Probirbio 27 - Maung a Balita Biblia

¹ Ag mo ipapasirayew so nipaakar ed nabwas. Ag mo amta no nagawa ed sayan agew.

² Paidayew kad arum a totooanggan saray sangkaili; ag mon balut idadayew so sikan dili.

³ Anlemew niy bato tan buer nen say golo a nagawaan na inkakulang-kulang.

⁴ Maruksa tan makaderal so pasnuk, balet ag nayarin ipara ed imon.

⁵ Magmaung nin peteken mo so kaparam a too ed arap na totoo, nen say palpaolyan mo ya abaloan ton ag mo inaro.

⁶ Kamaungan so getma na kaaro anggan papasakitan to ka. Balet anggan lalakapen ka na kalaban, manalwar ka!

⁷ No napsel ka ag mo labay so dilo, balet no narasan ka, anggan ampait a kakanen masamit so taway to.

⁸ Say toon arawi ed abung to singa manok ya arawi ed obung to.

⁹ Say larak tan say pabalingit paliliketen da ka, balet say gunigon gogoloen toy isip mo.

¹⁰ Ag mo lilingwanan iray kakaarom, odino saray kakaaro nen amam. No wala kad gunigon ag ka onkekerew na tulong ed agim; natulongan ka ni na kaabay mo nen say agim a walad arawi.

¹¹ Magmaliw kan makabat, anak, et manliket ak; naebatan kod satan iray mambabalaw ed siak.

¹² Saray totoon ikakana ray olo ra nanengneng dan onsasabi so kaatapan et paliisan da, balet say toon kulang na kanunotan subaen to et nasagmak toy kairapan.

¹³ Say makulang-kulang a mangisipan ya ebatan to ray utang na sangkaili nepeg ton iter a kaletan so kayaryan to.

¹⁴ Singa insambam so kaarom no liingen mod kabkabwasan diad maingal a pangibanom ed sikato.

¹⁵ Say biin asawa a makolkol et singa ag manondan manterterter ya oran no nepnep.

¹⁶ Say pamatondam ed sikato et singa say pamatonda ed siplug na dagem odino say pangakup ed larak.

¹⁷ Saray totoo makakaaral irad kapara ran totoo, a singa say balatyang et patataremen toy kapara ton balatyang.

¹⁸ Komponim so kiew na igos, et makapangan kay bungay igos. Napagalangan so aripen a pagaan toy amo to.

¹⁹ Say dilin anino na lupam so nanenengneng mod danum tan say dilin inkasika so nanengneng mod pusom.

²⁰ Saray pilalek na too et ag iran balut napepenek a singa say pasen a panaayaman da ray inaatey.

²¹ Say apoy susuboken toy balituk tan pilak; ontan met say kagalangan na sakey a too nayarin suboken.

²² Anggan pekpeken mo lan pekpeken ya anggad patey-pateyan so toon makulang-kulang, siansian ag mo naekal ed sikatoy kalokowan to.

²³ Apiapiger mon komponien iray karnirom tan saray bakam,

²⁴ ta ag mansiasia so kayamanan. Anggan saray bansa ag ira mansiansia.

²⁵ Mansimbon kay dayami, tan mampalut kay dika ed saray alusadsar na pokdul legan ya ombabaleg iray onsoblay ya anien.

²⁶ Makapanggawa kay kawes mod saray naalam a bagoy karnirom tan makasaliw kay dalin ed panlakoan mo na saray arum a kanding mo.

²⁷ Saray natilak a kanding mo itdan da kay gatas, saray kabyangay pamilyam, tan saray katulong mon bibii.