Saray Huis 17 - Maung a Balita Biblia

Saray Talintao nen Micaya

¹ Nen saman walay sakey a lakin manngaran na Micaya a manaayam ed kapokdulan a dalin na Efraim.

² Inkuantod ina to, Nen walay anakew na sanlibo tan sanlasus a kuartan pilak yo, insamba yo may anakew. Nadngel kon ginawa yo man a samba. Walad siak iman so kuarta. Siak so angala. Inkuanen ina to, Bindisionan ka komun na Katawan, anak ko!

³ Impawil nen Micaya imay kuarta, insan inkuanen ina to, Pian ag ondapod anak ko imay samba, masimoon kon isaklang ed Katawan yan kuartan pilak. Ikanak ed panggawad kiew a talintao a naokupay pilak. Kanyan natan ipawil kod sika yay kuarta.

⁴ Insan impawil nen Micaya ed kinen ina to imay kuarta. Inala nen ina to so duan lasus a pilak, insan to inter ed sakey a platiro. Nanggawa may platiro na sakey a talintaon kiew tan inokupan to na pilak. Nipasen ed abung nen Micaya imay agawan talintao.

⁵ Si Micaya et walay pasen ton dili a panangigalangan. Nanggawa na saray pigaran talintao tan sakey ya ipod, tan tinoro ton sakey a pari so sakey ed saray anak ton lalaki.

⁶ Anggapod saman a panaon so ari na Israel; ginawa na balang too so labay ton gawaen.

⁷ Diad saman a panaon walay sakey a lakin tobun-balo a Levita a manaayam ed baley na Betlehem na Juda.

⁸ Tinaynan toy Betlehem ta mananap na arum a pasen a panayaman to. Nen manaakar, asabi toy abung nen Micaya, diad kapokdulan a dalin na Efraim.

⁹ Tinepet ed sikato nen Micaya, Nanlapwan mo? Inmebat, Sakey ak a Levita a taga Betlehem na Juda. Manaanap ak na pasen a panayaman ko.

¹⁰ Inkuanen Micaya, Manayam ka diad siak. Sikay magmaliw a sumisimbawak tan parik, et itdan ta ka, kapag sakey taon, na samploran pilak a kuarta, pigaran kawes, tan say kanen mo.

¹¹ Inmabuloy imay tobun-balon Levita ed kinen Micaya, kanyan nagmaliw a singa sakey ed saray anak nen Micaya.

¹² Impasen nen Micaya imay Levita a pari to, tan nanayam lad mad abung nen Micaya.

¹³ Inkuanen Micaya, Natan ta walay Levitan parik, amtak la a paaligwasen ak na Katawan.