Oseas 14 - Maung a Balita Biblia

Say Kerew nen Oseas ed Israel

¹ Sikayo ran totood Israel, pawil kayo la ed Katawan a Dios yo. Imparokul tan impelag kayo na kasalanan yo.

² Pawil kayod Katawan, tan iyapay yo yan pikakasi ed sikato: Pirdonam pan amin iray kasalanan mid sika, Katawan, tan dengel mo pay pikakasi mi; et diad ontan idayew mi ka onung na insipan mi.

³ Ag ka min balut nilaban na saray taga Asiria, tan ag kami niagel na saray kabayon para bakal. Ag min balut la ibagad saray talintao mi a sikaray Dios mi. O Katawan, kakasian mo ray totoo ya anggapoy napiregan da no ag sika lambengat.

Insipan na Katawan ed Israel so Balon Bilay

⁴ Say Katawan kuanto, Papawilen kod siak iray totook. Aroen ko ra ed intiron pusok; nakal lay pasnuk kod sikara.

⁵ Diad saray totood Israel, magmaliw ak a singa oran ed amagan dalin. Ombuskag iran singa saray rosas; onaralem a maung so lamut da, a singa saray kakiewan ed Libano.

⁶ Magmaliw iran singa sibwal na kiew, tan mararakep a singa saray kiew na oliba. Onsamyong so balingit dan singa saray kiew a sidro ed Libano.

⁷ Mambilay iran walad silong na panangyagel ko lamet. Ombaleg iran singa tanaman ed alog, tan mambunga ran singa saray sengeg na kaubasan. Magmaliw iran bantug a singa alak na Libano.

⁸ Saray totood Israel et anggapo lay pibali ra ed saray talintaoy diriyos; ebatan ko ray pikakasi ra tan talimaen ko ra. Singa ak malamlambut a kiew a manalimbeng ed sikara. Siak so panlapwan na saray bindision a para sikara.

Say Pansamput ed sayan Libro

⁹ Talusan komun na saray makabat iray nisulat dia, tan dalepdepen dad puso ra. Maptek iray dalan na Katawan, tan pankukurangan ira na saray matonung a totoo, balet katutumbaan na saray makasalanan lapud ipopolisay da ra.