TAGA-EFESO 5 - Maung a Balita Biblia

Say Panagbilay ed Liwawa

¹ Alig yo so Dios, bangta anak to kayon inararo.

² Mambilay kayon maaro a singa si Cristo; lapud panangaro tod sikatayo, inter ton para sikatayo so bilay to, sakey ya ambalingit a bagat tan rigalo a makapaliket ed Dios.

³ Lapud totoo ki lay Dios, ag nepeg ya anggan nabitla labat ed pegley yo so pikakaloguran, kabandayan, o inkaagom.

⁴ Mabanday met ya agamilen yoy marotak, maoges iran salita, tan say andikakanaan a panaglurey. Ingen, misalamat kayod Dios.

⁵ Ag yo panduaduaruwaan ya anggapon balut so pinanabang ed Panarian nen Cristo tan say Dios iray totoon mikakaloguran, manggagaway mabanday, tan maagom (ta say kinaagom et sakey a klasiy panangigalang ed dios).

⁶ Ag yo aabuloyan a napalikdo kayoy siopaman diad panamegley na andi-kakanaan iran salita, ta sarayan gawa so makasengeg na pampasnuk na Dios ed saray totoon ag ontotoluk ed sikato.

⁷ Kanyan ag ki mibabalid saratan a klasiy totoo.

⁸ Wala kayo nen saman ed bilonget, balet lapud totoo ki lay Katawan, wala ki lad silew. Kanyan mambilay kayo ed nepeg a pambilay da ray totoon walad silew.

⁹ Ta say silew so mangiiter na amin a klasi na kamaungan, katonungan, tan katwaan.

¹⁰ Aral yo no antoy makapaliket ed Katawan.

¹¹ Ag kayo mibabalid andi-kakanaan iran gagawaen na totoon walad bilonget, no ag ingen iparontal yo rad silew.

¹² (Ta talagan mabambanday ya anggan bitlaen labat so gagawaen dad amut.)

¹³ No amin a bengatla et niparontal ed silew, nanengneng so petepeteg a kipapasen da;

¹⁴ ta amin a naliliwawaan et magmamaliw a silew. Kanyan onyay kuanda, Bangon ka, sikan nanaogip, bangon kan manlapud patey, silewan to ka nen Cristo.

¹⁵ Kanyan api-apiger yoy panagbilay yo. Mambilay kin singa saray makabat, aliwan singa saray makulang-kulang.

¹⁶ Anamut yoy pankanawnawa yon manggaway kamaungan, ta maoges so kiwas na bilay diad sarayan agew.

¹⁷ Nepeg ya aliwa kayon singa saray makulang-kulang, no ag ingen talusan yo no antoy labay na Katawan a pagawad sikayo.

¹⁸ Ag ki mambuebuek na alak, ta manderal labat ed sikayo; pampelengan yo ingen so kapano yoy Ispiritu.

¹⁹ Mantotongtong kayod panamegley na saray salmo, imno, tan diniriyos a kanta. Kantaan yoy imno tan salmo so Katawan, tan impapusoy pangigalang yod sikato.

²⁰ Lapud amin a bengatla, misalamat kayo lawas ed Dios Ama, diad ngaran na Katawan tayon Jesu-Cristo.

Saray Bilin ed saray Sanasawa

²¹ Manoonuran kayo ta sikato yay pakanengnengan na pangigagalang yod Cristo.

²² Bibii, toluk kayod kaasawaan yo, a singa katotoluk yod Katawan.

²³ Ta say laki et pangulo na asawa to, a singa si Cristo et pangulo na iglisia. Si Cristo met so Manangilaban na iglisia a laman to.

²⁴ Kanyan no panoy itotoluk na iglisia ed Cristo, ontan met a saray bibii nepeg day ontoluk diad amin a bengatla ed saray kaasawaan da.

²⁵ Lalaki, aro yoy kaasawaan yo, a singa panangaro nen Cristo ed iglisia. Inter ton para iglisia so bilay to.

²⁶ Ginawa to ya pian napasanto toy iglisia, kasumpal ton linisan diad panamegley na danum tan salita,

²⁷ pian niparontal tod sikaton dili so iglisia--marakep, anggapoy mansa o komanet to, masanto, malinis, tan anggapoy pakabalawan.

²⁸ Nepeg ya aroen na lalaki so kaasawaan da a singa panangaro rad laman dan dili.

²⁹ Anggapoy toon bosulen toy laman ton dili. Ingen, pakanen tan pablien to, a singa gagawaen nen Cristo ed iglisia;

³⁰ ta kabyangan itayo na laman nen Cristo.

³¹ Onung na ibabagay Masanton Sulat, Lapud saya, taynan na laki so ama tan ina to, tan iyamung toy asawa to, tan magmaliw iran saksakey a laman.

³² Walay baleg a katwaan ya ipapaamta na sayan partiy Masanton Sulat, tan amtak a say kipapasen nen Cristo tan say iglisia so kipaakaran to.

³³ Balet sikayo met so kipaakaran to: balang laki nepeg ya aroen toy asawa to a singa panangaro tod sikaton dili, tan balang bii nepeg a galangen toy asawa to.