Nehemias 12 - Maung a Balita Biblia

Say Listaan na saray Levita tan saray Papari

¹ Say onggendan et say listaan da ray papari tan saray Levitan pinmawil manlapud saray arum a bansan nibantakan da. Kaolup ira nen Zorobabel a lakin anak nen Sealtiel tan si Jesua a Pangulon Pari.

^2-7 Saray Papari: Saraya, Jeremias, Esdras, Amarias, Malluc, Hatus, Secanias, Rehum, Meremot, Iddo, Ginetio, Abias, Miamin, Maadias, Bilga, Semaya, Joiarib, Jedaya, Sallu, Amoc, Helcias, tan Jedaya. Sikara yay lalakin pangulo na amin da ray kapara ran papari nen panaon nen Jesua.

⁸ Saray Levita: Saray onggendan et sikaray makaoley ed panagkanta na saray imno na pisasalamat: Jesua, Binui, Cadmiel, Serebias, Juda, tan Matanias.

⁹ Saray onggendan et sikaray kumakanta na saray ebat: Bacbukias, Unno, tan saray kapara ran Levita.

Saray Kabyangay Boleg nen Jesua a Pangulon Pari

¹⁰ Si Jesua so ama nen Joakim ya ama nen Eliasib; si Eliasib so ama nen Joiada

¹¹ ya ama nen Jonatan; tan si Jonatan so ama nen Jadua.

Saray Pangulo da ray Boleg na Papari

^12-21 Nen pangulon pari si Joakim, saraya so pangulo da ray boleg na papari: Diad boleg nen Sereya, si Meraya Diad boleg nen Jeremias, si Hananias Diad boleg nen Esdras, si Mesullam Diad boleg nen Amarias, si Johanan Diad boleg nen Melicu, si Jonatan Diad boleg nen Sebanias, si Jose Diad boleg nen Harim, si Adna Diad boleg nen Merayot, si Helkai Diad boleg nen Iddo; si Zacarias Diad boleg nen Ginneton, si Mesullam Diad boleg nen Abias, si Zicri a kabyangay boleg nen Miniamin Diad boleg nen Moadias, si Piltai Diad boleg nen Bilga, si Samua Diad boleg nen Semaya, si Jonatan Diad boleg nen Joiarib, si Matenai Diad boleg nen Jedaya, si Uzi Diad boleg nen Sallai, si Callai Diad boleg nen Amoc, si Eber Diad boleg nen Helkias, si Hasabias Diad boleg nen Jedaya, si Natanael.

Say Listaan na saray Pamilya da ray papari tan saray Levita

²² Walay nisinup a listaan da ray pangulo na saray pamilya da ray Levita tan saray papari legan na impanbilay na saray onggendan a Pangulon Papari: Eliasib, Joiada, Jonatan, tan Jadua. Asumpal yan listaan nen impirador na Persia si Dario.

²³ Saray pangulo na saray pamilya da ray Levita et nikorit ed saray awaran, ya angga labat ed panaon nen Jonatan ya apo nen Eliasib.

Saray Nipabetang a Kimey ed Timplo

²⁴ Diad panangipangulo di Hasabias, Serebias, Jesua, Binui, tan Cadmiel naapag-apag ed pigaran grupo iray Levita. Duaran grupo so manebatan a mangidayew ed Dios tan misalamat ed Dios onung na saray bilin nen Ari David a too na Dios.

²⁵ Saray onggendan a guardiay Timplo et makaoley iran mangguardia ed saray kuarton panagsinupan ed abay da ray puirta na Timplo: Matanias, Bacbukias, Obadias, Mesullam, Talmon, tan Acub.

²⁶ Sarayan totoo nambilay ira legan na panaon nen Joakim a lakin anak nen Jesua tan apo nen Josadak, tan legan na panaon nen Nehemias a gobirnador, tan legan na panaon nen Esdras, say parin iskriba.

Insaklang nen Nehemias so Padir na Siudad

²⁷ Nen nisaklang ed Dios so padir na siudad na Jerusalem, atawag a mantitipon ed Jerusalem iray Levitan manaayam ed inerman a pasen. Agaway onya pian makapibiang irad pista na panangisaklang tan diad pankanta na pisasalamat tan pantogtog na saray piangpiang tan saray arpa.

²⁸ Saray kumakantan pamilyay Levita et nanlalapu rad panaayaman da diad kaliber-liber na Jerusalem, diad saray baley a kaliber-liber na Netofa,

²⁹ tan diad Bet-gilgal, Geba, tan Azmavet.

³⁰ Sinumpal na saray papari tan saray Levita so panaglinis onung ed ganggan para sikara, saray totoo, saray puirta, tan say padir na siudad.

