1 KORINTUS 10 - Rengah Jian

Tong tebaraa' éh meta' kelunan maneu' butun

¹ O kekat padéé' ké', akeu' keloo' ka'ah seruh kepéh tong kekat tepun uleu' éh kivu Musa musit jin tana' Mesir rai, Tuhan mihau kekat réh béé, avun éh telana' penyukat Néh pu'un ngan réh, ngan Iah majak réh palaa' avun inah. Kekat réh béé papit baa' Kelosom.

² Iteu' barei' réh pu'un batis ke' réh kivu Musa.

³ Seruh keh jian-jian, na' péh kekat réh béé piso jin tana' Mesir ngan pu'un kuman penguman éh nena' Tuhan nah,

⁴ ngan mesep baa' éh musit jin bateu' éh nipok Musa rai, bé' Tuhan jian kenin ngan réh. Bateu' éh jalan baa' musit nah, ha' tapan tong Kristus.

⁵ Na' péh irah kuman ngan mesep kenat bé' réh ngepayoo' kenin Allah. Uban néh kenat pinaa' réh matai ngan purat-purat awah tong tana' pegawa nah.

⁶ Seruh jian-jian, iteu' barei' jah tena' ngan uleu' kepéh. Jian uleu' mavaa' mu'un-mu'un dai uleu' pu'un barei' irah inah ngan magat tong kekat éh sa'at.

⁷ Pu'un réh seva' ngan pakai butun. Bé' réh seva' Tuhan. Barei' éh benara' Tuhan lem Surat Allah nah, ka' ha' Néh, pu'un réh mokoo' kuman ngan mesep, ngan betéé' tai sayau éh sa'at seva' butun inah, ha' Néh.

⁸ Mai lu' maneu' barei' irah. Jelua' réh petuyang, ngan dalem jah dau awah, duah poloo' teleu' ibu réh matai kenukum Tuhan. Mai uleu' petuyang barei' irah inah.

⁹ Mai uleu' tupat Tuhan barei' irah, éh teneng kenukum Tuhan éh matai ga'at torok.

¹⁰ Mai lu' pané selem barei' jelua' irah inah éh penatai meliket.

¹¹ Kekat inah pu'un tong irah Israel ke' néh omok jah telana' ngan kelunan éh jah, ngan pu'un éh senurat dokoo' lu' jam mavaa' kepéh, uban uleu' murip sioo' tai ga' tana'.

¹² Uban néh kenat kelunan éh seruh iah jam nekedéng tengéé', jian iah mavaa' dai néh pelohoo' kepéh.

¹³ Kekat penupat éh teneng tong keh, bé' éh tengéé' jin éh teneng tong kelunan éh jah. Bé' Tuhan piso kenin jin kekat jajii' Néh, ngan bé' Iah kejeraa' keh teneng tong tenupat éh maneu' keh bé' omok ngeretep. Bang tovoo' keh teneng tenupat kenat, Iah pu'un ngegahang kenin keh dokoo' keh omok ngeretep, ngan Iah maneu' jalan ngan keh dokoo' keh omok kelap.

¹⁴ O kekat bakéh ké' éh penika ké', uban néh kenat jian keh ngejuu' usah keh jin kekat butun, mai keh pakai éh kepéh.

¹⁵ Akeu' pané ngan keh barei' ngan kelunan éh jam seruh, ka'ah tengéé' seruh tong ha' ké' inah.

¹⁶ Baa' éh nesep lu' tong penguman éh sohoo' Tuhan éh jalan Tuhan mena' pengejian Néh tong néh ngan éh nalaa' lu', uleu' mesep éh ngan bara' jian kenin ngan Néh. Neu' lu' mesep éh, inah lu' pepoléng lu' pu'un pemung ngan Kristus lem pengematai Néh. Kenat péh tong roti éh nutip lu', hun lu' kuman éh, inah lu' pepoléng lu' pu'un pemung ngan Kristus lem usah Néh.

