Saray Salmo 12 - Maung a Balita Biblia

Say Pikekerew na Tulong

¹ Tulongan mo kami pa, Katawan! Anggapo lay maung a toon atilak; naandipat la ray totoon napanmatalkan.

² Mantitilaan la ray totoo; manlolokowan tan mampapalikdowan ira.

³ Patondam pa lan amin iray managpalikdon dila, Katawan! Pepetan mo ray mapasirayew a sangi a kuanda,

⁴ Nanaala miy labay mi diad panamegley na saray salita mi. Salitaen miy labay mi, et anggapoy makapatondad sikami.

⁵ Balet kuay Katawan, Onsingger ak natan, ta napapairap iray mankakaukolan tan mandadageyem ed sakit iray napapasegsegang. Iyarawik irad kaatapan ta sikatoy pampipilalekan da!

⁶ Napanmatalkan iray salita na Katawan; singa ra tuan pilak a pinapuron amimpito ed palbaan.

^7-8 Amin a sokung na mundo et kawalaay maoges iran totoo, tan balang sakey et ipapasirayew toy kaogsan to. Iyagel mo kami pa lawas, Katawan, ipaliis mo kami pad sarayan totoo.