³¹ Tinipon kod tapew na padir iray pangulo na Juda, insan ko ra ginawan makaoley ed duaran baleg a grupo a mangiter na pisasalamat ed Dios legan dan manliber ed siudad. Say sakey a grupo linmad kawanan diad tapew na padir tan amaarap ed Puirta na Deral-deral.

³² Tomtombuken nen Hosaya iray kumakanta, insan sikatoy tomtombuken na kapaldua na saray pangulo na Juda.

^33-35 Saray pangulo et tomtombuken ira na saray onggendan a papari a mamapaknul na trumpita: Azarias, Esdras, Mesullam Juda, Benjamin, Semaya, tan Jeremias. Tomtombuken ira nen Zacarias a lakin anak nen Jonatan tan apo nen Semaya. (Saray arum a lalaki to et di Matanias, Micaya, tan Zacur a kabyangay boleg nen Asaf.)

³⁶ Sikatoy tomtombuken na arum iran kabyangay boleg to a di Semaya, Azarel, Milalai, Gilalai, Maai, Natanael, Juda, tan Hanani. Amin da et nanaawit ira na saray panagtogtog na musika a singa saray nantotogtogan nen Ari David a too na Dios. Si Esdras ya iskriba so angipangulo ed sayan grupo diad impankurang da.

³⁷ Diad Puirta na Sobul nantakayan iran amaatagey ed siudad nen David, dinmalan irad palasio nen David, insan ira pinmawil ed padir diad kawalaay Puirta na Danum diad nibokig na siudad.

³⁸ Samay sakey a grupo na totoon misasalamat et linmad kawigi diad tapew na padir. Tomtombuken ko ra. Nilabasan mi so Tori na saray Pogun diad inyakar mid Maawang a Padir

³⁹ manlapud man intuloy miy kurang mi insan nilabasan mi so Puirta nen Efraim, Puirta na Jesana, Puirta na Sira, Tori nen Hananel, tan say Tori na Sanlasus. Nilabasan mi met so Puirta na Karniro insan kami la tinmonda ed Puirta na Guardia.

⁴⁰ Kanyan saramay duaran grupo a mangiiter na pisasalamat ed Dios ed sinmabi rad pasen a kawalaay Timplo. Likud ed saray pangulo a kaibak,

⁴¹ wala met ed grupok iray paparin mamapaknul na trumpita a di: Eliakim, Maaseya, Miniamin, Micaya, Elioenai, Zacarias, tan Hananias;

⁴² tan tomtombuken ira na saray onggendan: Maaseya, Semaya, Eleazar, Uzi, Johanan, Malkias, Elam, tan Ezer. Inkasil-kasil na saray kumakanta so impankakanta ra diad panangipangulo nen Izrahias.

⁴³ Amayamay a bagat so insasaklang dad saman ya agew, tan mapalaloy gayaga na saray totoo lapud ontan lay impamaliket na Dios ed sikara. Akipista met iray bibii tan saray ogogaw. Narengel ed arawdawi so kasil na bosis dan amin.

Niiter so Nakaukolan ed Panangigalang ed Timplo

⁴⁴ Diad saman a panaon nipasen iray pigaran lalaki a makaoley ed saray kuarton panagsinupan na saray tulong para Timplo a pati saray kakaplo, tan say trigon ononan anien tan say bungan ononan borboren kapag taon. Sarayan totoo so makaoley a manala, diad kaalogan na nandoroman siudad, na saray rigalon iter na totoo a para saray papari tan saray Levita onung na ibabagay Ganggan. Aliketan ya amin iray totoo na Juda ed saray papari tan saray Levita

⁴⁵ a mangoonur na panaglinis onung ed ganggan tan saray arum a sirimonyan ingganggan na Dios. Saray kumakanta tan saray tumutogtog ed Timplo tan saray guardia et ginagawa da met iray kimey da onung na saray totontonen ya impaakseb nen Ari David tan Solomon ya anak to.

⁴⁶ Manlapud panaon nen Ari David tan si Asaf saray tumutogtog tan saray kumakanta so angipangulo ed saray kantan pangidayew tan pangiter na pisasalamat ed Dios.

⁴⁷ Diad panaon nen Zorobabel tan diad panaon met nen Nehemias, amin da ray totood Israel naniiter iran inagew-agew na saray rigalon nakaukolan na saray tumutogtog tan saray kumakanta tan saray guardiad Timplo. Saray totoo et naniiter ira na masanton bagat ed saray Levita, tan saray Levita iniiter day kanepegan a betang na saray papari.