Lucas 3 - Maung a Balita Biblia

Say Impanpupulong nen Juan a Managbinyag

¹ Kumalabinliman taon la na panooley nen Impirador Tiberio. Si Poncio Pilato so gobirnador na Judea, si Herodes so manoley ed Galilea, tan si agi ton Felipe so manoley ed Iturea tan Traconite. Si Lisanias so manoley ed Abilinia.

² Di Anas tan Caifas iray pangulon papari. Diad sayan panaon, sinmabid kalawakan so salitay Dios ed kinen Juan ya anak nen Zacarias.

³ Niliber to sirin so intiron lugar na Jordan. Impupulong to, Magbabawi kayod saray kasalanan yo tan mampabinyag kayo, et say Dios pirdonaen to kayo.

⁴ Agawa ya onung na insulat nen propita Isaias ed libro to: Walay mambabandod kalawakan, Iparaan yoy dalan na Katawan tan apiger yoy panakaran to!

⁵ Nakaukolan a natabunan iray abeban pasen tan napalanas iray nipokdul tan nipalandey a pasen. Nakaukolan a napetek iray malikon daladalan, tan napatar iray matibagkul a daladalan,

⁶ Tan nanengneng na amin a katoowan so panangilaban na Dios!

⁷ Dakerakel iray totoo a linman pabinyagan ed kinen Juan. Inkuantod sikara, Sikayon anak na ooleg! Siopay angibagad sikayon ibatikan yoy onsabin sanuk na Dios?

⁸ Ipanengneng yod panagbilay yo sirin a binenegan yo la ray kasalanan yo. Tan ag yo ibagbagad sikayon dili, Anak kami nen Abraham. Kuankod sikayo a nayarian na Dios a pagmaliwen ya anak nen Abraham ira yan bato.

⁹ Akaparaan lay wasay a pamatang ed saray kiew ya anggad lamut. Amin a kiew ya ag mambungay maung nabatang tan nibantak ed apoy.

¹⁰ Tinepet na saray totood sikato, Antoy nepeg min gawaen sirin?

¹¹ Inmebat, Say duaray kawes to nepeg ton iter so sakey ed anggapoy kawes to. Ontan met a say walay kanen to nepeg toy mangiter.

¹² Wala ray sumisingil na buis a linman pabinyagan ed sikato. Tinepet da, Maistro, antoy nepeg min gawaen?

¹³ Ag kayo manisingil na masoluk nen say nepeg yon singilen, ebat to.

¹⁴ Wala met iray sondalon nantepet, Sikami met ey? Antoy nepeg min gawaen? Inmebat ed sikara, Ag kayo mimialay kuartad siopaman diad pamasoot o pangakusad sikato. Pasarag yoy suildo yo.

¹⁵ Binmiskeg so ilalo ray amin a totoo tan tinetepet dad sikaran dili no si Juan et sikato la kasiy Cristo ya aalagden da.

¹⁶ Kanyan inkuanen Juan ed sikaran amin, Siak bibinyagan ta kayo ed danum, balet walay manomtombuk ed siak. Sikatoy makapanyari nen siak tan ag ak manepeg ya anggan mangokbar na sandalya to. Sikato binyagan to kayo ed Ispiritu Santo tan apoy.

¹⁷ Sankabembenan toy bigaon pantaep to na trigo. Tiponen toy ilik ed kamalir to, balet poolan toy taep ed apoy ya ag balut naerep.

¹⁸ Amayamay niy imbabangat nen Juan diad pampupulong toy Maung a Balita.

¹⁹ Balet nansalitaan toy Herodes a gobirnador, lapud inasawa nen Herodes si Herodias ya asaway mabilay nin agi to, tan lapud amin da ray arum a ginagawa ton maoges.

²⁰ Insan pinabelat ni nen Herodes so kasalanan to, ta impaipriso toy Juan.

Say Impaminyag ed kinen Jesus

²¹ Kasumpal ya abinyagan ya amin iray totoon dinmadago, abinyagan met si Jesus. Nen mampipikasi si Jesus, alokasay tawen

²² tan dinmapod sikatoy Ispiritu Santo ed nengneng na laman a singa malapati. Insan walay bosis a nanlapud tawen a nankuan, Sika so dilin Anak ko ya inararok; pakaliliketan ta ka.

Say Listaan da ray Boleg a Nanlapwan nen Jesus

²³ Mantalomploy taon si Jesus nen ginapoan toy mampulong. Abaloan na saray totoo a si Jesus et anak nen Jose, ya anak nen Eli,

²⁴ ya anak nen Matat. Si Matat anak nen Levi, ya anak nen Melki. Si Melki anak nen Janai, ya anak nen Jose.

²⁵ Si Jose anak nen Matatias, ya anak nen Amos. Si Amos anak nen Nahum, ya anak nen Esli. Si Esli anak nen Nage,

²⁶ ya anak nen Maat, ya anak nen Matatias. Si Matatias anak nen Semei, ya anak nen Josek. Si Josek anak nen Joda,

²⁷ ya anak nen Joanan. Si Joanan anak nen Resa, ya anak nen Zorobabel, ya anak nen Sealtiel, ya anak nen Neri.

²⁸ Si Neri anak nen Melki, ya anak nen Adi. Si Adi anak nen Cosam, ya anak nen Elmadam, ya anak nen Er.

²⁹ Si Er anak nen Josue, ya anak nen Eliezer, ya anak nen Jorim, ya anak nen Matat. Si Matat anak nen Levi,

³⁰ ya anak nen Simeon, ya anak nen Juda. Si Juda anak nen Jose, ya anak nen Jonan, ya anak nen Eliakim,

³¹ ya anak nen Melea. Si Melea anak nen Mena, ya anak nen Matata, ya anak nen Natan, ya anak nen David.

³² Si David anak nen Jesse, ya anak nen Obed, ya anak nen Booz. Si Booz anak nen Salmon, ya anak nen Naason,

³³ ya anak nen Aminadab, ya anak nen Admin. Si Admin anak nen Arni, ya anak nen Esrom, ya anak nen Fares. Si Fares anak nen Juda,

³⁴ ya anak nen Jacob. Si Jacob anak nen Isaac, ya anak nen Abraham. Si Abraham anak nen Tare, ya anak nen Nacor.

³⁵ Si Nacor anak nen Serug, ya anak nen Reu, ya anak nen Peleg, ya anak nen Eber, ya anak nen Sela.

³⁶ Si Sela anak nen Cainan, ya anak nen Arfajad, ya anak nen Sem. Si Sem anak nen Noe, ya anak nen Lamec,

³⁷ ya anak nen Matusalem, ya anak nen Enoc. Si Enoc anak nen Jared, ya anak nen Mahalaleel, ya anak nen Cainan.

³⁸ Si Cainan anak nen Enos, ya anak nen Set. Si Set anak nen Adan, tan si Adan anak na Dios.