Oseas 7 - Maung a Balita Biblia

¹ Kapag labay ko lan paabigen iray totood Israel tan pagmaliwen ko la ra lamet a maaligwas, say kaogsan tan say karotakan labat so sankanengneng kon gagawaen da. Mansasaolan so sakey tan sakey ed sikara; onloloob iran mantakew ed saray abung; sasabaten dan takewan ed dalan iray totoo.

² Ag dan balut ninunnunot ya ag ko nalingwanan ya amin iray kaogsan da; balet aliktub ira na saray kaogsan da, tan sankanengneng ko ra.

Say Agawan Komplut ed Palasio

³ Say Katawan kuanto, Diad panamegley na saray totoo, papalikdoen da so ari tan saray opisyal to.

⁴ Traidor tan aliwa ran matoor ya amin. Say petang na olo ra et singa ambalbalangan ngalab ed pogun ya ag ni ginalaw na panadiro ya anggad naluluto la so masa.

⁵ Diad agew na ponsia na ari binuek day ari tan saray opisyal to tan impagmaliw da ran makulang-kulang.

⁶ On, singa mandarlang a pogun so panagkomplut da. Sanlabin ambalbalangan ngalab so petang na olo ra, et diad kabwasan onliub a singa pool.

⁷ Diad inliub na petang na olo ra pinatey da ray manoley da. Impanso soblayan dan pinapatey iray arari ra, et anggapoy kinmerew ed siak na tulong.

Say Israel tan saray Bansa

⁸ Say Katawan kuanto, Saray totood Israel et singa ra tinapay a kapkapalduay aluto. Manmamatalek irad saray bansad kaliber-liber da,

⁹ et ag da nanaamamtaan a nanaoyusan iray biskeg, lapud sayan gagawaen da. Magano lay anggaan da, et ag da anggan amta.

¹⁰ Say panagpaatagey na saray totood Israel et mantatasi sumpad sikara. Anggan anto so agawa, ag ira pinmawil ed siak a Katawan a Dios da.

¹¹ Singa anggapoy kalakal a malapati so kapara na Israel. Nen inmona saray totoo to akikerew iray tulong ed Egipto, insan ira linma ed Asiria!

¹² Balet ipanat koy iket ko tan erelen ko ran singa saray manok legan dan oonla. Dusaen ko ra lapud kaogsan a ginagawa ra.

¹³ Pakaskasi la ra! Inkaindan da ak tan linmaban irad siak. Naderal ira. Labay ko ran ilaban, balet tila-tila so impangigalang dad siak.

¹⁴ Aliwan masimoon so panagpikasi rad siak, no ag ta singa ra paganon mannangis ed dokulan da. No mampikasi ran onkerew na trigo tan alak, singa ra paganon salsalgeren day laman da. Agaylay pananumlang da!

¹⁵ Nankokomplut ira sumpad siak, anggaman a siak so amabaleg tan amambiskeg ed sikara.

¹⁶ Itutuloy day onsingger ed sakey a dios ya anggapoy pakayari. Ag ira napanmatalkan a singa pikewet a pana. Lapud mapaatagey ed panagsalita iray pangulo ra ompatey irad ispada. Diad ontan elekan ira na saray Egipsio.