Saray Tagleey 1 - Maung a Balita Biblia

Saray Kaermenan na Jerusalem

¹ Agaylay ermen na Jerusalem a gendat a napnoy totoo! Gagalangen na sankamundoan nen saman, balet singa biin balo so kipapasen to natan; Sankarakpan nen saman ed saray siudad, balet aripen so nagmaliwan to.

² Mannangnangis lawas; managagos ed aping toy lua. Diad amin da ray angaaro ed sikato nen saman, anggapoy manligliwa ed sikato ya anggan sakey ed sikara. Nantraidoran na saray kagampi to tan kalaban to ran amin natan.

³ Saray totood Juda et pangaskasiyan iran aripen; apasoot iran manlingkur ed arawi. Manaayam irad saray sananey a dalin; anggapoy pasen a natawag dan kayaryan. Ag ira makabatik, lapud alakub ira na saray kalaban.

⁴ Anggapo la natan so oonlad Timplo a mangigalang no agew iran masanto. Saray bibiin kumakantad man et maniirap ira tan manayay labat iray papari. Begtebegtew la ray puirtay siudad tan pangasikasiyan so Sion.

⁵ Nampalabo ray kalaban to; sikato lay walad silong na pakayari ra. Paniirapen na Katawan, lapud amin ya amayamay a kasalanan to; Anggan saray ogogaw adakep ira tan sikaray inaawit na kalaban da.

⁶ Say kagalangan na Jerusalem naandi la. Saray pangulo to singa ra saray ulsan makapkapoy lad eras, A ngalngali la naandiay biskeg legan ton ibabatikan iray umaanup.

⁷ Natan ta aderal-deral lay Jerusalem, nudnunoten toy kagalangan to nen saman. Anggapoy ontulong ed sikato nen sikatoy naplag ed lima da ray kalaban; Elek-elekan na saray anakep ed sikato lapud inkatalo to.

⁸ Mapalalon kaogsan so ginawa na Jerusalem, kanyan sikatoy adotakan. Balbalawen la natan na saray mangidadayew ed sikato, lapud anengneng dan alakseban. Manayay tan isasanib toy lupa to lapud kababaingan.

⁹ Sankanengneng so inkarotakan to, balet anggapoy walad sikato so agawad sikato. Makapasinagem so inkaplag to; anggapoy manligliwad sikato. Analo ray kalaban to, tan kekerewen to a kasian na Katawan.

¹⁰ Sinamsam na saray kalaban iray amin a kayamanan to. Anengneng to ran linmoob ed Timplo, a say dalem to et insebel na Katawan a looban na saray Hintil.

¹¹ Manayay iray totoo to legan dan manaanap na naakan da; Isasalat dad nakan so kayamanan da, pian napabiskeg ira. Imano mo ak, Katawan, eyag na siudad; nengneng mo pay pangaskasiyan a kipapasen ko.

¹² Nengneng yo ak, eyag na siudad ed balang ondadalan. Anggapoy singa siak diad panliliknak na kairapan, Say kairapan ya impalikna na Katawan ed siak nen ampetang so olo to.

¹³ Manlapud tagey angipelag na apoy tan pinoolan toy dalem ko. Pinatitan to ak, et nipatumba ak. Insan to ak inkaindan, tan tinaynan to ak a nanairapan.

¹⁴ Inlista ton amin iray kasalanan ko, insan to ra binerber ya amin; Imbitin to ra ed beklew ko, et kinmapoy ak lapud saya. Impalima ak na Katawan ed saray kalaban ko, tan siak so sarasarag da.

¹⁵ Inelekan na Katawan ya amin iray makapanyarin sondalok; Angibaki na saray sondalon ondogpa ed siak tan maneral ed saray lalakin tobun-balo. Minekmek to ray sankaabigan a totook a singa kapepespes na saray ubas ed panagpespesan.

¹⁶ Sikato yay makasengeg no akin et managagos ed matak so lua. Anggapoy nayarin manligliwad siak; anggapoy makaiter ed siak na biskeg na linawa. Tinalo ak na saray kalaban; saray totook anggapoy nakdaan a kayaryan da.

¹⁷ Inyonat ko ray limak, balet anggapoy ontulong ed siak. Anawag ed kaliber-liber so Katawan na saray onlaban ed siak. Marotak a bengatla so pangipapasen dad siak.

¹⁸ Maptek so Katawan, ta sinumlang ko ray salita to. Dengel yo ak, totood inerman a pasen; nengneng yoy paniirap ko. Nalan priso iray tobun-balon bibii tan lalaki.

¹⁹ Tinmawag ak ed saray kagampik, balet ag da ak tinulongan. Inaatey ed dalan iray papari tan saray pangulo, Legan a manaanap ira na naakan, pian ombiskeg ira.

²⁰ Nengneng mo ak pa, O Katawan, ta nagugunigon ak; maguloy kamarerwak! Ngalngali ombetag so pagew kod ermen lapud nankakasalanan ak. Wala ray pateyan et daladalan, tan anggan diad dalem na kaabungan walay patey.

²¹ Dengel mo pay panayay ko; anggapoy manligliwad siak. Panliketan na saray kalaban ko so impangiter moy gunigon ed siak. Ipasabim pa la may agew ya insipan mo; panirap mo pa ray kalaban ko a singa paniirap ko.

²² Sintinsiaan mo pa ray dusa lapud saray kaogsan da; Dusam ira a singa impanusam ed siak, lapud saray kasalanan ko. Mapalaloy panayay ko, tan ansakit so pagew ko.