Saray Bilang 26 - Maung a Balita Biblia

Say Kumadwan Impanbilang ed saray Totood Israel

¹ Kayari na samay salot inkuan na Katawan ed kinen Moises tan si Eleazar a lakin anak nen Aaron,

² Ala yo onung ed pamilya na balang sakey ed sikara, so bilang na amin da ray lalakin mantaon na duamplo a mampaatagey a nayarin mansondalo.

^3-4 Inmonur ira di Moises tan Eleazar kanyan impantitipon da ray amin a lalakin mantaon na duamplo a mampaatagey. Nantitipon ira diad saray patar na Moab diad nibaliw na Ilog na Jordan manlapud Jerico. Sikara yay Israelitan pinmaway manlapud Egipto:

⁵ Say tribu nen Ruben (si Ruben so sankapangulowanan ya anak nen Israel): saray boleg di Hanoc, Fallu,

⁶ Hezron, tan Carmi.

⁷ Say bilang da ray lalaki ed sarayan boleg et apataplo tan talon libo, piton lasus tan talomplo.

⁸ Saray kabyangay boleg nen Fallu et si Eliab

⁹ tan saray lalakin anak to a di Nemuel, Datan, tan Abiram. (Sikara ya may Datan tan Abiram a pinili na karaklan. Sinumpa ray Moises tan Aaron tan akigampi ra ed kinen Core nen sinumlang day Katawan.

¹⁰ Sinmangi so dalin tan inakmon to ra, et inatey iran kaiba nen Core tan saray mananombuk to nen dineral na apoy so duanlasus tan limamplon lalaki; sikaray sakey a pasakbay ed saray totoo.

¹¹ Balet ag inatey iray lalakin anak nen Core.)

¹² Say tribu nen Simeon: saray boleg di Nemuel, Jamin, Jakin,

¹³ Sera, tan Saul.

¹⁴ Say bilang da ray lalaki ed sarayan boleg et duamplo tan duan libo tan duanlasus.

¹⁵ Say tribu nen Gad: saray boleg di Zefon, Hagi, Suni,

¹⁶ Ozni, Eri,

¹⁷ Arod, tan Areli.

¹⁸ Say bilang da ray lalaki ed sarayan boleg et apataplon libo tan limanlasus.

^19-21 Say tribu nen Juda: saray boleg di Sela, Fares, Zera, Hezron, tan Hamul. (Saray duaran lalakin anak nen Juda a di Er tan Onan et inatey ira ed dalin na Canaan.)

²² Say bilang da ray lalaki ed sarayan boleg et pitomplo tan anem a libo tan limanlasus.

²³ Say tribu nen Isacar: saray boleg di Tola, Pua,

²⁴ Jasub, tan Simron.

²⁵ Say bilang da ray lalaki ed sarayan boleg et anemaplo tan apat a libo tan talon lasus.

²⁶ Say tribu nen Zabulon: saray boleg di Sered, Elon, tan Jaleel.

²⁷ Say bilang da ray lalaki ed sarayan boleg et anemaplon libo tan limanlasus.

²⁸ Saray tribu nen Jose ya ama na duaran lalaki a di Manases tan Efraim.

²⁹ Say tribu nen Manases. Si Makir a lakin anak nen Manases so ama nen Galaad, tan saray onggendan a boleg a si Galaad so sengeg da:

³⁰ saray boleg di Jezer, Helek,

³¹ Asriel, Sekem,

³² Semida, tan Hefer.

³³ Si Zelofehad a lakin anak nen Hefer et anggapoy anak ton laki, balet wala ray bibiin anak to; Mala, Noa, Hogla, Milca, tan Tirza so kangaranan da.

³⁴ Say bilang da ray lalaki ed sarayan boleg et limamplo tan duan libo tan piton-lasus.

³⁵ Say tribu nen Efraim: saray boleg di Sutela, Beker, tan Tahan.

³⁶ Si Sutela so sengeg na boleg nen Eran.

³⁷ Say bilang da ray lalaki ed sarayan boleg et talomplo tan duan libo tan limamlasus. Si Jose so sengeg na sarayan boleg.

³⁸ Say tribu nen Benjamin: saray boleg di Bela, Asbel, Ahiram,

³⁹ Sefufam, tan Hufam.

⁴⁰ Si Bela so sengeg na saray boleg di Arid tan Naaman.

⁴¹ Say bilang da ray lalaki ed sarayan boleg et apataplo tan liman libo tan anem a lasus.

⁴² Say tribu nen Dan: say boleg nen Husim,

⁴³ a say bilang da ray lalaki et anemamplo tan apat a libo tan apat a lasus.

⁴⁴ Say tribu nen Aser: saray boleg di Imna, Isvi, tan Beria.

⁴⁵ Si Beria so sengeg na saray boleg di Heber tan Malkiel.

⁴⁶ Si Aser et walay biin anak to a manngaran na Sera.

⁴⁷ Say bilang da ray lalaki ed sarayan boleg et limamplo tan talon libo tan apat a lasus.

⁴⁸ Say tribu nen Neftali: saray boleg di Jahzeel, Guni,

⁴⁹ Jezer, tan Sillem.

⁵⁰ Say bilang da ray lalaki ed sarayan boleg et apataplo tan liman libo tan apat a lasus.

⁵¹ Say bilang na amin da ray Israelitan lalaki et anem a lasus tan sakey a libo, piton lasus tan talomplo.

⁵² Say Katawan kuantod kinen Moises,

⁵³ Apag-apag mo so dalin ed saray tribu onung ed kabaleg da.

^54-56 Apag-apag mo so dalin diad panamegley na pampapalaranan; ipabetang mod baleg a tribu so baleg ya apag tan ipabetang mod melag a tribu so melag ya apag.

⁵⁷ Saray kabyangay tribu nen Levi et saray boleg di Gerson, Coat, tan Merari.

⁵⁸ Saray kabyangay boleg da et saray pamilya di Libni, Hebron, Mahli, Musi, tan Core. Si Coat et ama nen Amram

⁵⁹ ya asawa toy anak nen Levi a si Jacobed a nianak ed Egipto. Walay anak tod kinen Amram a duaran lalaki a di Aaron tan Moises tan sakey a bii a si Miriam.

⁶⁰ Apatiray lalakin anak nen Aaron a di Nadab, Abiu, Eleazar, tan Itamar.

⁶¹ Inatey ira di Madab tan Abiu nen angyapay irad Katawan na aliwan masanton apoy.

⁶² Say bilang da ray lalakin Levita a mantaon na sakey bulan a mampaatagey et duamplo tan talon libo. Niibig ed saray arum ya Israelita so angilistaan ed sikara, lapud ag ira naitdan na antokaman a kayaryan ed Israel.

⁶³ Amin da ra yan boleg et inlista di Moises tan Eleazar nen inala ray bilang na saray Israelita diad saray patar na Moab diad nibaliw na Ilog na Jordan manlapud Jerico.

⁶⁴ Anggapoy anggan sakey a lakin akeraan ed saramay inlista di Moises tan Aaron diad samay inmonan impanbilang da diad Kalawakan na Sinai.

⁶⁵ Imbaga la na Katawan ya ompatey iran amin ed kalawakan likud ed kinen Caleb a lakin anak nen Jefone tan si Josue a lakin anak nen Nun. Inatey iran amin a tua likud ed saramay duara.