Saray Salmo 124 - Maung a Balita Biblia

Say Dios a Manangyagel na saray Totoo To

¹ Anto kasi no ag itayo tinulongay Katawan? Ebat ka, O Israel!

² No ag itayo tinulongay Katawan nen dinogpaan itayo na saray kalaban tayo,

³ inakmun da itayo lan mabilay komun lapud mapalalon pasnuk dad sikatayo;

⁴ inyanur itayo la komun na delap, impalner itayo la komun na danum,

⁵ impalgep itayo la komun na mabiskeg ya agos.

⁶ Misalamat itayod Katawan, ya ag angyabuloy a deralen itayo na saray kalaban tayo.

⁷ Akabatik itayon singa manok a nablus ed patit; apultot so patit, tan nablus itayo!

⁸ Say tulong ed sikatayo et manlalapud Katawan, ya amalsay tawen tan dalin.