Probirbio 22 - Maung a Balita Biblia

¹ No sikay pampilien ed malinis a kagalangan tan say baleg a kayamanan, pilim so malinis a kagalangan.

² Wala yan pamparaan na toon mairap-bilay tan say toon mayaman: pinalsa ran dua na Katawan.

³ Saray totoon ikakana ray olo ra nanengneng dan onsasabi so kaatapan, et paliisan da, balet saray totoon kulang na kanunotan subaen da, et nasagmak day kairapan.

⁴ Igalang moy Katawan tan mampaabeba ka, et nagamuran moy kayamanan, kagalangan, tan andokey a bilay.

⁵ No inarom so bilay mo, paliisan mo ray patit a mangeerel na saray totoon maoges diad dalan.

⁶ Ibangat mod ogaw no panoy pambilay to, et ag to nalingwanan legan ton mambilay.

⁷ Aripen na toon mayaman iray mairap-bilay. Miutang ka, et aripen kay akautangan mo.

⁸ No mantanem kay bokel na aliwan inkatonung, say deral so onsulming, tan ontonda lay panagpairap mod arum a totoo.

⁹ Nabindisionan ka no mabonluk so panangiter mo tan inagnag mod saray mairap-bilay so kakanen mo.

¹⁰ Paarawim so toon managpaatagey, et ontonda so sangsangan, kolkolan, tan pampapabaingan.

¹¹ No inarom so malinis a puso tan maolimek a panagsalita, nakaarom so ari.

¹² Say Katawan gagawaen ton say katwaan so ag balut napikewet diad panamegley na pamapaneknek ton aliwan tua iray salita na saray totoon matila.

¹³ Say toon mangiras manaayam ed abung; ibabaraan to ya ompan pateyen na lion no ompaway.

¹⁴ Say pikakaloguran et sakey a patiteerelen to ray pamapasnukan na Katawan.

¹⁵ Inkatoo na saray ogogaw so panggawa ray aliwaliwa tan andi-kakanaan, balet say lewet a pametek ed sikara pagmaliwen to ran makalakal.

¹⁶ No manrigalo kad saray mayaman odino pairapen mo ray mairap-bilay pian onyaman ka, magmaliw ka met ni lamlamang a mairap-bilay.

Saray Talomplon Balikas a Napnoy Kakabatan

¹⁷ Mandengel ka ta ibangat kod sika ray imbabaga na saray totoon makabat. Aral mo ray bangat da, tan

¹⁸ manliket ka no nannunotan mo ra tan nayarian mo ran bitlaen.

¹⁹ Labay kon manmatalek kad Katawan; kanyan ibagak irad sika natan.

²⁰ Talomplon balikas iray insulat kon para sika. Napno ra na pakaamta tan maung a simbawa,

²¹ tan ibangat dad sika no anto so peteg a katwaan. Diad ontan, niiter moy tuan ebat ed saray mangibakid sika.

-1-

²² Ag mo tatakewan so mairap-bilay lapud sarasarag mo; ag mo aanamutey pankanawnawam a mamairap ed saray totoon anggapoy nayarian no wala kayod korti.

²³ Say Katawan iyalageyan to ra tan taktakoten toy bilay da ray manataktakot na bilay da.

-2-

²⁴ Ag ka mikakaaro ed saray totoon mapetang na olo tan maruksa,

²⁵ ta ompan naaralan moy ogali ra, et ag ka la mangoman.

-3-

²⁶ Ag mo isisipan a sikay onebat ed saray utang na kaparam a too.

²⁷ No ag ka makabayar, alaen day anggan dokulan mo.

-4-

²⁸ Ag mon balut iyaalis so daan a ketegan ya impasen na saray lalakim.

-5-

²⁹ Ipanengneng mod siak so toon maung so kimey to, et ipanengneng kod sikay toon daeg to ray karaklan tan manepeg a kaiba na saray arari.