan éh tekep kenivu tong Sidang

²⁶ O Kekat padéé' ké', kineu' sin tong ha' ké' inah? Hun ka'ah petipun, jian jah usah ngevéléé' nyanyi ngan jah usah kepéh bara' ha' tebaraa', ngan jah usah kepéh bara' ineu'-ineu' éh pepoléng Allah ngan néh, ngan jah usah kepéh bara' ha' Allah palaa' ha' éh bé' kejam kelunan, ngan jah usah kepéh bara' tong sin ha' kelunan inah. Bang tekep kekat néh béé naneu' ke' néh ngereken sidang.

²⁷ Hun pu'un irah éh juk pané palaa' ha' éh bé' kejam kelunan, jian duah teleu' usah pané, mai éh pinaa' ngan keliwah-liwah réh. Jian jah usah kepéh bara' sin ha' réh inah.

²⁸ Bang hun néh bé' pu'un kelunan sinah éh jam bara' tong sin ha' réh inah, mai réh pané tong petipun, jian réh pané lem kenin réh tengéé' bara' éh ngan Allah.

²⁹ Jian duah-teleu' usah éh alaa' ha' tebaraa' Allah bara' tong inah, jian irah éh jah seruh tong ha' réh inah.

³⁰ Bang hun pu'un jah kelunan éh jah éh pu'un petipun sinah alaa' jah ha' tebaraa' jin Allah, tekep kelunan éh pané keto nah ma'o.

³¹ Kekat ka'ah béé omok bara' ha' tebaraa' Allah ngan keliwah-liwah dokoo' kekat kelunan omok menéng ngan pekalai ngan ngereken kenin néh.

³² Kelunan éh pu'un pengena' Sahéé' Allah ke' néh omok bara' ha' Allah ngan kelunan, kejam néh seruh hun néh tekep néh pané ngan bé' péh,

³³ uban Allah bé' Iah tebai lu' dokoo' lu' maneu' kekat éh bé' tatu' bang Iah tebai lu' dokoo' lu' maneu' éh ngan jian. Pekua' éh pu'un dalem kekat sidang éh anah Allah,

³⁴ jian kekat redo mokoo' kelem mai kahut tong petipun. Barei' ha' lem Surat Musa pu'un bara', Tekep irah redo ngerera', mai réh pengeja'au.

³⁵ Hun irah juk neteng ineu'-ineu' péh, jian irah neteng lakei' réh tong lamin réh tengéé', uban bé' tekep irah redo ulak pané tong petipun.

³⁶ Ha' tebaraa' Allah bé' éh tuai jin ka'ah, ngan bé' éh ka'ah awah éh pu'un alaa' éh.

³⁷ Hun pu'un jah usah éh seruh iah kelunan éh sohoo' Tuhan ngan pu'un pengena' Allah, jian iah nesen kekat éh senurat ké' inah pu'un éh sohoo' Tuhan.

³⁸ Bang hun néh bé' keloo' mihau tong ha' ké' inah, mai keh mihau ha' nah kepéh.

³⁹ Uban néh kenat jian keh mekat pitah dokoo' keh omok bara' ha' Allah ngan kelunan, bang mai meta' kelunan pané palaa' kuraa' arong ha' éh bé' kejam irah.

⁴⁰ Bang tekep kekat néh béé pu'un naneu' ngan jian ngan kivu gaya' éh tatu'.