Probirbio 8 - Maung a Balita Biblia

Say Panangidayew ed Kakabatan

¹ Dengel kayo! Mankokolyaot so kakabatan. Mambabando so pakatalus pian narengel yo.

² Manalalagey ed toktok na kapokdulan ed abay na dalan tan diad nansasalipongpongan na dalan.

³ Diad lolooban na siudad, diad abay da ray puirta maksil ya ontatawag:

⁴ Onaapireng ak ed sikayon katoowan; tatawagen koy balang too ed sankamundoan.

⁵ Sikayon inoogaw niy kalakal, magmaliw ki lan makatalus; sikayon makulang-kulang, mankalakal kayo la.

⁶ Dengel yo ray makabaliksan a salitak; dugan amin iray ibabagak.

⁷ Tua ray sasalitaen ko; kabosul ko ray tila.

⁸ Kaptekan ya amin so ibabalikas ko; anggapoy tila odino makapalingo.

⁹ Malinew iran amin ed toon walay pakatalus; mabatar iran amin ed toon amayamay so amta to.

¹⁰ Pilim so bilin ko, aliwan say pilak; pilim so pakatalus, aliwan say sankapuroan a balituk.

¹¹ Siak so Kakabatan, mabli ak ni nen saray alahas; anggapoy bengatlan pampipilalekan mo a makapipara ed siak.

¹² Siak so Kakabatan, walad siak so pakatalus; walad siak so pakaamta tan maptek a pananintinsia.

¹³ Say pangigalang ed Katawan kabaliksan toy iyarawid kaogsan; kabosul koy panagpaatagey tan panaglastug, say maoges a kagagawa tan saray salitan tila.

¹⁴ Mamplaplano ak tan susumpalen ko ra. Walay pakatalus ko, tan mabiskeg ak.

¹⁵ Tutulongan kon manoley iray arari, tan manggawa na saray ganggan iray walad pakaoley.

¹⁶ Tutulongan kon manoley iray amin a pangulo diad tapew na dalin, saray prinsipi tan saray atatagey so betang da.

¹⁷ Inarok iray mangaarod siak; narumog ak na saray maseet a manaanap ed siak.

¹⁸ Wala ray kayamanan tan kagalangan ya iiter ko, aligwas tan say pampalabo.

¹⁹ Say nagunggona yod siak et maung ni nen say sankapuroan a balituk, maung ni ra nen say sankarakepan a pilak.

²⁰ Pankukurangan koy dalan na katunongan; totombuken ko ray basbas na kaptekan;

²¹ iitdan koy kayamanan iray mangaarod siak, papanoen ko na saray kayamanan iray kaabungan da.

²² Siak so ononaonan pinalsa na Katawan, say onaan ed saray kimey to nen saman a panaon.

²³ Diad gapoy gapo agawa ak la, diad gapo, kasakbayan ya apalsa so mundo.

²⁴ Nianak ak la kasakbayan a wala ray dayat, nen anggapo ni ray sobusobul.

²⁵ Wala ak la kasakbayan a wala ray kapalandeyan, kasakbayan a nilirad pasen da iray kapokdulan,

²⁶ kasakbayan a pinalsa na Dios so mundo tan saray kaalogan to, odino anggan say ononan sankaakup a dalin.

²⁷ Wadman ak la nen inlira na Dios so tawen ed pasen to, nen impanat toy liwang ed tagey na dayat,

²⁸ nen inyan tod tawen iray kaloreman, nen nilokasan to ray sobusobul ed dalem na dayat,

²⁹ tan ingganggan to ray danum na dayat ya ag ira onlabsan ed imbaga ton panganggaan da. Wadman ak la nen saray pundasion na mundo et inletneg to ra.

³⁰ Singa ak arkitikto a walad abay to nen saman, siak so inagew-agew a panlalapway liket to, malikeliket ak lawas ed arap to

³¹ maliket ak ed inkiwalak ed mundo tan magayaga ak a kaibak iray katoowan.

³² Dengel yo ak natan, sikayon tobun-balo. Manliket kayo no onuren yoy ibabagak.

³³ Dengel yo ray bilin ed sikayo. Magmaliw kayon makabat; ag yo ya papaolyan.

³⁴ Maliket so toon ondedengel ed siak say toon manaayam ya inagew-agew ed puirtak, a manaalagar ed lolooban na abung ko.

³⁵ Say toon makalmod siak narurumog toy bilay, tan manliket so Katawan ed sikato.

³⁶ Balet say toon ag makarumog ed siak, papasakitan toy sikaton dili; siopamay mamobosul ed siak inaro toy patey.