Mateo 14 - Maung a Balita Biblia

Say Impatey nen Juan a Managbinyag

¹ Diad saman met a panaon so impakadngel nen Herodes a manooley ed Galilea na balitan nipaakar ed kinen Jesus.

² Inkuanen Herodes ed saray katulong to, Si Juan a Managbinyag so tatawagen day Jesus. Inmolin binmilay, kanyan ontan lay pakayari to.

³ Ta impaerel nen Herodes si Juan, impabalur to, insan to impaipriso. Ginawa to ya, lapud kinen Herodias ya asawa nen Felipe. Si Felipe agi nen Herodes.

⁴ Amimpiga-pigan imbaga nen Juan ed kinen Herodes, Maoges ya iyamung moy Herodias, ta asaway agim!

⁵ Kanyan labay nen Herodes a pateyen si Juan, balet antakot ed saray Judio ta ipapasen dan propita si Juan.

⁶ Nen agew na inkianak nen Herodes, sinmayaw so marikit ya anak nen Herodias ed arap da ray sangkaili. Aliketan a maung si Herodes.

⁷ Kanyan inkuanto, Sambaan ko ya anggan antoy kerewen mo, iter kon iter ed sika!

⁸ Onung na imbilin nen ina to kinerew to, Iter mod siak ed bandihado, diad sayan bekta, so olo nen Juan a Managbinyag!

⁹ Naermenay Herodes, balet lapud samay sipan ton nadngel na amin a sangkaili to, ingganggan ton iter day kerew to may marikit.

¹⁰ Kanyan impapotul toy olo nen Juan.

¹¹ Akakargad bandihado may olo ya inter dad samay marikit, insan to met inter ed kinen ina to.

¹² Sinmabi ray disipulo nen Juan tan inala ray bangkay to ya impompon. Insan da imbalitad kinen Jesus so agawa.

Pinakan nen Jesus so Liman Libon Totoo

¹³ Kadngel nen Jesus ed sayan balita, linmogan ed sakey a baloto, tan linman nambukbukor ed sakey a pasen a mareen. Balet nen nadngelan na totoo, tinaynan da ray balbaley da tan nanakar iran tinmombuk ed kinen Jesus.

¹⁴ Sinmakbit si Jesus ed gilig na danum. Nen anengneng toy amayamay a totoo, akasian to ra tan pinaabig to ray mansasakit ya awit da.

¹⁵ Nen onngangarem la, inmasingger iray disipulo to tan kuanda, Arawid kaabungan yan pasen, insan onseselek lay agew ni met. Ibakim la ray totoo, ta manaliw iray kanen da diad kaliber-liber iran bario.

¹⁶ Ag nakaukolan ya onsempet la ra, kuanen Jesus. Sikayo ingey mangiter na kanen da.

¹⁷ Inmebat ira, Limlimaray tinapay tan dugduaray sira tayo.

¹⁸ Awit yo ra dia, kuanen Jesus.

¹⁹ Pinayorung tod karikaan iray totoo. Inala tod satan ira may limaran tinapay tan duaran sira, tinmangay ed tawen tan akisalamat ed Dios. Pinipisag to ra may tinapay tan imbaga tod saray disipulo ya ibunog dad saray totoo.

²⁰ Angan iran amin tan napsel ira. Nen tinipon na saray disipulo so soluk napnoy labinduan tiklis.

²¹ Sakey a liman libon lalaki ray angan, andi bali ni ray bibii tan saray ogogaw.

Nanakar si Jesus ed Tapew na Danum

²² Pinalogan nen Jesus ed baloto ray disipulo to, tan pinaona to ran binmaliw, legan ton pasisiputen iray totoo.

²³ Nen apasiput to la ray totoo, linmad nipokdul a pasen tan nampikasi. Nen asabiy labi, bukbukor nen Jesus diman.

²⁴ Diad sayan bekta arawi la may baloto tan kibang-kibang, ta onsusubad dagem.

²⁵ Nen palbangon, dinmagod sikara si Jesus a manaakar ed tapew na danum.

²⁶ Nen anengneng na saray disipulo a manaakar ed tapew na danum si Jesus, ataktakot ira. Anyani! iningaingal da.

²⁷ Balet tampol ya inkuantod sikara, Pakpel yoy loob yo, ta siak ya. Ag kayo natatakot!

²⁸ Inkuanen Pedro, Katawan, no tuan sika, parago mo ak a manakar ed tapew na danum.

²⁹ Gala dia, ebat nen Jesus. Kanyan linmeksab si Pedro ed danum, tan ginapoan toy manakar a mamaarap ed kinen Jesus.

³⁰ Balet nen alikas toy maksil a dagem, ataktakot tan nankalkalnan onlelereg. Ilaban mo ak, Katawan! iningal to.

³¹ Siningkat nen Jesus a tampol si Pedro tan inkuanto, Melmelag so pananisiam! Akin et nanduaruwa ka sirin a?

³² Linmogan iran duad baloto, tan tinmonday maksil a dagem.

³³ Inggalang na saramay walad baloto si Jesus tan kuanda, Tua a sikay Anak na Dios!

Pinaabig nen Jesus iray Mansasakit ed Genesaret

³⁴ Binmaliw irad dayat tan sinmakbit irad Genesaret.

³⁵ Abirbir na saray taga diman si Jesus tan imbalita ran tampol ed kaliber-liber iran pasen so insabi to. Kanyan inawit da ray mansasakit tan

³⁶ akikasi rad sikaton padiwit tod saramay mansasakit so saloy na kawes to. Inmabig iran amiy nandiwit.