Mateo 7 - Maung a Balita Biblia

Say Panintinsiad Kaparan Too

¹ Ag yo sisintinsiaay kapara yon too, pian ag ki met sintinsiaay Dios.

² Ta no panoy panisintinsia yod arum a too, ontan met so panisintinsia na Dios ed sikayo; tan no panoy panusukat yod arum a too, ontan met so panusukat na Dios ed sikayo.

³ Akin et iimanoen moy mokat ed matay agim, balet et ag mo nanaimanoy troson wadtad dilin matam?

⁴ Panoy pangibagam ed agim, Gala pa ta ekalen koy mokat ed matam, no walay troso ed dilin matam?

⁵ Mansimpisimpitan! Ekal mo nin onona so troson wadtad matam, insan ka makanengneng a maung tan naekal moy mokat ed matay agim.

⁶ Ag yo iiter ed saray aso so bengatlan masanto, ta poliktaran tan ketketen da kayo. Ag yo met ibabantak ed saray baboy iray alahas yo, ta gatingatinan da ra labat.

Say Pakayari na Pikakasi

⁷ Kerew kayo, et naitdan kayo. Mananap kayo, et makalmo kayo. Toktok kayo, et nalokasan a para sikayo so puirta.

⁸ Ta naitday siopaman a mikerew; makalmoy siopaman a mananap; tan nalokasay siopaman ya ontoktok.

⁹ Sikayo ran ama, iter yo kasiy bato ed anak yo no onkerew na tinapay?

¹⁰ O itdan yo kasiy oleg no mikerew na sira?

¹¹ No sikayo, anta maoges kayo, et amta yoy mangiter na pankaabigay anak yo, lalo la sirin a say Ama yon walad tawen et itdan to ray onkerew ed sikato na bengatlan pankaabigan da.

¹² Kanyan gawa yod kapara yon totoo so labay yon gawaen da met ed sikayo. Sikato ya so labay ya ibaga na Ganggan nen Moises; sikato ya met so imbabangat da ray propita.

Say Mainget a Puirta

¹³ Loob kayod mainget a puirta, ta maawang so puirta tan mainomay so dalan a mamaarap ed impirno, tan sikato yay dadalanen na amayamay a totoo.

¹⁴ Balet mainget so puirta tan mairap so dalan a mamaarap ed bilay, tan dagdaiset iray makakalmod sayan dalan.

Diad saray Gawgawa so Pakabirbiran

¹⁵ Manalwar kayod saray tila-tilan propita. Omparontal irad sikayo a singa ra karniro balet, diad tuay tua, singa ra asod katakelan.

¹⁶ Nabirbir yo rad panamegley na gawgawa ra. Ta say ubas ag naborbor ed kasabitan, tan say igos ag naborbor ed kiew ya aliwan igos.

¹⁷ Say maung a kiew mambunga met na maung; say makapoy a kiew mambunga met na makapoy.

¹⁸ No maung so kiew, ag makapambungay makapoy; no makapoy so kiew, ag makapambungay maung.

¹⁹ Say kiew ya ag mambungay maung, popoen tan poolan.

²⁰ Kanyan sirin, nabirbir yo ray tila-tilan propita diad panamegley na gawgawa ra.

Ag ta kayon Balut Kabat

²¹ Aliwan amin da ray ontawag ed siak na Katawan, Katawan, so makaloob ed Panariay tawen, no ag labat saray manumpal ed linaway Amak a walad tawen.

²² No onsabiy Agew na Okum, dakerakel iray mangibagad siak na: Katawan, Katawan! Diad ngaran mo nampupulong kami, pinapaekal mi ray dimonyo tan nanggagawa kami ray milagro!

²³ Balet ikuankod sikara, Ag ta kayon balut kabat. Arawi kayod siak, sikayon managgaway kaosgan!

Saray Duaran Angipaalagey na Abung

²⁴ Kanyan siopamay ondengel tan manumpal ed sarayan salitak, aliling toy sakey a toon makalakal ya angipaalagey ed bato na abung to.

²⁵ Sinmabiy maples ya oran, dinmelap, tan katekep to niy maksil a bagyon binmasig ed saman ya abung. Ag balet nagba, ta bato so pundasion to.

²⁶ Siopamay ondengel ed sarayan salitak et ag to ra lamlamang sumpalen, aliling toy sakey a toon anggapoy kalakal ya angipaalagey ed buer na abung to.

²⁷ Sinmabiy maples ya oran, dinmelap, tan katekep to niy maksil a bagyon binmasig ed saman ya abung. Nagba yan abung, tan makapataktakot so inkagba to!

Say Pakayari nen Jesus

²⁸ Kasumpal to ra yan imbaga nen Jesus mankelaw iray totood impambangat to,

²⁹ ta imbangat to ran walay pakayari, aliwan singa panagbangat da ray iskriba.