Probirbio 23 - Maung a Balita Biblia

-6-

¹ No mirongo kad toon atagey so kipapasen to, ag mo lilingwanan no siopay karongom.

² No masiba ka, dangkaan moy pangan mo.

³ Ag mo kapadakelan so alaen mon mananam a kakanen ya iparongo tod sika; nayarin papalikdoen to ka.

-7-

⁴ Makabat ka no ag ka mankekesaw na alabas ed pampapayaman mo.

⁵ Nayarin naandi lay kuartam diad sakey labat a kakirem, a singa nampayak tan ontikyab ya agila.

-8-

⁶ Ag ka mimikan ed toon maigot odino mamapasya a mangan na mananam a kakanen ya ipaparongo tod sika.

⁷ Sigi, mangan ka labat, kuanto, anta kukuanto labat. Say petepeteg ya inkatoo to et say walad kanunotan to.

⁸ Iyotam so antokaman a nakan mo, tan nadarak ya amin so pangidayew mod sikato.

-9-

⁹ Ag mo sasalien a salitaen ed toon makulang-kulang so nipaakar ed pangikanay olo; ta balawen to labat so ibagam.

-10-

¹⁰ Ag mon balut iyaalis so daan a ketegan, odino sasakopen so dalin da ray olila.

¹¹ Say Katawan so makapanyarin manangyagel da, tan iyalagey toy kanepegan da sumpad sika.

-11-

¹² Mandengel kad bumabangat mo tan manaral kad anggaay nayarian mo.

-12-

¹³ Ag mo panduaduaruwaay pametek mo ed ogaw; ag to ipatey so panlewet mod sikato.

¹⁴ Diad tuay tua nilaban na lewet so bilay to.

-13-

¹⁵ Anak ko, malikeliket ak no sikay magmaliw a makabat.

¹⁶ Manggayaga ak no narengel ta kan mangibabalikas na saray salitan napno na kakabatan.

-14-

¹⁷ Ag mo iibegan iray totoon makasalanan; igalang mo lawas so Katawan.

¹⁸ No onyay gawaen mo, maung so pansumpalan mo diad arapen a panaon.

-15-

¹⁹ Dengel ka, anak ko, magmaliw kan makabat, tan daldalepdep mo so kabibilay mo.

²⁰ Arawian moy olupan da ray buanges odino saray masisiba.

²¹ Mansumpal irad kairapan na panagbilay iray bueken tan saray masisiba. No say gawaen mo et mangan tan onogip labat, ag mabayag ponasan so ikawes mo.

-16-

²² Dengel kad amam; no anggapo, anggapoy bilay mo. No akolaw lay inam, ipanengneng mod sikatoy utang na linawam.

²³ Say katwaan, say kakabatan, say bilin, tan say pakatalus et manepeg iran panggastosan; mabmabli ra kanyan ag mo ra ilalako.

²⁴ Maliket a tuloy so ama a walay anak ton matonung. Nikinon mo so anak mon makabat.

²⁵ Nikinon ka komun na amam tan inam; iter mod inam yan liket.

-17-

²⁶ Anak ko, dengel kan maung ed siak, tan alig mo ak ed kabibilay ko.

²⁷ Saray bibiin marotak tan mikakaloguran et aliling day makapatey a patit.

²⁸ Singa ra matakew a mantatalaran ed sika, tan amayamay iray lalaki a napagmamaliw dan aliwan matoor.

-18-

²⁹ Siopay toon pangaskasiyan tan walad kaermenan? Siopay toon manangigapoy golo tan lawas mariklamo? Siopay asugat ya ag to amtay makasengeg tan say mata to et agaylay balanga?

³⁰ Siopa kasi, no ag say toon buanges, say oniinom na nandoroman taway na alak.

³¹ Ag ka patutukso ed alak anggaman ya ontan lay balanga to, kalinew to ed baso, tan kalamuyot ya inomen.

³² Diad ontombuk a kabwasan naliknam a singa ka aketket na nanditan oleg.

³³ Makanengneng kad satan na nidoma-doma ran bengatla, tan ag ka makapannunot o makapansalita na malinew.

³⁴ Naliknam a singa ka walad pegley na dayat tan ipapaligpalig na ankakabaleg a daluyon so kawalaan mon bapor.

³⁵ Ikuanmo, Nakna ak, balet ag ak asakitan. Pinekpek da ak, balet ag ko alikna. Akin et ag ak naliing? Labay ko niy oninom.