Saray Salmo 74 - Maung a Balita Biblia

Pikekerew na Pakaiyagel na Intiron Bansa

¹ O Dios, akin et onyay impangikaindan mod sikami? Ag manganggay pasnuk mod saray dilin totoom?

² Nunot mo pa ray totoom ya abayag mo la ran pinili a kayaryan mo, saray totoon inagwat mod impakaaripen da, pian magmaliw iran dilin tribum. Nunot mo pay Palandey na Sion a nanayaman mo nen saman.

³ Batak mo pa ra yay amin ya aderal-deral; dineral na saray kalaban mi iray amin a walad Timplo!

⁴ Naneyag ed Timplom iray kalaban mo lapud impanalo ra; inlira dad man iray bandira ra a tanday impanalo ra.

⁵ Nengneng day totoon sankaegnaan da ray wasay a pamabatang day kakiewan.

⁶ Saray wasay tan saray martilyo ra so impangigegeba rad saray tablan akortian.

⁷ Dineral tan pinoolan day Timplom; ag da pinagalangan so pasen a pangigagalangan ed sika.

⁸ Nampapaknaan dan sigput da kamin deralen; pinoolan dan amin iray masanton pasen ed bansa.

⁹ Naandipat lan amin iray masanton tanda mi; anggapo lay atilak a propita, et anggapoy makaamta no kapigan mansumpal ya.

¹⁰ Kapigay pangangga, O Dios, so pamabalaw ed sika na saray kalaban mi? Anggad angga so panlelemlemew dad ngaran mo?

¹¹ Akin et ag mo labay a tulongan kami? Akin et mantantanyareg ka labat?

¹² Balet, O Dios, nanlapu lad gapo sikay ari mi; amimpiga-pigan inyagel mo kami.

¹³ Binelsay moy dayat lapud ontan lan pakayarim, tan binebetag moy kaolowan da ray dragon ed dayat;

¹⁴ minemekmek mo ray olo nen Libiatan tan intir moy laman ton kanen na saray ayayep ed kalawakan.

¹⁵ Pinapaagos mo ray sobul tan saray kolus; pinapaekat mo ray ankakabaleg ya ilog.

¹⁶ Pinalsam so agew tan say labi; inliram so agew tan say bulan ed kawalaan da;

¹⁷ sikay angyan na saray ketegan na mundo; ginawam so tiagew tan say nepnep.

¹⁸ Balet, Katawan, nunot mo a babalawen da ka na saray kalaban mo; totoo ran anggapoy Dios tan lelemlemewen da ka.

¹⁹ Ag mo pa papaolyan iray pangaskasiyan a totoom ed saray maruksan kalaban da; ag mo pa lilingwanan iray totoom a napapairap!

²⁰ Nunot mo pay impisipanan mod sikami. Walay karuksaan a nagagawad amin ya ambilonget a sokung na dalin.

²¹ Ag mo pa iyaabuloy a nabaingan iray napapairap; iyabuloy mo pan idayew ka na sarayan mairap-bilay tan saray walad pankaukolan.

²² Talindeg ka pa, O Dios, tan iyagel moy katonungan mo! Nunot mo a saray totoon anggapoy Dios et babalawen da ka lawas.

²³ Ag mo pa lilingwanan so paneeyag da ray kalaban mo, say ag manondan paniingal da ray kalaban mo.