Saray Salmo 3 - Maung a Balita Biblia

Say Pikekerew na Tulong no Kabwasan

¹ Amayamay iray kalaban ko, Katawan dakerakel iray onsusumpad siak!

² Tongtongtongen da ak tan kuanda, Ag tulongan na Dios.

³ Balet sika Katawan, sasalimbengan mo ak lawas, pian niarawi ak ed kaatapan; panataloen mo ak tan pabibiskegen moy linawak.

⁴ Ontatawag ak na maksil a patulongan ed Katawan, tan manlapud masanton palandey to, eebatan to ak.

⁵ Ondorokul ak tan naoogip ak, et maung so ibabangon ko, ta say Katawan iyaagel to ak.

⁶ Ag ko antakot iray libo-libon kalaban ko a manlalakob ed siak.

⁷ Gala pa, Katawan! Ilaban mo ak, O Dios ko! Dudusaen mon amin iray kalaban ko, tan eekalan mo ray pakayarin mamasakit ed siak.

⁸ Say kilalaban manlalapud Katawan bindisionan to komun iray totoo to.