Mikias 5 - Maung a Balita Biblia

¹ Sikayo ran totood Jerusalem, pantitipon yo ray sondalo yo! Aliktub itayo la! Dodogpaan da ray pangulo na Israel!

Insipan na Dios so sakey a Manoley a taga Betlehem

² Say Katawan kuanto, Betlehem Efrata, sakey ka ed saray ankekelag a baley na Juda, balet sika so panlapwan na sakey a manoley ed Israel, a say sengeg na pamilya to et natonton ed saray inmona-ona ran panaon.

³ Kanyan say Katawan paolyan ton naoleyan na saray kalaban da iray totoo to ya anggad say mangyanak ed samay manoley et inyanak to la. Diad satan saray kabansaan ton nibantak ed arum a bansa et mikasakey irad saray kapara ran totood Israel.

⁴ No sikatoy onsabi, oleyan to ray totoo to idad panamegley na biskeg a manlalapud Katawan; walad sikato so dilin pakapanyari na Katawan a Dios. Mambilay ya arawid kaatapan iray totoo to, lapud birbiren na saray katoowan ed intiron mundo so inkatalonggaring to,

⁵ tan sikatoy mangyakar na kareenan. No looban na saray taga Asiria so bansa tayo, mangibaki tayo na saray mabisbiskeg a pangulo ya onlaban ed sikara.

Say Kilalaban tan say Dusa

⁶ Diad pakapanyari ra nadakep day Asiria, say dalin na Nimrod, et iyagel da tayod saray taga Asiria no looban day dalin tayo.

⁷ Say totood Israel a nakeraan a mabilay et magmaliw iran singa ambetel a linaew ya impelag na Katawan ed saray amayamay a bansa, singa ra mayamayan ompepelag ed saray ombabaleg a tanaman. Manmatalek irad Dios, aliwan diad too.

⁸ Saray atilak ed saray bansa et magmaliw iran singa lion a manaanap ed takel odino diad pastolan na kanen to; onlad kawalaan da ray karniro, tekmelan to ra, tan bingbingkasen to raet anggapoy makapangyagel.

⁹ Taloen na Israel iray kalaban to tan deralen to ra.

¹⁰ Say Katawan kuanto: Diad satan a panaon, ekalen kod sikayo ray kabayo yo tan deralen ko ray karwahi yo.

¹¹ Deralen ko ray siudad ed dalin yo tan igebak ya amin iray tirinsira yo.

¹² Deralen ko ray ikakana yon galing tan oputen kon amin iray managparles yo.

¹³ Deralen ko ray talintaoy diriyos yo tan saray masanton baton lusek yo; ag yo lad satan galangen iray bengatlan ginagawa yo.

¹⁴ Igebak iray imahin nen diosan Asera ed dalin yo tan deralen ko ray siudad yo.

¹⁵ Lapud mapalalon pasnuk ko ombawi ak ed amin da ray bansa ya ag inmonur ed siak.