Mateo 8 - Maung a Balita Biblia

Pinaabig nen Jesus so Toon Akating

¹ Linmeksab si Jesus a nanlapud nipokdul a pasen tan tinombuk na amayamay a totoo.

² Linmad sikatoy sakey a toon akating, tinmalimukor ed arap nen Jesus tan inkuanto, Katawan, no labay mo, nayarian mo ak a paabigen.

³ Inyonat nen Jesus so lima to, diniwit to tan inmebat, Labay ko. Abig ka la! Inmabig a tampol imay toon akating.

⁴ Insan binilin nen Jesus, Ag mo yan balut ibabalitad anggan siopa. Lakad pari tan panengneng ka, insan ka mangibagat onung ed Ganggan nen Moises, pian napaneknekan ed balang sakey ya inmabig ka la.

Pinaabig nen Jesus so Katulong na Kapitan

⁵ Kasabi nen Jesus ed Capernaum, inmasingger ed sikato so sakey a kapitan na sanlasus a sondalo tan akikasi. Inkuanto,

⁶ Katawan, mansasakit so katulong ko. Wadmad abung ya akarokul tan ag makagalaw. Mapalaloy kakairapan to.

⁷ Laen kon paabigen, kuanen Jesus.

⁸ Balet inmebat imay kapitan, Katawan, ag ak manepeg a laen mo nid abung ko. Ibagam labat lay salita et onabig lay katulong ko.

⁹ Ta sakey ak met a wala silong na pakaoley na arum a totoo, tan wala met iray sondalo ed silong na pakaoley ko. Kanyan no kuankod sakey, Laka! onla; no kuankod sananey, Gala! ondago. No iganggan kod aripen ko Gawam ya! gawaen to.

¹⁰ Mankelaw si Jesus nen nadngel to ya. Inkuantod saray totoon manomtombuk ed sikato, Kuankod sikayo: ag ko ni akarumog na singa onyan pananisiay too, ya anggan diad Israel.

¹¹ Tandaan yo ya! Amayamay iray manlapud bokig tan sagur a mirongod kindi Abraham, Isaac, tan Jacob ed Panariay tawen.

¹² Balet saray nepeg day walad Panarian et nibantak irad paway ya ambilbilonget, tan diman ira onakis tan onngayet iray ngipen da.

¹³ Insan inkuanen Jesus ed samay kaiptan, Nayarian mo lay onsempet. Nagaway kekerewen mo, onung ed pananisiam. Inmabig ed saman a bekta imay katulong to.

Amayamay iray Pinapaabig nen Jesus

¹⁴ Linmay Jesus ed abung nen Pedro, tan anengneng ton mansasakit so biin katolangan nen Pedro. Napepetang, kanyan akarokul.

¹⁵ Binembenan nen Jesus so lima to, et nakal so petang to. Binmangon tan sinirbian toy Jesus.

¹⁶ Nen labi la, inyakar na saray totoo ed kinen Jesus iray dakerakel ya inaponan na saray dimonyo. Pinapaekal to ray dimonyo diad sakey labat a salita to, tan pinapaabig ton amin iray mansasakit.

¹⁷ Ginawa to ya, pian nasumpal so imbaga nen propita Isaias, Sikaton diliy nansakbat na saray kakapoyan tayo, tan inekal to ray sakisakit tayo.

Saray Malabay ya Ontombuk ed kinen Jesus

¹⁸ Nen anengneng nen Jesus ya aliber na amayamay a totoo, ingganggan tod saray disipulo to ya onla rad biek na dayat.

¹⁹ Walay sakey ya iskriban inmasingger ed sikato. Maistro, kuanto, sipaparaan ak a milad anggan iner a laen mo.

²⁰ Inmebat si Jesus, Wala ray ongib a panaayaman da ray asod katakelan, tan wala met iray obung da ray manok ed tagey, balet anggapoy anggan narokulan na Anak na Too.

²¹ Sakey met a lakin disipulo so nankuan, Katawan, abuloyan mo ak pa nin onsempet a mangipompon ed kindi amak.

²² Mila kad siak, kuanen Jesus, tan paolyan mo la ray inaatey a mangipompon na inaatey da.

Pinatonda nen Jesus so Bagyo

²³ Linmogan si Jesus ed baloto a kaiba to ray disipulo to.

²⁴ Kabebekta sinmabiy baleg a bagyo ed dayat, tan ngalngali la natabunan na daluyon imay baloto. Balet naogip si Jesus.

²⁵ Saray disipulo nila ran binangon tan inkuanda, Ilaban mo kami, Katawan, ta onlelereg itayo la!

²⁶ Akin et ontan lay takot yo? kuanen Jesus. Agaylay kapoy na pananisia yo! Inmalagey ed satan si Jesus, tan ingganggan ton ontonday bagyo tan saray daluyon. Tinmondan tuay bagyo tan dinmeen so dayat.

²⁷ Mankelaw iran amin tan inkuanda, Anton too ya kasi, et pati say dagem tan saray daluyon et ontotoluk irad sikato?

Pinaabig nen Jesus so Duaran Inaponay Dimonyo

²⁸ Nen sinmabiy Jesus ed lugar da ray Gadarino, diad nibaliw na dayat, inabet na duaran totoo a nanlapud saray inongib a lobuk. Inaponay dimonyo ra yan dua tan masebesebeg ira, kanyan anggapoy ondaralan ed saman a pasen.

²⁹ Inmeyaeyag iran tampol, Antoy getmam a gawaen ed sikami, Anak na Dios? Linma ka mamairap ed sikami, anggan ag ni asabiy panaon?

³⁰ Diad asingger diman, wala ray baboy a manaalibok.

³¹ Kinerew na saray dimonyo ed kinen Jesus, No paekalen mo kami, ibaki mo kami pa lad saraman a baboy.

³² Laki la, kuanen Jesus. Kanyan inmekal la rad saramay duaran lalaki tan linma rad saramay baboy. Balet batik ya amin ira may baboy tinmaboy irad dayat, tan nalner ira.

³³ Binmabatik ira may mankokomponi na saray baboy, tan kasabi rad baley, imbabalita ra so amin ya agawa. Imbabalita ra met no antoy nagmaliwan da ra may duaran inaponay dimonyo.

³⁴ Kanyan linma ray amin ya ombaley a mangabet ed kinen Jesus. Nen anengneng da, kinerew dad sikaton ontaynan lad lugar da.