Saray Salmo 130 - Maung a Balita Biblia

Pikekerew na Tulong

¹ Manlapud kaaraleman na inkaekalan koy ilalo, ontatawag ak ed sika, Katawan.

² Dengel mo pay tagleey ko, Katawan, talineng mo pay ikekerew koy tulong!

³ No inlistam iray kasalanan mi, siopay makapaliis ed panusam?

⁴ Balet pipirdonaen mo kami, kanyan nepeg mi kan igalang.

⁵ Ontan lay panaalagar koy tulong na Katawan, tan manmamatalek ak ed salita to.

⁶ Aalagaren koy Katawan; say panaalagar ko et alabas nen say pantatalaran ed kabwasan say pantatalaran ed kabwasan na saray bantay.

⁷ Israel, manmatalek kad Katawan, ta ag mangomay panangaro to tan sipaparaan lawas a mangilaban.

⁸ Ilaban to ray totoo ton Israelita ed amin a kasalanan da.