Mateo 19 - Maung a Balita Biblia

Say Bangat nen Jesus a nipaakar ed Pansiyay Sanasawa

¹ Kasumpal nen Jesus ya imbaga ra ya, tinmaynan ed Galilea tan linmad lugar na Judea, diad nibaliw na Ilog na Jordan.

² Tinombuk na amayamay a totoo, tan diman to pinapaabig iray mansasakit.

³ Wala ray Pariseon sinmingger ed sikato, ta labay dan erelen ed salita to. Tinepet da, Iyaabuloy kasi na Ganggan ya isian na sakey a laki so asawa to ya anggan antoy makasengeg?

⁴ Inmebat si Jesus, Ag yo ta nababasad Masanton Sulat a nanlapud gapo et pinalsay Dios so laki tan bii?

⁵ Tan inkuay Dios, Sikato yay makasengeg a taynan na laki so ama tan ina to tan iyamung toy asawa to, tan mankasakey iran dua.

⁶ Kanyan aliwa la ran duara no ag ta saksakey la ran laman. Ag nepeg sirin a siyaney too so impankasakey na Dios.

⁷ Tinepet na saray Pariseo, Akin sirin et ingganggan nen Moises ya itdan na laki so asawa to na kasulatay pansiyan insan to isian?

⁸ Inkuanen Jesus, Inyabuloy nen Moises a nayarian yon isiay kaasawaan yo lapud anawet so puso yo. Balet aliwan onyan talaga nen kagapoy mundo.

⁹ Kanyan kuankod sikayo: mikaloguray siopaman a lakin mangisian ed asawa to tan mangasaway sananey, no ag milalaki so asawa to.

¹⁰ Inkuanda ray disipulo, No ontay kipapasen na laki tan say asawa to, lalon maung ni siriy ag mangasawa.

¹¹ Inkuanen Jesus, Aliwan para amin a lalaki yan bangat, no ag labat para saray angiteray Dios.

¹² Ta nandoromay makasengeg no akin et ag mangasawa ray lalakin arum. Wala ray ag mangasawa lapud inanak iran ag da nayariay mangasawa; wala met iray ag da nayarian lapud gaway too; saray arum, balet, ag ira mangasawa lapud panlilingkur dad Panariay tawen. Siopamay makatombuk ed sayan bangat sikato yay tombuken to.

Binindisionan nen Jesus iray Ogogaw

¹³ Wala ray totoon angawit na ogogaw ed kinen Jesus, ta labay dan itapew to ray lima tod sarayan ogogaw tan ipikasi to ra. Balet nampasnuk iray disipulo ed sarayan totoo.

¹⁴ Inkuanen Jesus, Paolyan yo ray ogogaw ya ondagod siak. Ag yo ra sesebelan, ta saray totoon singa sarayan ogogaw so makankien na Panariay tawen.

¹⁵ Intatapew to ray lima tod sikara, insan la linma.

Say Mayaman a Tobun-balo

¹⁶ Aminsan, walay sakey a lakin linmad kinen Jesus. Inkuanto, Maistro, antoy maung a gawaen ko, pian nagamuran koy bilay ya andi-anggaan?

¹⁷ Inmebat si Jesus, Akin et tetepetan mo ak no antoy maung? Saksakey labat so maung. No labay mon nagamuray bilay, onur mo ray ganggan.

¹⁸ Anto ra tan a ganggan? tepet to. Inmebat si Jesus, Ag ka mamapatey; ag ka mikakaloguran; ag ka mantatakew; ag ka mantitila ed pantasim;

¹⁹ igalang moy amam tan inam; tan arom so kaparam a too a singa panangarom ed sikan dili.

²⁰ Inkuanto may balolaki, Oonuren ko la ra yan amin. Anto niy kakulangan ko?

²¹ Inkuanen Jesus ed sikato, No talagan labay mon anggapoy kakulangan mo, ilakom ya amin so kayaryan mo, insan mo iter so panlakoan mo ed saray mairap-bilay. Nawalaan kad satan na kayamanan ed tawen. Insan ka dia ompawil ya ontombuk ed siak.

²² Kadngel tod saya, maermen ya inmalis lapud agaylay inkayaman to.

²³ Inkuanen Jesus ed saray disipulo to, Kuankod sikayo a mairap na toon mayaman so onloob ed Panariay tawen.

²⁴ Kuanko nid sikayo a mainomay niy kamilyon onloob ed abut na dagom nen say toon mayaman ya onloob ed Panariay Dios.

²⁵ Nen nadngel ya na saray disipulo, ontan lay pankelaw da kanyan tinepet da, Siopay nayarin nilaban sirin?

²⁶ Ninengneng nen Jesus ira tan kuanto, Ag nagawaan ya na too, balet nagawaan na Dios iray amin a bengatla.

²⁷ Nansalitay Pedro, Ag mo lilingwanan a tinaynan miy amin a bengatla tan tinmombuk kamid sika. Antoy nitumang ed sikami?

²⁸ Inkuanen Jesus, Kuankod sikayo a no say Anak na Too et akayorung lad mapagalang a trono diad Balon Mundo, sikayon ontotombuk ed siak onyorung ki met ed labinduan trono a manintinsia ed saray labinduan boleg na Israel.

²⁹ Tan siopamay taynan toy abung, saray agagin lalaki o bibii, say ama o ina, saray anak, o saray dalin lapud siaksikatoy natumangan a maminlasus tan tawiren toy bilay ya andi-anggaan.

³⁰ Balet amayamay iray makakaona natan a naonur, tan amayamay met iray nanaonur natan a makaona.