Mikias 3 - Maung a Balita Biblia

Sinumpa nen Mikias iray Pangulo na Israel

¹ Dengel kayo, sikayo ran manoley ed Israel! Sikayo komun so nepeg a mannunot na nipaakar ed katunongan,

² balet kabosul yo so kamaungan tan inaro yo so kaogsan. Kakataten yon mabilay iray totook tan bibingbingkasen yoy laman da.

³ Sisiraen yo ray totook, lalakniten yoy baog da, tetemeken yoy pokel da, tan tetegtegen yoy laman da a singa karnin ikargad kaldiro.

⁴ Onsabiy panaon ya ontawag kayod Katawan, balet ag to kayo dengelen. Ag to ebatan iray pikakasi yo, lapud nanggagawa kayoy kaogsan.

⁵ Saray totook et apalikdo ra na saray propitan mangisisipan na kareenan ed saray mambabayar ed sikara, balet tataktakoten dad bakal iray ag mambabayar. Say Katawan kuantod sarayan klasiy propita,

⁶ Sikayon propita, ngalngali la manganggay agew yo; naselekan kayo la na agew. Lapud papalikdoen yo ray totook, ag kayo la makanengneng na pasingayew, tan ag kayo la makapampropisiya na tua.

⁷ Napelag ed kababaingan iray totoon mampropisiya na nipaakar ed nagawad arapen. Nabaingan ira lapud anggapoy naalagar dan ebat na Dios.

⁸ Balet para siak, say Katawan papanoen to ak na ispiritu to tan say pakayari to. Iitdan to ak na ispiritu na katunongan tan say biskeg na linawan mangibagad saray totood Israel na saray kasalanan da.

⁹ Dengel kayod siak, sikayo ran manoley ed Israel a mamobosul na katunongan tan mamipikewet na kaptekan.

¹⁰ Ipapaalagey yoy siudad na Dios, say Jerusalem, diad pundasion na panagpatey tan kaogsan.

¹¹ Manaawat na pasoksok ed panooley da iray pangulo na siudad, miuupa ray papari ed pangipapatalus day Ganggan, tan pababayaran iray propita ed pangipapaamta ra na saray puyan da. Et ibabaga ran amin a walad sikara so Katawan. Anggapoy onsabin deral ed sikami, kuanda. Say Katawan et walad sikami.

¹² Kanyan lapud maoges kayo, nabakan singa alog so Sion, magmaliw a bunton na deral-deral so Jerusalem, tan magmaliw a takel so pokdul a kawalaay Timplo.