Probirbio 3 - Maung a Balita Biblia

Saray Simbawa ed saray Tobun-balo

¹ Anak ko, ag mo lilingwanan so ibabangat kod sika. Nunot mo lawas iray ganggan kod sika.

² Say bangat ko et itdan to ka na andokey tan maaligwas a bilay.

³ Ag mo ikakaindan so katotoluk tan say inkatoor. Isinger mo rad beklew mo tan isulat mo rad pusom.

⁴ No gawaen mo ya, magmaliw kan maung tan makapaliket ed Dios tan too.

⁵ Manmatalek ka ed Katawan diad intiron pusom. Ag ka manmamatalek ed dilin pakatalus mo.

⁶ Diad amin a gawaen mo nunot mo lawas so Katawan, et iwanwan to kad maptek a dalan.

⁷ Ag mon balut ipapasen a makabat ka nen say peteg a kakabatan mo; takotan moy Katawan, tan ag ka mangagaway kaogsan.

⁸ No onyay gawaen mo, tambalen to ray sugat mo tan paninawaen to kad liliknaen mo.

⁹ Pagalangan moy Katawan diad panamegley na pangibagat mod sikato na sankaabigan a bungay dalin mo.

¹⁰ No onyay gawaen mo, napano na ilik iray kamalir mo, tan nawalaan ka na alak a diad karakel to et ag mo nisinup ya amin.

¹¹ Anak ko, ag mo luludlureyen so panametek na Katawan; ipasen mon sakey a pasakbay ed sika.

¹² Say Katawan pepeteken to ray inaro to, a singa pamepetek na ama ed anak ton ikikinon to.

¹³ Maliket so toon magmaliw a makabat, say toon nawalaan na pakatalus.

¹⁴ Dakel niy nagonggonam ed kakabatan nen say diad pilak; mabli ni nen say balituk so kakabatan.

¹⁵ Say kakabatan mabli ni nen saray alahas; ag nayarin ipara ed antokaman a labay mon nakayaryan.

¹⁶ Say kakabatan itdan to kay andokey a bilay, kayamanan, tan kagalangan.

¹⁷ Say kakabatan pagmaliwen ton marakep so panagbilay mo, tan iyarawi to kad kaatapan legan mon mambilay.

¹⁸ Maliket iray totoon magmamaliw a makabat; say kakabatan itdan to ra na bilay.

¹⁹ Lapud kakabatan na Katawan pinalsa to so mundo; lapud pakatalus to inlira to so tawen.

²⁰ Say kakabatan to pinaagos to ray ilog, tan pinapelag to ray lorem a mangoran ed tapew na dalin.

²¹ Anak ko, bembenan moy kakabatan tan pakatalus a walad sika; ag mo ra iikbanan.

²² Itdan da ka na bilaybilay a makaroyroyo tan maliket.

²³ Mankurang kad satan ya arawi ed kaatapan tan ag ka niparukol.

²⁴ Ag ka ontakot no onla ka lad dokulan mo, tan masamsamit so ogip mon sanlabi.

²⁵ Anggapo met so pagpagam nipaakar ed saray deral ya onsabin singa bagyo ed saray totoon maoges.

²⁶ Say Katawan iyarawi to kad kaatapan. Ag to iyabuloy a napelag ka ed patit.

²⁷ No nayarian mo, manggawa kay kamaungan ed saray mankaukolan.

²⁸ Ag mo ibabagad kaabay mo ya ompawil ka nabwas no nayarian mo lan tulongan natan.

²⁹ Ag ka manggegetmay maoges sumpad kaabay mo; manaayam ed abay mo tan panmamatalkan to ka.

³⁰ No anggapoy makasengeg ag mo pisasangsangan so toon anggapoy makapoy a ginawa tod sika.

³¹ Ag ka oniibeg ed saray totoon magolo odino aaligen so gagawaen da,

³² lapud makapaingungot ed Katawan iray manggagaway kaogsan, balet makapaliket ed sikato iray totoon matonung.

³³ Isasamba na Katawan so kaabungan da ray totoon maoges, balet bibindisionan toy kaabungan da ray matonung.

³⁴ Balbalawen to ray mapaatagey, balet mangiiter na pankaabigan da ray mapaabeba.

³⁵ Nagamuran na makabat a totoo so kagalangan, balet napelag ed kababaingan iray totoon makulang-kulang.