Probirbio 21 - Maung a Balita Biblia

¹ Mainomay ya iwanwan na Katawan so kanunotan na ari, a singa kinainomay na panangiwanwan tod agos na kolus.

² Nayarin abaloan mon maptek iray gagawaen mo, balet nunot mo a sisimbangen na Katawan iray getmam.

³ Say panggawa na kaptekan tan katonungan et makapaliket ed Katawan nen say pangisaklang na saray bagat ed sikato.

⁴ Say panagpaatagey tan say ag pangitaltalek so manooley ed saray totoon maoges; saya et kasalanan.

⁵ Apiger moy mamplano, et nawalaan ka na daakan; no magangganat kan manggawa, et kakulangan so nagonggonam.

⁶ Say kayamanan a nanaalam ed saol et kabebekta naandipat, balet aliwan kasakbayan na pangiwanwan tod sika ed sangabay lobuk.

⁷ Saray totoon maoges dudusaen ira na dilin inkaruksa ra, lapud ag da labay so manggaway kaptekan.

⁸ Pikewet so kabibilay na toon managkasalanan, balet maptek so kabibilay na toon matonung.

⁹ Magmaung niy manayam ed atep na abung nen say miamung ed biin makolkol.

¹⁰ Mampipilalek lawas a manggaway kaogsan iray totoon maoges; anggapoy panangasi rad anggan siopa.

¹¹ No nadusa so toon mapaatagey, makaaral so toon anggapoy amta. Say toon makabat makaaral ed nibabangat ed sikato.

¹² Say Dios a sikatoy matonung, amta to so nagagawa ed abung da ray totoon maoges, ipelag to rad kaderalan da.

¹³ No ag mo dengelen so pikekerew da ray mairap-bilay na tulong, ag met narengel so pankerew mo na tulong.

¹⁴ No walay mamapasnuk ed sika, say rigalon niiter a maamut pakepaen toy pasnuk to.

¹⁵ No say inkatonung so nagagawa, maliket iray totoon matonung, balet maermen iray totoon maoges.

¹⁶ Siopamay ag to ikakanay olo to manaalagar ed sikato so patey.

¹⁷ Say panangarod alablabas a liket, alak, tan masamit a panangan et ag to kan balut payamanen.

¹⁸ Saray totoon maoges iyaakar dad sikaran dili so kairapan ya iiter dad saray totoon matonung.

¹⁹ Magmaung niy manayam ed disirto nen say miamung ed makolkol tan mariklamon asawan bii.

²⁰ Saray totoon makabat mambibilay iran daakay kayamanan, balet saray makulang-kulang masiglat dan gagastosen so kuarta a singa inkasiglat na impakala ra.

²¹ Mambilay kan mapangasi tan maptek, et andokey so bilay mo; pagalangan ka na arum a totoo tan ag da ka saolen.

²² Say makabat a pangulo na saray sondalo nalooban toy siudad ya iyaagel na saray mabiskeg a totoo, tan nigeba to ray padir a panmamatalkan da.

²³ No labay mon naarawiay golo alwaran moy panagsalitam.

²⁴ Ipanengneng mod siak so toon mapaatagey et ipanengneng kod sikay toon malastug, matangsit, tan anggapoy panangasi.

²⁵ Say toon mangiras ya ag to labay so mankimey et papateyen to labat so sikaton dili;

²⁶ say gagawaen to labat say pannununot to no antoy labay ton naala. Balet say toon matonung makaiter tan mangiiter a mabonluk.

²⁷ Kabosul na Katawan iray bagat na saray totoon maoges, nagkalalo la no maoges iray getma ran mangibagat.

²⁸ Ag napanisiaan so panagtasi na toon matila, balet napanisiaan so siopaman ya aralem so pannununot tod bengatla.

²⁹ Saray totoon matonung amta ran dugay gagawaen da, balet saray totoon maoges gagawaen day anggaay nayarian dan mankonkonwanan.

³⁰ Anggapoy kakanaay kakabatan, pakatalus, tan say pakaamta na too, no sumpa so Katawan ed sika.

³¹ Nayarian mon iparaan ed bakal iray kabayo, balet say Katawan so mangiiter na pananalo.