Saray Salmo 112 - Maung a Balita Biblia

Say Liket na Maung a Too

¹ Idayew yoy Katawan! Maliket so toon mangigagalang ed Katawan, tan makaliliket a mangoonur ed saray ganggan to.

² Magmaliw a makapanyari diad tapew na dalin iray anak na matonung a too; nabindisionan iray kabyangay boleg to.

³ Magmaliw ya amayamay so kayaryan tan kayamanan na pamilya to, tan onaligwas ya anggad angga.

⁴ Say silew onwawandag ed bilonget para saray maung a totoo, para saray mapangasi, maabagey, tan matonung.

⁵ Maliket so toon mabonluk a piutangan tan ag to amtay mansaol.

⁶ Say maung a too mansiansian maung so kipapasen to; lawas nanunotan.

⁷ Ag antakot a makadngel na maoges a balita; mabiskeg so pananisia to, tan manmamatalek ed Katawan.

⁸ Mabiskeg so linawa to tan ag natatakot; ag to panduaruwan a nanengneng ton natalo iray kalaban to.

⁹ Maiter ed saray mairap-bilay, tan ag manganggay panangasi to; magmaliw a makapanyari tan galangey totoo.

¹⁰ Nanengneng ya na saray totoon maoges et makapasnuk; manngilet ira tan naandipat la ra; nakal lan anggad angga so ilalo ra.