Nehemias 4 - Maung a Balita Biblia

Anggapoy Ayarian da ray Sinmumlang ed Kimey nen Nehemias

¹ Nen nadngelan nen Sanbalat a papasimbaloen ya ipaalagey na saray Judio so padir, mapalaloy petang na olo to tan niluludlurey to kami.

² Diad arap na saray kakaiba to tan saray sondalo na Samaria inkuanto, Antoy linmad olo na saray pangaskasiyan a Judio? Labay dan ipaalagey lamet so siudad? Abaloan da kasi a diad pangibagat da nasumpal da so kimey ed sanagew? Nayarian da kasin gawaen a bato ira may bunton na atemek-temek tan apool-poolan a bengatla?

³ Manalalagey ed diking to si Tobias ya Ammonita, tan kuanton inyarum, Anto kasin padir so nayarian dan ipaalagey? Anggan asod katakelan labat angangko nayarian ton igeba!

⁴ Nampikasi ak, O Dios, dengel mo pay panluludlurey dad sikami. Ompoktal komun ed sikara so panluludlurey dad sikami. Nasamsam komun ya amin iray kayaryan da, nadakep tan niakar irad sananey a bansa.

⁵ Ag mo pa pipirdonaen so kaogsan da tan ag mo lilingwanan iray kasalanan da, ta pababaingan da kamin mangipapaalagey.

⁶ Kanyan intuloy miy pangipapaalagey mi lamet ed padir; ag abayag apaldua mi lay kaatagey to, lapud mapeleng a mankimey iray totoo.

⁷ Nen nadngelan di Sanbalat, Tobias, tan saray totood Arabia, Ammon, tan Asdod ya itutuloy mi so pangipapaalagey lamet ed padir na Jerusalem tan napansasaip mi la ray nagnagba, pinmetang a maung so olo ra.

⁸ Kanyan nankokomplut iran ondogpa ed Jerusalem tan manggawa ray baleg a gewgew.

⁹ Balet nampikasi kamid Dios mi tan labi agew a wala ray mambabantay a milaban ed sikara.

¹⁰ Kinakanta na saray taga Juda yan kanta: Onkakapoy kamid pansasakbat na ambelat; Dakerakel a maung iray deral-deral ya ekalen. Panon min ipaalagey natan so padir?

¹¹ Abaloan na saray kalaban mi ya ag mi ra nanengneng odino ag mi naamtaan so nagagawa, anggad akasabi la ran mamapatey ed sikami tan mamapatondad kimey mi.

¹² Balet mabetbet ya onlad sikami iray Judion manaayam ed kawalaan da ray kalaban mi tan papasakbayan da kami nipaakar ed saray plano da ray kalaban mi sumpad sikami.

¹³ Kanyan initdan ko ray totoo na saray ispada, pika, tan pana, insan ko ra impanayam ed sanib na padir diad kapag pasen ya ag ni asumpal. Kapag boleg walay kawalaan ton pasen a pambantayan.

¹⁴ Anengneng kon mapaga ray totoo, kanyan inkuankod sikara, saray pangulo ra, tan saray opisyal da, Ag kayo natatakot ed saray kalaban tayo. Nudnunot yo a matalonggaring tan makapataktakot so Katawan. Milaban kayo a pangyagel yod saray kadalaan yo, saray anak yo, saray kaasawaan yo, tan saray kaabungan yo.

¹⁵ Nadngelan na saray kalaban mi a naamtaan miy pankokomplut da kanyan abirbir dan say Dios et ginawa ton andi-kakanaan iray plano ra. Insan pinmawil kamin amin a nankimey ed padir.

¹⁶ Nanlapu lad saman, kapalduad saray totook so nankimey tan kapaldua so nangguardia. Wala ray armas dan pika, samper, pana, tan kawes a para laban. Saray pangulo pinabiskeg day linawa na saray totoon

¹⁷ mangipapaalagey na padir. Anggan saray managsakbat sankaegnaan day armas da.

¹⁸ Pati saray mankikimey akasalukbit ed awak da so ispada. Nanayam ed abay ko so makaoley a mamaknul na trumpita diad pamasakbay to.

¹⁹ Inkuankod saray totoo, saray opisyal da tan saray pangulo ra, Asiyan-siyan so kawalaay kimey ed padir kanyan nanaarawiyan itayo.

²⁰ No narengel yoy tanul na trumpita, mantitipon kayod kawalaan ko. Say Dios tayo so kaiba tayon milaban.

²¹ Kanyan inagew-agew, manlapud palbangon ya anggad mansironget, kapalduad sikamiy mankikimey tan kapalduad so akapika a mangguaguardia.

²² Legan to yan panaon, imbagak ed saray totoon makaoley ed kimey a sikara tan saray ontutulong ed sikara et nepeg day manayam ed Jerusalem no labi, pian naguardiaan miy siudad no labi tan makapankimey kami no agew.

²³ Siak, saray kakaibak, saray aripen ko, tan saray managbantay ed siak, et ag mi inekal so kawes mi no labi. Wala lawas ed lima iray armas mi.