Saray Salmo 110 - Maung a Balita Biblia

Say Katawan tan say Pinili ton Ari

¹ Say Katawan inkuantod katawan ko ya ari, Yorung ka ed nikawanan ko anggad napasukok ed sika iray kalaban mo.

² Manlapud Sion, say Katawan palaknaben toy pakayarim ya ari. Oleyan mo ray kalaban mo, kuanto.

³ Maabuloy iray totoom a milaban no agew a mibakal kad saray kalaban mo. Singa linaew ed kabkabwasan saray balolakim onla rad sika diad saray masanton pokdul.

⁴ Say Katawan sinambaan to tan ag to benegan: Pari kan anggad angga, onung ed inkapari nen Melkisedek.

⁵ Say Katawan et walad nikawanan a diking mo; taloen to ray arari no sikato lay mamasnuk.

⁶ Sintinsiaan to ray bansa, tan panoen to na saray bangkay so alug a panagbakalan, taloen to ray arari ed intiron mundo.

⁷ Say ari oninom ed sobul a walad gilig na dalan, tan no binmiskeg la, onalagey a manalo.