Mikias 2 - Maung a Balita Biblia

Say Pansumpalan da ray Mamapairap ed saray Mairap-bilay

¹ Pangaskasiyay kipapasen da ray abangon a mandokdokul tan mamplaplano a manggaway kaogsan. Kasabiy kabwasan, no wala lay panakanawnawa ra, gawaen da lay maoges a plano ra.

² No labay day kaologan, sakopen da ra; no labay day kaabungan alaen da ra. Maatap so kipapasen na amin a pamilya na balang too odino say kayaryan to.

³ Kanyan sa Katawan kuanto, Mangyakar ak na deral ed sikayo tan ag yo ya nibatikan. Nagulo-gulo kayo, tan diad satan ag kayo la makapanakar a mataltalker so tenger yo.

⁴ No onsabiy tan a panaon, tongtongen na saray totoo a sakey ya alimbawa so inkaderal yo tan kantaen da yan kanta na ermen a nipaakar ed inkagawa yo: Sigput kamin aderal! Inala na Katawan so dalin mi Tan inter tod saray anakep ed sikami.

⁵ Kanyan no onsabiy panaon a nipawil lad saray totoo na Katawan so dalin, anggapoy nabetangan yo.

⁶ Saray totoo pupulongan da ak a kuanda, Ag mo kami pupulongan. Ag mo tan ipupulong ed sikami. Say Dios et ag to kami ipelag ed kababaingan.

⁷ Abaloan mo a nisamba iray totood Israel? Naoput ta lay anos na Katawan? Gawaen to ta ra tay ibabagam? Ag ta marakep so panagsalita to ed saray manggagaway katunongan?

⁸ Say Katawan inmebat, Dodogpaan yon singa kalaban iray totook. Onsesempet iran nanlapud bakalan iray lalaki ta abaloan dan arawi rad kaatapan no wala rad kaabungan, balet wadtan kayon manaalagar a manakew na akasolung a kawes da.

⁹ Patataynanen yod inararo ran kaabungan da iray bibii ed saray totook, tan tinatakew yod saray anak da so bindision kod ando lan ando.

¹⁰ Alagey kayo tan lakayo la; maatap la diay bilay. Lapud saray kasalanan yo niganan naderal yan pasen.

¹¹ Say labay na sarayan totoo et say propitan manakar-akar a tila-tilaan tan palpalikdoen to ray totoo a kuanto, Ipapasakbay kon nawalaan kayo na daakan ya alak tan mabayanin iinomen.

¹² Balet pantitiponen ta kayo, amin yon totood Israel a nakdaan. Tiponen ta kayon singa saray karniron ompapawil ed koral da. Say dalin yo et napano lamet na amayamay a totoo a singa sakey a pastolan a napno na karniro.

¹³ Say Dios lokasan toy dalan para sikara tan iwanwan to ra manlapud inkibantakan da. Ompaway irad saray puirta na siudad tan nabolus la ra. Say Katawan a dili ya ari ra so mangiwanwan ed sikara.