¹⁷ La'ah roti inah jah lugung awah, la'ah na' péh uleu' pinaa', uleu' jah usah awah, uban uleu' béé pu'un kuman jin roti éh jah lugung inah.

¹⁸ Seruh keh tong irah Yahudi. Kelunan éh kuman sin ka'an éh nena' réh ngan Tuhan tong jalan réh motong ka'an nah, kelunan inah pu'un seva' Tuhan neu' kekat penganeu' réh tong jalan inah.

¹⁹ Kineu' sin tong ha' ké' kenat? Kineu' butun ngan ka'an éh nena' réh ngan butun inah, pu'un gunah réh maneu' éh kenat kei?

²⁰ Bé' Bang inah ha' ké', ka'an éh peliwa kelunan éh ngebalei', irah peliwa éh ngan balei', bé' éh ngan Allah. Ngan bé' akeu' keloo' ka'ah pekua' kenin ngan balei'.

²¹ Ka'ah bé' omok mesep baa' jin sawan Tuhan pemung ngan sawan balei'. Ka'ah bé' omok kuman roti éh nena' Tuhan pemung ngan anah balei' kepéh.

²² Kineu', pu'un keh juk metéé' kemerek Tuhan? Kejam uleu' Tuhan pelapah gahang jin uleu'.

²³ Pu'un kelunan éh bara', Omok mé' maneu' ineu'-ineu' péh, bé' pu'un ineu' éh meta' améé' kenat, ha' irah jelua'. Oo', mu'un, bang bé' éh kekat néh béé éh pu'un jian. Omok lu' maneu' ineu'-ineu' bang bé' éh kekat néh béé éh ngereken kenin lu'.

²⁴ Bé' tekep kelunan kivu pengeloo' kenin néh tengéé', tekep éh kivu pengeloo' kelunan éh jah.

²⁵ Omok keh kuman ka'an ineu'-ineu' éh nelih réh tong kedai, bang mai keh neteng kineu' penganeu' réh tong néh dai keh tusah kenin seruh éh.

²⁶ Uban pu'un jah ha' lem surat Allah éh bara', Tuhan éh pu'un tana' iteu' ngan kekat éh dalem néh, ha' Néh.

²⁷ Hun pu'un kelunan éh bé' ngelan tong Tuhan tebai ka'ah kuman, jian keh tai ngan kuman ineu'-ineu' éh nena' néh ngan keh, bang mai keh neteng kineu' penganeu' néh tong néh dai keh tusah kenin seruh éh.

²⁸ Bang hun néh pu'un bara', Pu'un mé' peliwa ka'an inah ngan butun, mai keh kuman éh dai keh petawang kelunan éh pané kenat ngan keh, ngan tusah kenin keh seruh éh kepéh.

²⁹ Éh mu'un bé' makat ka'ah éh tusah kenin, bang irah éh jah pu'un tusah kenin kepéh. Barang pu'un kelunan éh bara', Hun néh bé' pu'un ineu' éh meta' ku' kuman éh, kineu' ku' bé' omok kuman éh hun néh kelunan éh jah éh tusah kenin.

³⁰ Hun akeu' bara' jian kenin ngan Tuhan tong ka'an éh nena' Néh ngan ké', kineu' kelunan pesala' akeu' tong ké' kuman ka'an hun ké' bara' jian kenin ngan Tuhan, ha' néh.

³¹ Uban néh kenat dalem kekat penganeu' keh, hun keh kuman hun keh mesep péh, maneu' éh béé-béé dokoo' peparen Allah.

³² Dalem kekat pengurip keh, mai keh maneu' ineu'-ineu' éh omok petusah kenin irah Yahudi kenat péh petusah kenin irah éh tengéé' pohoo', kenat péh petusah sidang Allah péh.

³³ Jian keh maneu' barei' akeu'. Akeu' tupat ngepayoo' kenin kekat kelunan dalem kekat kereja' ké', bé' ku' pitah jalan dokoo' ngepayoo' kenin ké' tengéé', dokoo' ké' omok mihin réh alaa' urip jin Tuhan.