Probirbio 30 - Maung a Balita Biblia

Saray Salita nen Agur

¹ Sikara yay balikas nen Agur a lakin anak nen Jake: Arawid siak so Dios, arawid siak so Dios, tan pangaskasiyay kipapasen ko.

² Alabas niy inkaayep ko nen say inkatook; anggapod siak so pakatalus na too.

³ Ag ak akaaral na kakabatan, tan anggapoy amtak a nipaakar ed Dios.

⁴ Siopa lay akagawan sigput so mangatatawen a pakaamta to? Siopa lay akaakup na dagem? Odino siopa lay akaponggos na danum ed panyo? Odino siopa lay akapangilira na saray ketegan na mundo? No amtam, ibagam no siopa? Siopay anak ton laki?

⁵ Susumpalen na Dios so balang sipan to. Say Dios aliling toy sakey a samper ed amin da ray papaiyagel ed sikato.

⁶ No ibagam ya imbaga toy bengatlan ag to imbaga, pampasnukan to ka tan ipanengneng ton matila ka.

Saray arum nin Probirbio

⁷ Kekerewen kod sika, O Dios, ya iter mo pad siak so duaran bengatla kasakbayan ya ompatey ak:

⁸ ag mo pa iyaabuloy a mantila ak, tan ag mo pa iyaabuloy ya onyaman ak odino onirap so bilay ko. Iter mo pa labat ed siak sirin so nakaukolan kon tagano.

⁹ Ta no daakan so kakanen ko, ompan ibagak ya ag ta ka nakaukolan. Balet no mairap so bilay ko, ompan mantakew ak, et nipelag kod kababaingan so Dios ko.

¹⁰ Ag mo papaogesen ed amo to so aripen ompan isamba to ka, et sikay nairapan.

¹¹ Wala ray totoon isasamba ray kaamaan da, tan ag da pisasalamatan iray kainaan da.

¹² Wala ray totoon ipapasen dan malinis so kabibilay da, balet diad tuay ontan lay inkarotak da.

¹³ Wala ray totoon ipapasen day sikaran dili a maumaungon, abaloan dan ontan lay kamaung da!

¹⁴ Wala ray totoon maruksa so panlalames dad saray mairap-bilay tan saray walad pankaukolan; onyay anapay bilay da.

¹⁵ Say linta walay duaran anak ton bii, tan say ngaran dan dua, Itdan mo ak! Walay apatiran bengatla ya ag iran balut napepenek;

¹⁶ say pasen a panaayaman da ray inaatey, say biin anggapoy anak to, say kinmelang a dalin a mankaukolan na oran, tan say pool ya ag la nasebseban.

¹⁷ Say toon luludlureyen toy ama to odino balbalawen toy akolaw lan ina to et nepeg a kanen na saray buitri, odino ipatoktok ed saray wawak ed katakelan iray mata to.

¹⁸ Wala ray apatiran bengatlan makapakelaw ya ag ko natalusan:

¹⁹ say agilan mantiktikyab ed gawen, say oleg a maniilas ed tapew na baton-dampay, say bapor a mankukurang ed tapew na dayat, tan say paniinarowan na laki tan bii.

²⁰ Onyay kagagawa na biin aliwan matoor ed asawa to; mikaloguran, manames, insan kuanto, Anggapoy ginawak a maoges!

²¹ Walay apatiran bengatla ya ag nayarin abuloyan na sankamundoan:

²² say aripen a magmaliw ya ari, say toon makulang-kulang a sawasawaan so kakanen to,

²³ say makolkol a biin miasawa, tan say biin aripen a salatan toy kipapasen na amo ton bii.

²⁴ Diad mundo wala ray apatiran ayayep ya ankekelag, balet mapalaloy inkasilib da:

²⁵ Saray gilata: maletey ira, balet mantitipon iray kanen da no tiagew.

²⁶ Saray konihod bato: aliwa met iran mabiskeg, balet diad ankakabaleg a batoy panggagawaan day abung da.

²⁷ Saray dorun: anggaman ya anggapoy ari ra, balibaliy panoolup dan amin.

²⁸ Saray tiki: nabembenan moy sakey ed sikara, balet narumog mo rad saray palasioy ari.

²⁹ Wala ray apatiran bengatla a marakep iran bantayan no manaakar ira:

³⁰ saray lion, sankabiskegan irad amin ya ayayep tan anggapoy tatakotan da;

³¹ saray mapasirayew a lalung, saray kanding, tan saray arari diad arap da ray totoo ra.

³² No makulang-kulang ka ed panagpaatagey mo tan manggegetma kan manggaway maoges, tonda ka tan mannunot ka!

³³ No batien moy gatas, napapaway moy kiso. No ponitien moy eleng na kaparam a too, ondala. No songluran moy pasnuk, golo so nasagmak mo.