Sofonias 3 - Maung a Balita Biblia

Say Kasalanan na Jerusalem tan say Karondon to

¹ Pakaskasi so Jerusalem, saman a siudad a napno na karotakan, tan mananumpa a papairapen to ray dilin totoo to.

² Ag to dinmengel ed Katawan odino inawat so panametek to. Ag nanmatalek ed Katawan odino kinmerew na tulong to.

³ Singa mangwam a lion iray opisyal to; singa narasan ya asod katakelan iray huis to, a diad gaway inkaagom to et ag to nataynan ya anggad kabwasan so pokel.

⁴ Anggapoy kalakal, managtraidor iray propita; dodotakan na saray papari so bangatlan masanto, tan pipikeweten day ganggan na Dios, pian naala ray labay da.

⁵ Balet wala nin siansiad siudad so Katawan; say kamaungan so gagawaen to lawas ya aliwan say kaogsan. Kapag kabwasan ya ag balut nasaew, gagawaen toy katonungan ed saray totoo to. Balet itutuloy na saray totoon maoges so panggagawa ray kaogsan tan ag ira ambaing.

⁶ Say Katawan kuanto, Pinaandik ya amin iray bansa; dineral ko ray siudad da tan tinaynan kon aderal-deral iray padir ta saray tori ra. Ataynan iray siudad; anggapoy onkitakitaw ed saray dalananggapoy anggan sakey a toon nakdaan.

⁷ Ninunot kod saman ya ag la pigan saray totook et pagalangan da ak tan awaten day panametek ko, tan ag dan balut nalingwanan iray imbangat kod sikara. Balet ag abayag maoges lamet so kagagawa ran singa gendat.

⁸ Alagar yo ak sirin, kuay Katawan. Alagar yoy agew ya akusaen ko ray bansa. Tinibokel ko lad kanunotan ko a tiponen iray bansa tan saray nanarian, pian ipaliknak ed sikara so biskeg na pasnuk ko. Natemek ed apoy na pasnuk ko so intiron mundo.

⁹ Insan ko pasimbaloen iray totood saray bansa, tan mampikasi rad siak labat ya aliwan diad saray diriyos, tan siak labat so panlingkuran dan amin.

¹⁰ Anggan saray totook a nikaykayat ed arawin pasen na Sudan et mangyakar irad siak na saray bagat.

¹¹ Diad satan a panaon, sikayo ran totook et ag yo la nakaukolan so ombaing ed siak, ombaing lapud samay insumpa yod siak. Paekalen koy balang toon mapaatagey, et diad ontan ag yo ak lan balut labanan ed tapew na masanton palandey ko.

¹² Mangikera ak diman na mapaabeba ran totoo ya onsingger iran onkerew ed siak na tulong.

¹³ Saray totood Israel ya apaliisan day patey et ag la ra manggaway maoges ed kapara ran too, ag la ra mantila, odino mamalikdo na arum a totoo. Onaligwas ira tan niarawi rad kaatapan, ya ag la ra antakot ed siopaman.

Say Kanta na Liket

¹⁴ Mankanta tan eyag kayod liket, sikayon totood Israel! Manggaya kayod intiron puso yo, sikayon totood Jerusalem!

¹⁵ Pinatonda na Katawan so dusa yo; pinaandi ton amin iray kalaban yo. Kaolup yo so Katawan ya ari na Israel; anggapo la natan so nepeg yon takotan.

¹⁶ Onsabiy panaon ya ikuandad Jerusalem, Ag ka natatakot, siudad na Sion! Ag mo palalaylayen iray taklay mo!

¹⁷ Walad sika so Katawan a Dios mo; panaloen ka na pakayari to. Manliket so Katawan ed sika, tan lapud panangaro to itdan to kay balon bilay Mankanta tan manliket ed sika,

¹⁸ manliket a singa saray totoon manliliket ed pista. Say Katawan kuanto, Pinatondak lay tatakotan yon dusa tan inekal koy inkaplag yod kababaingan.

¹⁹ Onsasabi lay panaon! Dusaen ko ray mamapairap ed sikayo; Iyagel kon amin iray piley tan isempet ko ray nibantak ed arum a bansa. Pagmaliwen kon kagalangan so impakabaingan da, tan dayewen ira na intiron mundo.

²⁰ Onsasabi lay panaon! Pasempeten ko ray totoo yon nikaykayat; pagmaliwen ta kayon bantug ed intiron mundo tan paaligwasen ta kayo lamet. Say Katawan so nansalita.