Probirbio 14 - Maung a Balita Biblia

¹ Ombibiskeg so pamilya lapud kakabatan na saray bibii, balet naderal so pamilya lapud inkakulang-kulang.

² Mambilay kan matwa, et ipapanengneng mon walay panamagalang mod Katawan; mambilay kan maoges, et ipapanengneng mon anggapoy panamagalang mod Katawan.

³ Say panagpaatagey na toon makulang-kulang panlalabiren to na mapalalo; saray salita na makabat a too so mangyaagel ed sikato.

⁴ No anggapoy bakan napandalus mo ag nakargaay kamalir mo; balet no wala napano na ilik.

⁵ Say napampiaan a tasi ibabaga to lawas so tua, balet say ag napampiaan tilan amin so ibabaga to.

⁶ Ag balut narumog na saray totoon mapaatagey so kakabatan, balet saray totoon walay pakaamta mainomay toy manaral.

⁷ Arawian mo ray totoon makulang-kulang; anggapoy nibangat dad sika.

⁸ Akin et makabat so toon masilib? Lapud amta to no antoy gawaen to. Akin et ambagel so toon makulang-kulang? Lapud nunonoten to labat a walay amta to.

⁹ Saray totoon makulang-kulang anggapoy walad sikara so pankakasalanan da, balet saray matonung labay day napirdona.

¹⁰ Say gayagam tan kairapan mo et ag nayarin inagnag mod arum a too.

¹¹ Ageba lay abung na toon maoges, balet manalalagey niy abung na toon matonung.

¹² Say dalan ya abaloan mon duga et nayarin mamaarap ed patey.

¹³ Nayarin niamut na elek so ermen. No naandi lay liket, wala lawas so ermen.

¹⁴ Saray totoon maoges anien day bayar na kaogsan da. Saray totoon matonung natumangan ira, lapud saray gawgawa ra.

¹⁵ Say toon makulang-kulang sisiaen toy amin a bengatla; balet saray totoon walay pakatalus aasikasoen da ray kurang da.

¹⁶ Saray totoon walay pakatalus maalwar ira tan nibatikan day gunigon, balet saray totoon makulang-kulang sagpasagpa rad antokaman a gawaen da.

¹⁷ Saray totoon mapasnuk manggagawa ray andi-kabaliksan; saray totoon lalon makabat mansiasiansia ran mareen.

¹⁸ Saray totoon anggapoy amta nagagamuran day kanepegay inkakulang-kulang da, balet say pakaamta so tumang da ray masilib.

¹⁹ Saray totoon maoges nakaukolan ya onsuko ra ed saray totoon matonung, tan mampaabeba ran onkerew na tulong ed sikara.

²⁰ Say toon mairap-bilay ag labalabay na anggan say kaabay to, balet say toon mayaman dakel so kakaaro to.

²¹ No labay moy maliket, kasian mo ray mairap-bilay; kasalanan so pambalaw ed siopaman.

²² No pankaabigan so gawaen mo panmatalkan tan galangen ka na arum a totoo; no pankaogsan so gagawaen mo, nalilingo ka.

²³ Mankimey ka pian walay napambilay mo; no ananggaan moy salita lan salita, magmaliw a mairap so bilay mo.

²⁴ Kayamanan so tumang na saray makabat a totoo, balet nanaamtaan iray makulang-kulang, lapud inkakulang-kulang da.

²⁵ Say tasin tuay ibabaga to bilay so ilalaban to; no tila ray ibaga to pantratraidoran to ray totoo.

²⁶ Say panangigalang ed Katawan mangiiter na talek tan mangyaarawid kaatapan ed sakey a too tan pamilya to.

²⁷ Labay mon napaliisay patey? Say panangigalang ed Katawan et sobul na bilay.

²⁸ Say inkatalonggaring na sakey ya ari nileletneg ed karakel na totoon ooleyan to; no anggapo ra anggapo met la.

²⁹ No ambetel so olom makabat ka, balet no mipepetang so olom ipapanengneng mo so ontan lan inkakulang-kulang mo.

³⁰ Say mareen a kanunotan pagmamaliwen ton mabiskeg so laman, balet singa kanser so imon.

³¹ No pairapen mo ray totoon mairap-bilay, papabaingan mo so Dios ya amalsad sikara; balet say pangasid mairap-bilay et sakey a panangigalang ed Dios.

³² Saray totoon maoges dederalen na saray dilin kaogsan da; balet saray totoon matonung iyaagel ira na dilin kamaungan da.

³³ Kakabatan so walad balang kanunotan na toon ikakana toy olo to; saray totoon makulang-kulang anggapoy amta ran nipaakar ed kakabatan.

³⁴ Say inkatonung pagmamaliwen ton matalonggaring so sakey a bansa; say kasalanan ipepelag tod kababaingan so anggan dinan a bansa.

³⁵ Pakaliliketan na saray arari iray marunong ya opisyal da, balet dudusaen da ray totoon ag manusumpal na kanepegan da.