Saray Bilang 32 - Maung a Balita Biblia

Saray Tribu a Walad Bokig na Jordan

¹ Saray tribu di Ruben tan Gad et dakerakel so baka ra. Nen anengneng dan balibalin pampastolan na baka so dalin na Jazer tan Galaad,

² inmasingger irad kindi Moises, Eleazar, tan saray arum a pangulo da ray Israelita tan inkuanda,

^3-4 Sayan dalin ya asakup na saray Israelita diad pananulong na Katawansaray baley na Atarot, Dibon, Jazer, Nimra, Hesbon, Eleale, Sibma, Nebo, tan Beonet balibalin dalin a para baka, et dakerakel iray baka mi.

⁵ Ipangasi yo pan ipakayaryan la yan dalin ed sikami, tan ag yo kami la pababaliwen ed Ilog na Jordan a panayamen diman.

⁶ Inmebat si Moises, Labay yoy manayam dia legan ya onlan mibakal iray kapara yon Israelita?

⁷ Akin et pabebetelen yoy linawa da ray totood Israel ya ombaliw ed Jordan tan manayam ed dalin ya inter ed sikara na Katawan?

⁸ Ontan so ginawa na saray atateng yo nen imbakik ira a manlapud Cades barnea ta nengnengen da so dalin.

⁹ Linma ra ya anggad Patar na Escol tan anengneng da so dalin, balet nen pinmawil ira, pin betel day linawa da ray totoo ya onloob ed dalin ya inter ed sikara na Katawan.

¹⁰ Diad saman ya agew akapasnuk so Katawan. Inkuanto,

¹¹ Sambaan ko a lapud aliwa ran matoor ed siak, anggapod saray lalakin pinmaway ed Egipto a say taon da et duamplo a mampaatagey so makaloob ed dalin ya insipan kod kindi Abraham, Isaac, tan Jacob.

¹² Apibiang ran amin likud ed kinen Caleb a lakin anak nen Jefone a Cineo tan si Josue a lakin anak nen Nun ta nansiansia ran matoor ed Katawan.

¹³ Akapasnuk so Katawan ed saray totoo tan impanakar-akar to ran apataploy taon ed kalawakan ya anggad inaatey iray amin a kabyangan na saman a kailalakan a sinmumpad sikato.

¹⁴ Et natan sinalatan yo ray atateng yo, sakey a balon kailalakan na makasalanan a totoo a sipaparaan a mangipadapo lamet na mapalalon pasnuk na Katawan ed Israel.

¹⁵ No sikayo ran totoo nen Ruben tan Gad et ag yo labay ya onuren natan so Katawan, ikaindan to lamet ed kalawakan ira yan amin a totoo, et sikayo so natetel ed pakaderal da.

¹⁶ Inmasingger ira ed kinen Moises tan kuanda, Iyabuloy mon manggawa kami ni na saray koral a panayaman da ray karniro mi, tan saray pinadir a baley a panayaman da ray kaasawaan mi tan saray anak mi.

¹⁷ Insan kami lad satan sipaparaan a milad saray kapara min Israelita a mibakal tan ipangulo miy ondogpa ya anggad napanayam mi la rad dalin a kayaryanen da. Legan a mibabakal kami, saray kaasawaan tan saray anak mi et makapanayam ira diad saray pinadir a baley ya ag ira sigensigenen na saray totood sayan dalin.

¹⁸ Ag kami dia ompawil ya anggad saray arum ya Israelita et nakayaryan da so dalin a nipabetang ed sikara.

¹⁹ Ag kami la mangayaryan na antokaman ed nibaliw na Jordan, lapud naawat mi la so betang mi dia ed bokig na Jordan.

²⁰ Inmebat si Moises, No talagan gawaen yo so ibabaga yo, dia natan ed arap na Katawan, mamparaan kayon mibakal.

²¹ Amin da ray lalakid sikayo a nayarian day mibakal et nepeg ya ombaliw irad Jordan tan diad panangipangulo na Katawan, ondogpa rad saray kalaban tayo ya anggad taloen ira na Katawan,

²² tan nakayaryan to so dalin. Kayari tod satan, nayarian yo lay ompawil dia lapud asumpal yo la so kanepegan yod Katawan tan diad saray kapara yon Israelita. Insan say Katawan birbiren to a sayan dalin a walad bokig na Jordan et kayaryan yo.

²³ Balet no ag yo sumpalen so sipan yo, pasakbayan ta kayo a mankasalanan kayod Katawan. Andi-duaruwad satan a nadusa kayo lapud kasalanan yo.

²⁴ Kanyan ipaalagey yo ray baley yo a panayaman na saray kaasawaan tan saray anak yo tan igawaan yo na saray koral iray karniro yo, balet sumpal yoy insipan yo!

²⁵ Saray totoo di Gad tan Ruben kuanda, Gawaen mi so ingganggan mo, sikamin aripen mo.

²⁶ Saray kaasawaan mi, tan saray anak mi, saray baka mi tan saray karniro mi et manayam ira dia ed saray baley na Galaad.

²⁷ Balet, sikami, sipaparaan kamin mibakal diad panangipangulo na Katawan. Baliwen mi so Jordan ta mibakal kami, onung na imbagam.

²⁸ Kanyan si Moises inter to ra yan ganggan ed kindi Eleazar, Josue, tan saray arum a pangulo na Israel:

²⁹ No saray totoo di Gad tan Ruben et baliwen day Jordan ta mibakal ira diad panangipangulo na Katawan tan no diad pananulong da et adakep yo so dalin, iter yon kayaryan da so dalin na Galaad.

³⁰ Balet no ag da baliwen so Jordan tan ag da kayo ibaan a mibakal, nepeg ya awaten da a singa sikayo so betang da ed dalin na Canaan.

³¹ Saray totoo di Gad tan Ruben inmebat ira, Gawaen mi so ingganggan na Katawan.

³² Diad panangipangulo to ombaliw kami ya anggad dalin na Canaan ta mibakal kami, pian napansiansia mi so kayaryan mi diad bokig na Jordan.

³³ Kanyan si Moises impabetang tod saray tribu di Gad tan Ruben tan sa kapaldua na tribu nen Manases iray amin a dalin nen Sehon ya ari da ray Amorreo tan si Og ya ari na Basan, pati saray baley tan bario ed kaliber-liber da.

³⁴ Saray kabyangay tribu nen Gad et pinasimbalo ran impaalagey iray pinadir a baley na Dibon, Atarot, Aroer,

³⁵ Atrot-sofan, Jazer, Jogbeha,

³⁶ Bet-nimra, tan Bet-haran.

³⁷ Saray kabyangay tribu nen Ruben et pinasimbalo ran impaalagey iray baley na Hesbon, Eleale, Kiryataim,

³⁸ Nebo, Baal-meon (asalatan so ngaran na sayan baley) tan Sibma. Iniitdan da na balon ngaran iray baley a pinapasimbalo ran impaalagey.

³⁹ Saray kabyangay boleg nen Makir a lakin anak nen Manases et nilooban day dalin na Galaad tan nanayaman da, kayari ran pinataynan iray Amorreon wadman.

⁴⁰ Kanyan si Moises inter to so Galaad ed saray kabyangay boleg nen Makir, tan nanayam irad man.

⁴¹ Si Jair a kabyangan na tribu nen Manases et dinogpaan tan adakep to iray pigaran bario, insan to nginaranan ira na Saray Bario nen Jair.

⁴² Si Noba dinogpaan tan adakep to so Kenat tan saray bario to, insan to sinalatan na Noba, say dilin ngaran to.