1 KORINTUS 12 - Rengah Jian

Tong pengena' Sahéé' Allah

¹ O kekat padéé' ké', tong kekat pengena' Sahéé' Allah lem kenin kelunan, bé' akeu' keloo' ka'ah bé' nesen éh.

² La'ah ka'ah jam hun ka'ah to bé' ngelan tong Tuhan rai, pu'un keh pakai butun, butun inah bé' éh jam pané, pu'un éh mihin keh tawang awah. Seruh keh jian-jian.

³ Kelunan éh pu'un Sahéé' Allah, bé' Sahéé' inah mihin éh menoo' Yésus. Ngan bé' pu'un jah usah éh omok bara', Yésus éh Tuhan ké', hun néh bé' najak Sahéé' Allah.

⁴ Pu'un kuraa'-kuraa' arong pengena' lem kenin kelunan bang Sahéé' Allah Iah éh mena' kekat néh béé.

⁵ Pinaa' jalan uleu' omok maneu' kereja' Tuhan, bang lem kekat néh béé uleu' maneu' éh ngan Tuhan éh jah awah.

⁶ Pu'un kuraa'-kuraa' pengena' Tuhan ngan kelunan ke' réh maneu' kereja' Tuhan, bang jah awah Tuhan, Iah éh mena' kekat néh béé lem kenin kelunan.

⁷ Siget usah pu'un jah pengena' Sahéé' ngan néh dokoo' néh nolong kekat kelunan.

⁸ Pu'un Sahéé' mena' penesen ngan jah kelunan, dokoo' kelunan inah omok bara' ha' Tuhan ngan kelunan éh jah kepéh. Tong kelunan éh jah kepéh, Iah mena' pengejam ngan néh, ke' néh omok jam tong ha' tebaraa' inah.

⁹ Sahéé' inah mena' pengelan ngan jah kelunan, tong irah éh jah kepéh, Iah mena' penyukat Néh ke' Néh omok peka'o kelunan éh sakit.

¹⁰ Sahéé' Allah inah mena' penyukat ngan jah kelunan dokoo' kelunan inah omok jam maneu' telana' éh ja'au. Ngan tong kelunan éh jah kepéh, Iah mena' penyukat Néh dokoo' kelunan inah omok bara' ha' Allah ngan kelunan. Ngan tong kelunan éh jah kepéh, Iah mena' pengejam Néh, dokoo' kelunan omok jam hun néh pengena' éh jin Sahéé' Allah mu'un, ngan hun néh jin pengelavo' awah péh. Tong jah kelunan kepéh, Iah mena' penyukat ngan néh dokoo' kelunan inah omok pané lem jah arong ha' éh bé' kejam kelunan. Ngan tong kelunan éh jah kepéh, Iah mena' penyukat Néh dokoo' kelunan inah omok jam ha' ané kelunan inah.

¹¹ Bang Sahéé' éh maneu' kekat inah, Iah jah awah, Iah mena' éh pekua' pengeloo' Néh tengéé' ngan siget-siget kelunan.

Usah Kelunan jah awah bang pinaa' arong lem néh

¹² Uban Kristus inah Iah barei' jah usah kelunan, bang pinaa' arong éh tong néh, barei' maten ngan ojoo' ngan gem, bang na' péh éh pinaa' arong kenat, usah néh jah awah.

¹³ Kenat péh kekat uleu' béé pu'un petem jah usah awah. Kenat péh irah Yahudi kenat péh irah éh tengéé' pohoo', kenat péh kelunan ripen, kenat péh kelunan éh bé' ripen. Sahéé' Allah éh maneu' uleu' petem jah awah, uleu' pu'un petem dalem Kristus neu' Sahéé' Allah éh jah awah, ngan Sahéé' Allah inah pu'un petem dalem kenin uleu' béé.

¹⁴ Uban bé' éh jah awah arong tong usah, bang pinaa' éh.

¹⁵ Hun gem lu' bara', Uban akeu' bé' ojoo' bé' akeu' pu'un tong usah, bé' éh maneu' gem bé' pu'un tong usah.

¹⁶ Ngan hun kelingen lu' bara', Uban akeu' bé' maten, bé' akeu' pu'un tong usah, bé' éh maneu' kelingen bé' pu'un tong usah.

¹⁷ Hun kekat usah barei' maten awah, kineu' jalan kelunan menéng? Hun kekat usah barei' kelingen awah, kineu' jalan kelunan marek ba'oo'?

¹⁸ Bang Allah lepah maneu' kekat néh béé tong usah, siget-siget arong néh pu'un tong usah, pekua' éh pengeloo' Néh.

¹⁹ Hun Néh suai kekat tong usah jah arong awah, semah usah néh?

²⁰ Mu'un péh pinaa' arong éh tong usah, bang usah jah awah.

²¹ La'ah maten bé' omok bara' ngan ojoo', Akeu' bé' pu'un gunah tong ka'au', ngan ulun bé' omok pané ngan gem, Akeu' bé' pu'un gunah tong ka'au'.

²² Makin péh kekat arong dalem usah éh layan néh pu'un lemoo', bang gunah mu'un éh.

²³ Kekat arong dalem usah éh seneruh uleu' kurang jian, uleu' mihau éh mu'un, ngan kekat éh kenenyaa' lu' ta'an kelunan éh jah, uleu' mavaa' éh mu'un.

²⁴ Bang kekat arong éh tong usah lu' éh jian layan, bé' lu' mavaa' éh kenat. Bang Allah lepah pepemung éh tong usah, ngan kekat arong dalem usah éh layan néh barei'-okoo' kurang, Iah maneu' éh dokoo' kelunan mihau éh mu'un.

²⁵ Kenat péh bé' pu'un ineu'-ineu' éh petengéé' Néh tong usah, bang kekat arong tong usah nolong ngan petolong kekat-kekat éh jah.

²⁶ Hun jebila' usah lu' sakit, ketem lo'ong usah lu' sakit béé, ngan hun jebila' usah lu' pu'un kenajung, ketem lo'ong usah lu' murung kenin.

²⁷ La'ah kekat ka'ah usah Kristus, ngan siget-siget usah keh barei' jah arong éh tong usah Néh.

²⁸ La'ah dalem sidang, pu'un Allah lepah mena' kuraa' kelunan ke' réh kereja' tong sidang inah. Éh bu'un irah lawah Néh, éh keruwah néh, irah nabi, éh keteleu' néh, irah guru, la'o inah kelunan éh jam maneu' telana' éh tejeu', la'o inah kelunan éh peka'o kesakit kelunan palaa' penyukat Tuhan, la'o inah irah éh nolong kelunan éh jah, ngan la'o inah kepéh kelunan éh omok pané ngan kuraa' arong ha' éh tejeu'.

²⁹ Bé' éh kekat réh béé éh lawah Tuhan, ngan bé' éh kekat réh béé nabi, ngan bé' éh kekat réh béé éh guru. Bé' makat kekat réh béé éh maneu' telana' éh tejeu',

³⁰ ngan peka'o kelunan éh sakit, ngan pané lem kuraa' arong ha' éh tejeu', ngan bara' tong ha' inah kepéh, bang jelua' réh awah éh omok maneu' kenat.

³¹ Bang jian keh mekat pitah kekat pengena' Néh éh pelapah ja'au. Bang akeu' juk nojoo' jah jalan éh mu'un ngan keh, inah éh hun penika inah pu'un dalem keh.