Mateo 28 - Maung a Balita Biblia

Inmolid Bilay si Jesus

¹ Kasumpal na Agew na Panagpainawa, nen manlimatad agew na Simba, si Maria Magdalena tan samay sakey a Maria linma rad lobuk, ta nengnengen da.

² Biglan yinmegyeg na maksil. Linmeksab a nanlapud tawen so sakey ya anghil, insan to intolin imay insaran bato, tan niyorungan to.

³ Maliwliwawan singa kirmat so lupa to, tan ampotipotin maung so kawes to.

⁴ Diad takot da ra may guardia ed samay anghil, manggiwgiw ira tan nagmaliw iran singa inatey.

⁵ Akisalita may anghil dad saramay bibii, Ag kayo natatakot. Kabat kon aanapen yoy Jesus ya impasak ed krus.

⁶ Andi dia, ta inmoli lad bilay, onung na imbaga to. Singger kayo tan nengneng yoy pasen a dinokulan to.

⁷ Ganatan yo lay onla tan ibaga yod saray disipulo to, Inmolid bilay si Jesus tan onona nen sikayo ya onlad Galilea. Diman yo nanengneng! Tandaan yoy imbagak ed sikayo.

⁸ Maganat ira sirin a linma la tan batik iran mangibagad saray disipulo to. Makaliliket ira, balet nantaruk na takot so liket da.

⁹ Kabebekta inabet nen Jesus ira tan inkuanto, Say kareenan komuy walad sikayo! Sinmingger irad sikato, inegnaan da ray sali to tan inggalang da.

¹⁰ Inkuanen Jesus ed sikara, Ag kayo natatakot. Laka yo tan ibaga yod saray agagik ya onla rad Galilea, tan diman da ak nanengneng.

Say Imbalitay Guardia

¹¹ Kasiput da ra may bibii, pigarad saramay sondalon nambantay na lobuk so pinmawil ed siudad, tan imbaga rad saray manonan papari iray amin ya agawa.

¹² Nantitipon iray manonan papari tan saray mamatakken na baley, tan nantotongtongan da no panoy gawaen da. Initdan da ra may guardia na dakerakel a kuarta

¹³ tan inkuanda, Ibaga yod saray katoowan a linma ray disipulo to tan tinakew day bangkay to, nen naogip kayo.

¹⁴ No narengelan ya na Gobirnador, ag kayo mapaga, ta sikamiy makaoley a mitongtong ed sikato.

¹⁵ Inawat na saramay guardia may kuarta, tan inonur day pagagawa rad sikara. Anggad sayan agew, onyay nibabalita ed saray Judio.

Nampanengneng si Jesus ed saray Disipulo to

¹⁶ Linma ra may labinsakey a disipulo ed Galilea, diad palandey ya imbilin nen Jesus a laen da.

¹⁷ Nen anengneng day Jesus inggalang da, anggaman a wala ni ray manduaruwad sikara.

¹⁸ Inmasingger si Jesus tan inkuantod sikara, Niiter lad siak so amin a pakayari dimad tawen tan diad dalin.

¹⁹ Kanyan, laka yod saray katoowan ed amin a bansa tan gawa yo ran disipulok. Binyagan yo ra diad ngaray Ama tan diad Anak tan diad Ispiritu Santo,

²⁰ tan ibangat yo ran mangonur ed amin ya ingganggan kod sikayo. Tan tandaan yo! Siak, ibaan ta kayo lawas anggad pansamput na panaon.