Saray Salmo 115 - Maung a Balita Biblia

Say Saksakey tan Tuan Dios

¹ Sika labat, Katawan, sika labat, aliwan sikami so nepeg a pangitnay galang, lapud ag mangoman a panangarom tan say katooran mo.

² Akin et tetepeten da ray bansa ed sikami, Kawalaay Dios yo?

³ Walad tawen so Dios mi, tan gagawaen toy antokaman a labay to.

⁴ Saray diriyos da et balituk tan pilak, ginawa ra na limay totoo.

⁵ Walay sangi ra, balet ag ira makasalita; walay mata ra, balet ag ira makanengneng.

⁶ Walay layag da, balet ag ira makadngel; walay eleng da, balet ag ira makaangub.

⁷ Walay lima ra, balet ag ira makabemben; walay sali ra, balet ag ira makaakar; ag da anggan napaungol so kolukolung da.

⁸ Saray nanggagawad sikara tan amin da ray manmamatalek ed sikara et magmaliw ira komun a singa saray talintao a ginagawa ra.

⁹ Manmatalek kayod Katawan, sikayon totood Israel. Tutulongan tan iyaagel to kayo.

¹⁰ Manmatalek kayod Katawan, sikayon papariy Dios. Tutulongan tan iyaagel to kayo.

¹¹ Manmatalek kayod Katawan, sikayon manangigalang ed sikato! Tutulongan tan iyaagel to kayo.

¹² Say Katawan nununoten tan bindisionan to itayo; bindisionan to ray totood Israel tan amin da ray papariy Dios.

¹³ Bindisionan ton amin iray manangigalang ed sikato, atagey man o abeba so kipapasen da.

¹⁴ Itdan kayo komuy Katawan na amayamay ya anak, sikayo tan saray kabyangay boleg yo.

¹⁵ Bindisionan kayo komuy Katawan, ya amalsay tawen tan dalin!

¹⁶ Kayaryan a bukor na Katawan so tawen, balet inter toy mundo ed too.

¹⁷ Say Katawan ag idadayew na saray inaatey, saray oonlad dalin na kareenan.

¹⁸ Balet sikatayon mabilay pisalamatan tayoy Katawan manlapud natan ya anggad angga. Idayew yoy Katawan!