Probirbio 20 - Maung a Balita Biblia

¹ Say alak pagmaliwen to kan maingal tan makulang-kulang. Inkakulang-kulang so pambuwek.

² Takotan moy mamapasnuk ya ari a singa itakot mod mangwam a lion; mambibikkel ka no pampasnuken mo.

³ Kagalangan na sakey a too so ompaliis ed golo; balet magolo ray makulang-kulang.

⁴ Say mangiras a dumaralus ya ag mambaka no panaon na panagtanem anggapoy anien to no panaoy panagani.

⁵ Saray kanunotan na too et singa ra danum a walad aralem a bobun, balet say toon walay pakatalus to, nayarian to ran asulen.

⁶ Sasalitaen na balang sakey no panoy inkatoor to, balet salim ya anapen no siopay tuan matoor!

⁷ Mapalar iray anak a say ama ra et matwa tan gagawaen toy kaptekan.

⁸ Say ari onyoyorung ed panagsintinsiaan to tan amta toy kaogsan no nanengneng to.

⁹ Peteg kasin nibaga na sakey a too a malinis so konsinsia to tan apaandi la ray kasalanan to?

¹⁰ Kabosul na Katawan iray mangikakana na masaol a simbangan tan sukatan.

¹¹ Anggan say ogaw ipapanengneng toy inkasikato diad panamegley na saray gawgawa to; nibagam no sikato kasi et matwa tan maung.

¹² Say Katawan initdan to itayo na saray mata a pannengneng, tan saray layag a pandengel.

¹³ No manogip ka lan manogip magmaliw kan mairap-bilay; mankoli ka et dakerakel so naakan mo.

¹⁴ Say sumasaliw manririklamo lawas ya atagtagey so bili, balet ompaway tan ipanpanta toy impakatawal to.

¹⁵ No amtam so sasalitaen mo, walaan ka na bengatlan mabli ni nen say balituk o alahas.

¹⁶ Siopamay makulang-kulang a mangisipan ya ebatan to ray utang na sangkaili, nakaukolan ya iter ton kaletan so kayaryan to.

¹⁷ Antokaman a nanaalam ed kasaolan singa kakanen a mananam, balet ag mabayag magmaliw a singa sankatamukal a buer.

¹⁸ Dengel kad maung a simbawa, et mampalabo ka; no mibakal ka iplanom nin onona.

¹⁹ Say managtalabutob ag balut makaamut. Arawian mo ray totoon mapalalon malabir.

²⁰ No isambam iray ateng mo, mansamput a singa lamparaan a naerep ed kabilongetan so bilay mo.

²¹ No mainomay mo ya apasegep so kayamanan mo, daiset so iter tod sikan kamaungan.

²² Ag ka ombabales ed antokaman a maoges. Diad Katawan ka manmatalek, et tulongan to ka.

²³ Kabosul na Katawan iray mangikakana na masaol a simbangan tan sukatan.

²⁴ Say Katawan so angiplano na bilay tayo; panon sirin a natalusan na siopaman so aarapen na dilin bilay to?

²⁵ Nunot mon maung kasakbayan a mangisipan kay ibagat mo ed Dios; ompan kabebekta et magbabawi ka.

²⁶ Say makabat ya ari narumog to no siopay manggagaway maoges, insan andi-panangasin dusaen to.

²⁷ Say Katawan initdan to tayo na kanunotan tan konsinsia; ag tayo makasanib ed sikatayon dili.

²⁸ Mansiansian walad pakaoley so ari legan a say oley to et maptek, matonung, tan malinis.

²⁹ Say kagalangan na saray tobun-balo et say biskeg da, balet say talonggaring na saray matakken et saray oban na olo ra.

³⁰ No maminsan say makapasinagem a nagawad sikatayo so makaoman na kabibilay tayo.