Saray Bilang 17 - Maung a Balita Biblia

Say Baston nen Aaron

¹ Say Katawan kuantod kinen Moises,

² Ibagam ed saray totood Israel ya itdan da kay labinduan baston, sakey so manlapud kapag pangulo na balang tribu. Isulat mo so ngaran na balang pangulo ed baston to

³ insan mo isulat so ngaran nen Aaron ed baston a mangilalaman ed kinen Levi. Sakey a baston so para sakey a pangulo na tribu.

⁴ Iyakar mo rad Tuldan Ayaman ko insan mo ra igaton ed arap na Kaban na Sipanan, a diman ta ka babanaen.

⁵ Mansangad satan so baston na toon pinilik. Diad onya patondaen koy mabetbet a panririklamo da ray Israelita sumpad sika.

⁶ Kanyan akisalitay Moises ed saray Israelita, et angiter ed sikato na baston na balang sakey ed saray pangulo ra, sakey so para balang tribu, labinduan amin, tan akilaok so baston nen Aaron.

⁷ Insan si Moises inyan tod dalem na Tulda ira may amin a baston diad arap na Kaban na Sipanan na Katawan.

⁸ Diad ontombuk ya agew, nen linmay Moises ed dalem na Tulda, anengneng ton nansanga may baston nen Aaron a mangilalaman na tribu nen Levi. Nansimit, nanrosas, tan nambunga na aloton almindras!

⁹ Inala nen Moises ira may baston tan impanengneng to ran amin ed saray Israelita. Anengneng da so agawa, tan inala na balang pangulo so dilin baston to.

¹⁰ Say Katawan kuantod kinen Moises, Ipawil mod arap na Kaban na Sipanan itay baston nen Aaron. Sikatoy nisinup a sakey a pasakbay ed saray mananumpan Israelita ya ompatey ira no ag ira ontondan manriklamo.

¹¹ Ginawa nen Moises so ingganggan na Katawan.

¹² Saray Israelita kuandad kinen Moises, No ontan sirin, ompatey kami lan amin! Anggaan mi la!

¹³ No ompatey so anggan siopaman ya onsingger ed Tulda, naoput kami lan amin!