Saray Bilang 24 - Maung a Balita Biblia

¹ Amta la natan nen Balaam a say Katawan labay ton pabindisionan ed sikato iray Israelita kanyan ag la linman nannengneng na saray tanda, aliwan singa ginawa to nen inmoona. Linmingaw ed bandad kalawakan

² et anengneng to ray Israelita a walay kampo na kapag tribu. Linmoob ed sikato so ispiritu na Dios,

³ tan imbalikas to yan propisiya: Say propisiya nen Balaam a lakin anak nen Beor, Saray salita na toon malinew so pakanengneng to,

⁴ A narerengel to so ibabaga na Dios, Alukbok ak lapud inloob na ispiritu ed siak, Balet siansian lokas iray matak tan anengneng ko So pasingayew na Dios a Makapanyarin-amin.

⁵ Mararakep iray tulda na Israel,

⁶ Singa ra saray andorokey a dasig na ilog, Odino saray tanamanan ed gilig na ilog, Singa ra saray aloe ya intanem na Katawan Odino saray kiew a sidro ed pangdel na ilog.

⁷ Nawalaan ira na daakan ya oran Tan isibwag day bokel na tanaman da ed saray ambasa-basan kaalogan. Matalonggaring nen si Agag so manarid sikara, Tan onawang na mapalalo so nanarian to.

⁸ Say Dios impaway to rad Egipto; Singa bakad katakelan a mibabakal para sikara. Sarasarag dan buagen iray kalaban da, Temeken da ray pokel da, poteren da ray pana ra.

⁹ Say bansa et singa makapanyarin lion; No akaogip anggapoy makakpel a mamangon. Siopamay mamindision ed Israel et nabindisionan Tan siopamay mangisamba ed Israel et nisamba.

¹⁰ Inelet nen Balak so poniti to diad gaway pasnuk to tan kuantod kinen Balaam, Tinawag ta kan mangisamba ed saray kalaban ko, balet amitlom iran binindisionan lalaingen.

¹¹ Sempet ka la! Insipan kon tumangan ta ka, balet ag inyabuloy na Katawan a naalam so tumang mo.

¹² Inmebat si Balaam, Imbagak ed saray imbakim ed siak ya

¹³ anggan iter mod siak iray amin a pilak tan balituk na palasiom, ag kon balut nayarian a sumlangen so ganggan na Katawan diad pangonur kod labay kon dili. Salitaen ko labat so labay na Katawan a paibagad siak.

Say Kaonuran a Propisiya nen Balaam

¹⁴ Inkuanen Balaam ed kinen Balak, Ompawil ak la natan ed saray dilin totook, balet kasakbayan ya ompikal ak, ibagak ed sika no antoy gawaen da ray Israelita ed saray totoom diad arapen a panaon.

¹⁵ Insan imbalikas to yan propisiya: Say propisiya nen Balaam a lakin anak nen Beor, Saray salita na toon malinew so pakanengneng to,

¹⁶ A narerengel to so ibabaga na Dios Tan awaten to so pakatalus a manlalapud Sankatageyan a Dios; Alukbok ak lapud inloob na ispiritu ed siak, Balet siansian lukas iray matak tan anengneng ko So pasingayew na Dios a Makapanyarin-amin.

¹⁷ Sankanengneng ko so arapen a panaon, Et na nengneng ko so bansa na Israel. Walay sakey ya arin singa maliwawan bitewen ya onletaw ed sayan bansa. Singa sakey a komita a manlapud Israel. Kabilen to ray pangulo na Moab Tan tumbaen to ray amin a totoo na Set.

¹⁸ Dakepen to ray kalaban tod Edom, Tan kayaryanen toy dalin da, Legan a mamataloy Israel.

¹⁹ Gatin-gatinan ira na bansa ya Israel Tan deralen to ray akapaliis ed patey.

²⁰ Insan diad sayan nipasingayew ed kinen Balaam anengneng to ray Amalecita, tan imbalikas to yan propisiya: Say Amalec so sankamakapanyarian nen saman ed amin a bansa. Balet diad kaonuran naderal ya anggad angga.

²¹ Diad sayan nipasingayew ed kinen Balaam anengneng to ray Cineo, tan imbalikas to yan propisiya: Arawid kaatapan so pasen a panaayaman yo, Ag kayo nasigensigen a singa obung na manok ed tagey na palandey,

²² Balet naderal kayo, sikayon Cineo No dakepen kayo na saray taga Asiria.

²³ Imbalikas nen Balaam yan propisiya: Siopa ra yay totoon mantitipon ed baybay?

²⁴ Saray ondogpan manakep et manlapud rad Chipre; Dakepen da so Asiria tan Eber, Balet naderal ira met lamlamang ya anggad angga.

²⁵ Insan namparaan si Balaam tan sinmempet la; ontan met sinmempet lay Balak.