Probirbio 25 - Maung a Balita Biblia

Saray Arum nin Probirbio nen Solomon

¹ Nia ray arum nin probirbio nen Solomon, a sinakal ira na saray lalaki diad korti nen Ari Ezekias na Juda:

² Papagalangen tayoy Dios lapud pangyaamut tod saray bengatla, balet papagalangan tayo ray arari lapud saray pangipapaliwawa rad saray bengatla.

³ Ag mon balut naamtaan iray nununoten na ari; singa ra kaatagey na tawen odino singa ra kaaralem na dayat.

⁴ Ekalan moy dotak so pilak, et makagawa lay bengatlan marakep so platiro.

⁵ Ekal mod ari iray maoges a sumisimbawa, et naamtaan so oley lapud inkatonung.

⁶ No miarap ka ed ari ag mo ipapasen so sikan dili a sake-sakey kan matalonggaring.

⁷ Magmaung nin nakerew ed sika ya onatagey kad kipapasen mo nen say nibagad sika ya iter moy kipapasen mo ed sakey a toon matalona nen sika.

⁸ Ag ka bengat-bengat a mangisesegep ed korti na kason nipaakar ed anengneng mo. Ta antoy gawaen mo no walay arum a tasin mamaneknek a nalilingo ka?

⁹ No sika tan say kaabay mo et walay ag yo pantatalusan, arigloan yo lan dua tan ag mo ibabawag so antokaman ya iyaamut.

¹⁰ Ta no ibawag mo, nakabatan na arum a totoo ya ag ka makaamut, et ag ontonday pakababaingan mo.

¹¹ Say kanunotan a marakep so inkibalikas to et singa akortin balituk ya impatoon ed pilak.

¹² Say pasakbay ya inter na toon walay salsali tod panagbilay ed toon sipaparaan ya ondengel et mabli ni nen saray balituk a singsing odino saray alahas a puron balituk.

¹³ Say napanmatalkan a manangibalita papasimbaloen toy liknaan na angibakid sikato, a singa ambetel a danum no ampetapetang a panaoy panagani.

¹⁴ Saray totoon mangisisipan a mangiter ya ag da lamlamang totooren et aliling day lorem tan dagem ya ag lamlamang mangipepelag na oran.

¹⁵ Say maanos a panananggoyur napalemek toy binmaton impanpuso, tan naayat toy anggan saray manoley.

¹⁶ No mangan kay dilo, ag mo lalabasen, ta ompan manota ka.

¹⁷ Ag ka mabetbet ya ondadalaw ed kaabay mo, ta ompan onsawad sika, et bosulen to ka.

¹⁸ Say pantasi na tila sumpad kaparan too, et aliling toy ispada, pekpek, odino matdem a pana.

¹⁹ Say panilalo no panaoy kairapan ed toon ag napanmatalkan et singa panggatgat na toon mantenyeg so ngipen to, odino panakar na toon lopuy so sali.

²⁰ Say pankantad toon baleg so ermen to et singa panlakseb ed sakey a too no panaoy ambetel odino pangigosagos na asin ed sugat.

²¹ No narasan so kabosul mo itdan moy naakan to; no napgaan itdan moy nainom to.

²² Diad kababaingan to singa ipapaagtom so ngalab ed olo to, et tumangan ka na Katawan.

²³ No panoy pangitataruk na dagem a nanlapud baybay ed oran, ontan met so pangitataruk na panagtalabutob ed pasnuk.

²⁴ Magmaung niy manayam ed atep na abung nen say miamung ed biin makolkol.

²⁵ Say pakadngel na maung a balitan manlapud arawin pasen et singa iyinom na ambetel a danum no sikay napgaan.

²⁶ Say maung a too ya ontotombuk ed labay na toon maoges et aliling toy akilotan a sobul odino adotakan a bobun.

²⁷ Makapoy ed laman so alabas a pangan na dilo, ontan met a makapoy so pananap na alablabas a dayew.

²⁸ No ag mo napokpokay sikan dili, singa ka siudad a mainomay a dogpaan lapud anggapoy padir to.