Nehemias 6 - Maung a Balita Biblia

Saray Komplut a Sumpad kinen Nehemias

¹ Nadngelan di Sanbalat, Tobias, Gesem ya Arabe, tan saray arum nin kalaban mi ya asumpal mi lan nipaalagey so padir tan apansasaip lan amin iray nagnagba, anggaman ya ag mi ni nilira iray puirta.

² Impaibaga di Sanbalat tan Gesem a banaen ko rad sakey a bario diad Patar na Ono, ta labay da ak a pitongtongan. Balet say gagala dad saya et say pangabil dad siak.

³ Kanyan angibaki ak na totook tan impaibagak ed sikara, Amayamay so kimey ko, kanyan ag ak ditan makakar. Ag ko nayarian a patondaen so kimey lapu labat ed pitongtong kod sikayo.

⁴ Amipat da ak a nampabakian, balet nampara so inebat kod sikara.

⁵ Insan diad kumalima pinawitan to ak nen Sanbalat, na sakey a lokas a sulat ya inyawat na sakey ya aripen to.

⁶ Onyay logan na sulat: Imbagad siak nen Gesem a nibabalitad saray totood kaliber-liber a bansa a sika tan saray kaparam a Judio et getma yoy onlaban ed oley, kanyan papasimbaloen yon ipaalagey so padir. Imbaga to ni a pilalek moy magmaliw ya ari,

⁷ tan akitongtongan mo la ray pigaran propita ya ibawag dad Jerusalem a sikay ari na Juda. Andi-duaruwan narengelan ya na Kagalang ya Impirador, kanyan gala la, ta pantongtongan ta yan dua.

⁸ Onyay impaiyakar kon ebat kod sikato: Anggapoy katwaan to yan ibabagam. Sika so nampabrika ed sayan amin.

⁹ Papatakoten da kami labat, pian natondaan so kimey. Nampikasi ak, Balet natan, O Dios, pabiskeg mo ak pa!

¹⁰ Diad sayan panaon, binisitak si Semaya a lakin anak nen Delaya tan apo nen Mehetabel, ta ag makataynan ed abung to. Inkuantod siak, Nepeg ya onamut itan dua ed Masanton Pasen na Timplo, insan ta italak iray puirta, ta onla ra dian mamatey ed sika. Nayarin diad sayan labi so iyakar da dian pamatey ed sika.

¹¹ Inmebat ak ed sikato, Aliwa ak a toon batik-batik tan amut-amut. Abaloan mon onamut ak ed Timplo lapud pangawanan koy bilay ko? Ag ak onla.

¹² Nen ninudnunot ko ya, abirbir kon ag nansalitay Dios ed kinen Semaya, no ag ta inupaan di Sanbalat tan Tobias a mamasakbay ed siak.

¹³ Inupaan dan mamatakot ed siak pian onabuloy ak, et diad ontan mankasalanan ak. Naderal dad satan so kagalangan ko tan napabaingan da ak.

¹⁴ Nampikasi ak, O Dios, nudnunot mo pa yan ginawad siak di Tobias tan Sanbalat, tan dusam ira. Nudnunot mo pa met imay biin propita a si Noadias tan saramay arum a propitan nantataktakot ed siak.

Say Inkasumpal na Kimey

¹⁵ Kayariy impankimey a limamplo tan duay agew, asumpal so impamaalagey lamet ed padir nen kumaduamplo tan liman agew na bulan na Elul.

¹⁶ Nen nadngelan ya na saray kalaban mi ed kaliber-liber iran bansa, abirbir dan abaingan irad saray totoo, lapud amta na balang sakey ya asumpal so kimey lapud tulong na Dios.

¹⁷ Legan na panaon na impankimey ed padir, misusulatan iray pangulo na saray Judio ed kinen Tobias.

¹⁸ Amayamay a totood Juda a migagampi rad kinen Tobias, lapud manugang nen Secanias a lakin anak nen Ara. Sakey ni, inasawa nen Jehohanan ya anak to biin anak nen Mesullam a lakin anak nen Berekias.

¹⁹ Saray totoo sasalitaen dad arap ko iray amin a maabig a gawgawa nen Tobias, tan sasalitaen dad sikato ray amin ya imbabagak. Ag tinmondan nansulat a pamatakot tod siak.