Sofonias 1 - Maung a Balita Biblia

¹ Sikato yay salita ya inter na Katawan ed kinen Sofonias legan na panaon ya arid Juda si Josias a lakin anan nen Amon. (Si Sofonias et anak nen Cusi tan apo nen Gedalias. Si Gedalias et anak nen Amarias tan si Amarias anak nen Ari Ezekias.)

Say Agew na Panintinsia na Katawan

² Say Katawan kuanto, Sigput kon deralen ya amin iray bengatlan walad tapew na dalin,

³ amin a totoo tan amin ya ayayep, amin a manok tan amin a sira. Iyakar koy pakapelag da ray totoon maoges. Deralen koy amin a katoowan, et anggapon balut so nakeraan a mabilay. Siak, say Katawan, so nansalita.

⁴ Dusaen ko ray totood Jerusalem tan amin a totood Juda. Paandipaten kod man ya amin iray pakanengnengan na panangigalang ed kinen Baal, et anggapo lad satan so makanunot ed anggan siopan parin manlilingkur ed sikato.

⁵ Pateyen koy toon oonlad toktok na abung a mangigalang ed agew, bulan, tan saray bitewen. Pateyen ko met iray mangigagalang ed siak, tan mansasamban matoor ed siak, balet kabekta mansamba ra ed ngaran na dios a Moloc.

⁶ Pateyen ko ray angibeneg ed siak, tan ag da ak la totombuken, saray ag onsisingger ed siak odino papaiwanwan ed siak.

⁷ Asingger lay isabi na agew ya onyorung a manintinsia so Katawan, kanyan mandeen kayo ed arap to. Ipaparaan na Katawan ya ibagat iray totoo to tan binagaan to ray kalaban a manamsam ed kayamanan na Juda.

⁸ Kuay Katawan, Diad satan ya agew a pambagat, dusaen ko ray opisyal, saray lalakin anak na ari, tan amin da ray mangaalig na ogali na saray arum a bansa.

⁹ Dusaen kon amin iray mangigagalang a singa saray pagano tan mantatakew tan mampapatey ira, pian napano ra na sinamsam so abung na amo ra.

¹⁰ Diad satan ya agew, kuay Katawan, narengel yoy akisan ed Puirta na Sira ed Jerusalem. Narengel yoy panogaogan ed balo-balon parti na siudad tan say baleg ya ungol na katebag na kapokdulan.

¹¹ No narengel yo ra ya, akis tan managogul kayo, sikayon manaayam ed abeban parti na siudad, ta ompatey ya amin iray nigosianti!

¹² Diad satan a panaon mangala ak na lamparaan, ta sokimaten koy Jerusalem. Dusaen ko ray totoon singa ag ompatepatey tan mataletalek a kuandad sikaran dili, Ag manggawa na maung odino maoges so Katawan.

¹³ Nasamsam iray kayamanan da tan naderal iray kaabungan da. Ag iran balut makapanayam ed abung ya ipapaalagey da odino natawayan so alak a manlapud itatanem dan kaubasan.

¹⁴ Asingger lan onsabi so baleg ya agew na Katawanmagano la tan masigsiglat ya onsasabi! Makapasinagem itan ya agew, ta anggan saray sankasebegan a sondalo et onakis ira na ampaipait!

¹⁵ Sakey ya agew na sanuk, agew na gunigon tan kaermenan, agew na deral tan bagbag, agew ya ambilonget tan mayemyem, agew ya andeket tan malorem,

¹⁶ sakey ya agew ya apaknul iray trumpitan manawag na bakal, tan maneyaeyag iray sondalon ondodogpad saray padir na siudad tan saray atatagey a tori.

¹⁷ Say Katawan kuanto, Iyakar ko yan deral ed saray katoowan, pian balang sakey et kumarapas a singa bulag. Nankasalanan irad siak, kanyan natan naibung a singa danum so dala ra, kitongilang a naboboluk ed dalin iray bangkay da.

¹⁸ Diad agew a pangidapoy Katawan na pasnuk to, ag ira nilaban na anggan amin a pilak tan balituk da. Deralen na apoy na sanuk to so intiron mundo. Bigla ton panganggaen so balang sakey a manaayam ed tapew na dalin.