Saray Bilang 18 - Maung a Balita Biblia

Saray Susumpalen da ray Papari tan saray Levita

¹ Say Katawan kuantod kinen Aaron, Sika, saray anak mon lalaki, tan saray Levita so nadusa lapud saray kasalanan a sumpad saray totontonen a nipaakar ed Tuldan Ayaman ko; balet sika tan saray anak mo labat so nadusa lapud kasalanan a sumpad saray totontonen a nipaakar ed inkapari.

² Alam a katulongan mo iray kakanayon mon kabyangay tribu nen Levi, no sika tan saray anak mo et manlingkur ed dalem na Tulda.

³ Gawaen da ray kimey da tan kanepegan da para Tulda, balet ag ira nepeg ya onsingger ed saray masanton bengatla a walad dalem na Masanton Pasen odino diad altar. No onsingger ira pateyen ira tan sikayo.

⁴ Sikaray katulongan yo tan gawaen da ray susumpalen a panlingkur ed dalem na Tulda, balet ag nepeg a tulongan kayo na saray totoon aliwan manepeg.

⁵ Sika tan saray anak mo labat so manggawa na saray kimey ed Masanton Pasen tan diad altar, pian ag lamet onterak so pasnuk kod saray Israelita.

⁶ Siak so amilid saray kakanayon mon Levita; pinilik irad saray Israelita a sikaray rigalo ed sika. Sikaray nisaklang ed siak, pian nagawaan day kimey da ed dalem na Tulda.

⁷ Balet sika tan saray anak mo labat so manggawa na saray susumpalen na inkapari a nipaakar ed altar tan antokaman a walad dalem na Sankasantosan a Pasen. Sika so makaoley ed sarayan bengatla, ta sikay angipalaboan ko na inkapari. Pateyen so siopamay toon aliwan manepeg ya onsingger ed saray masanton bengatla.

Say Nabebetangan da ray Papari

⁸ Say Katawan kuantod kinen Aaron, Ag mo lilingwanan ya iter kod sika iray amin a nidoma-doman bagat ya ag poolan ya isaklang da ray totoo. Iter ko rad sika tan saray kabyangay boleg mo, tan sikaray nabebetangan yo ed anggad angga.

⁹ Diad saray sankasantosan a bagat ya ag ira poolan ed tapew na altar, saray onggendan so kayaryan yo: saray bagat a trigo, saray bagat a para kasalanan, saray bagat a pambayar. Amin a masanton nisaklang ed siak et kayaryan mo tan saray anak mo.

¹⁰ Nepeg yo ran kanen ed masanton pasen, tan saray lalaki labat so nayarin mangan ed sikara; ipasen yon masanto ra.

¹¹ Say kaaruman to ya et saray arum a nidoma-doman rigalon isaklang ed siak na saray Israelita; kayaryan yo met ira ya. Iter ko rad sika, saray anak mon lalaki tan bibii; iter ko rad sikayo anggan kapigan man. Nayarin kanen ira na amin a kabyangan na pamilyam no malinis ira onung ed ganggan.

¹² Iter kod sika ray amin a sankaabigan a bungay dalin ya iter ed siak na saray Israelita kapag taon: say larak na oliba, say alak, tan say trigo.

¹³ Kayaryan mo ran amin. Nayarin pambilay ira na amin a kabyangan na pamilyam no malinis ira onung ed ganggan.

¹⁴ Amin a bengatlad Israel a nisaklang ed siak et kayaryan yo ra.

¹⁵ Amin a pangulowan ya anak odino besag na ayep ya isaklang ed siak na saray Israelita et kayaryan yo ra. Balet nepeg mon awaten so kuartan panondon dad balang pangulowan ya anak tan nepeg mo met ya awaten so panondon dad balang besag ya ayep ya aliwan malinis onung ed ganggan.

¹⁶ Saray pangulowan ya anak nepeg a narondon ira no sakey bulan la ra; say nigetar a panondon ed sikara et limaran pilak a kuarta onung ed panagkuinta ed santuario.

¹⁷ Balet ag nepeg a dondonen iray besag na baka, karniro, tan kanding; sigput iran kayaryan ko tan sikaray nepeg ya ibagat. Isibom ed altar so dala ra tan poolan mon bagat a popoolan so taba ra; makapaliket ed siak so balingit to.

¹⁸ Say karni na sarayan bagat et kayaryan yo ra, singa say pagew tan say kawanan ya ulpo na nidoma-doman bagat.

¹⁹ Iter kod sika, tan saray anak mon lalaki tan bibii iray amin a nidoma-doman bagat ya insaklang ed siak na saray Israelita; kayaryan yo ra ya anggad angga. Ag naderal yan impisipanan kod sika tan saray kabyangay boleg mo.

²⁰ Say Katawan kuantod kinen Aaron, Ag ka mangaawat na antokaman a kayaryan a nayarin tawiren, tan anggapoy nepeg ya ipabetang ed sikan parti na dalin. Siak a Katawan labat so nakaukolan mo.

Say Nabebetangan da ray Levita

²¹ Say Katawan kuanto, Impabetang kod saray Levita iray amin a kakaplo ya isaklang ed siak na saray Israelita. Pambayar ya ed sikara lapud panaglingkur dad Tuldan Ayaman ko.

²² Saray arum ya Israelita et ag da la nepeg so onsingger ed Tulda, ta no onsingger ira mankasalanan ira tan ompatey ira.

²³ Manlapud natan saray Levita labat so manasikaso ed Tulda; sikaray makaoley ed saya tan ebatan day amin a nagawad man. Sayan totontonen et nepeg ya onuren lawas na saray kabyangay boleg yo. Saray Levita et anggapoy mansiansian kayaryan da ed Israel,

²⁴ lapud inter kon kayaryan da so kakaplon isaklang ed siak na saray Israelita. Sikato yay makasengeg ya imbagak ed sikara ya ag ira nepeg a nawalaan na mansiansian kayaryan ed Israel.

Say Kakaplon Bagat da ray Levita

^25-26 Say Katawan inkuantod saray Levita diad panamegley nen Moises: No awaten yod saray Israelita so kakaplon iter ed sikayo na Katawan a kayaryan yo, nepeg ya iyapay yon nidoma-doman bagat yod Katawan so kakaplo na kakaplon awaten yo.

²⁷ Sayan nidoma-doman bagat et kasimbang na bagat a balon trigo tan balon alak ya isaklang na dumaralus.

²⁸ Diad onya isaklang yo met a nidoma-doman bagat ed Katawan so kakaplo na kakaplon awaten yo ed saray Israelita. Nepeg yon iter yan bagat a para Katawan ed kinen Aaron a pari.

²⁹ Sayan kakaplo et manlapud saray sankaabigan ya awaten.

³⁰ No nisaklang yo la so sankaabigan a parti, nayarian yo lan isinup so akeraan a singa pangisinup na dumaralus ed akeraan kayari ton mangisaklang na bagat to.

³¹ Sikayo tan saray pamilya yo et nayarian yon kanen ed anggad iner a pasen so akeraan, lapud sikatoy upa yo ed panlingkur yod Tulda.

³² Ag kayo mankasalanan no kanen yo so akeraan, dapot no nisaklang yo la so sankaabigan ed Katawan. Balet ag yo dodotakan iray masanton rigalo na saray Israelita diad pangan yod dinan man ed saray rigalo na saray rigalo kasakbayan na ngibagat yo ed sankaabigan a parti; no dotakan yo ompatey kayo.